ރަސްމާލެ މަޝްރޫއުގެ މައުލޫމާތު ސިންގަޕޫރުގެ ހާރިޖީ ވަޒީރާއި ހިއްސާކުރައްވައިފި
ރަސް މާލެއަކީ ޑިޖިޓަލް / ތިމާވެއްޓާ ރައްޓެހި ސިޓީއަކަށް ހެދުމަށް ރާއްވަވާފައިވާ މަސައްކަތްތަކުގެ މައުލޫމާތު ވެސް އެ މަނިކުފާނާ ހިއްސާ ކުރެއްވި އެވެ.
އދގެ އާންމު މަޖިލީހުގެ 79 ވަނަ ސެޝަންގެ ހަވާސާ ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސިންގަޕޫރުގެ ހާރިޖީ ވަޒީރު، ޑރ. ވިވިއަން ބާލާކްރިޝްނާންއާ ބައްދަލު ކުރައްވައިފި އެވެ.
މި ބައްދަލުކުރެއްވުމު ގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ރާއްޖެއިން އިތުރު އިންވެސްޓްމަންޓްތައް ހޯދުމަށާ ޑިޖިޓަލް ހިދުމަތްތައް ފުޅާކުރުމަށާ މޫސުމަށް އަންނަ ނޭދެވޭ ބަދަލުތަކުން ރައްކާތެރިވުމަށް ކުރަމުންދާ މަސައްކަތްތަކުގެ މައުލޫމާތު ސިންގަޕޫރުގެ ހާރިޖީ ވަޒީރާ ހިއްސާ ކުރައްވާފަ އެވެ. އަދި އާންމު ބޯހިޔާވަހިކަމުގައި ފަންނީ އެހީތެރިކަން ބޭނުންވާ ކަން ފާހަގަކުރައްވާ ރަސް މާލެއަކީ ޑިޖިޓަލް / ތިމާވެއްޓާ ރައްޓެހި ސިޓީއަކަށް ހެދުމަށް ރާއްވަވާފައިވާ މަސައްކަތްތަކުގެ މައުލޫމާތު ވެސް އެ މަނިކުފާނާ ހިއްސާ ކުރެއްވި އެވެ.
ޑިޖިޓަލް އިންފްރާސްޓްރަކްޗާ އިތުރަށް ވަރުގަދަ ކުރުމަކީ ގައުމުގެ އާބާދީގެ ފަންސާސް އިންސައްތަ ހިއްސާކުރާ ޒުވާނުންނަށް ވަރަށް މުހިންމު ކަމެއް ކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަ ކުރެއްވި އެވެ. އެގޮތުން ޕޭޕާލް ފަދަ އެކިއެކި ޕްލެޓްފޯމްތަކުގެ ބޭނުން ހިފާނެ ފުރުސަތު ދިވެހި ޒުވާނުންނަށް ލިބުމަކީ ޒުވާން ވިޔަފާރިވެރިންނަށް ބޭރު ދުނިޔޭގެ މާކެޓްތަކަށް ވަނުމަށާއި އެ ޒުވާނުންގެ އީޖާދީ އުފެއްދުންތައް ކުރިއެރުވުމަށް ބާރަކަށް ވެގެންދާނެ ކަމެއް ކަމުގައި ވިދާޅުވި އެވެ.
ރައީސުލްޖުމްހޫރިއްޔާ ޑރ. މުއިއްޒު އަދި ސިންގަޕޫރުގެ ހާރިޖީ ވަޒީރު، ޑރ. ބާލާކްރިޝްނާން ވަނީ ބައިނަލްއަގްވާމީ މައިދާނު ގައި ދެ ގައުމަށް މުހިންމު ކަންކަމު ގައި -- ހާއްސަ ގޮތެއް ގައި އެލަޔަންސް އޮފް ސްމޯލް އައިލެންޑް ޑިވެލޮޕިން ސްޓޭޓްސް (އެއޯސިސް) އާ ގުޅުން ހުރި ކަންކަމުގައި މަސައްކަތް ކުރުމަށް މަޝްވަރާ ކުރައްވާފަ އެވެ.
ކޮމެންޓް
Republic of Maldives