ސެޓެލައިޓް މެދުވެރިކޮށް ކަނޑުގެ ސަރަހައްދު ބަލަހައްޓަން މަސައްކަތް ކުރަނީ

ސެޓެލައިޓް މެދުވެރިކޮށް ރާއްޖޭގެ ކަނޑުގެ ސަރަހައްދު މިހާރަށްވުރެ ފުޅާކޮށް ބެލެހެއްޓުމަށް މަސައްކަތް ކުރައްވަމުން ގެންދަވާ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެ އެވެ.

ޕީއެސްއެމް ނިއުސްގެ "ދިވެހިންގެ އަޑު ދުނިޔެއަށް" ޕްރޮގްރާމުގައި ރޭ ވާހަކަ ދައްކަވަމުން މިނިސްޓަރު ޣައްސާން ވިދާޅުވީ ރާއްޖޭގެ ކަނޑުގެ ސަރަހައްދު ދިވެހިން އަމިއްލައަށް ބެލެހެއްޓުމުގެ ގޮތުން ދިވެހި ސިފައިންގެ ފައުޖަށް ޔޫއޭވީ (ޑްރޯން) އިތުރުކޮށްފައިވީ ނަމަވެސް، ރައީސްގެ ވިސްނުންފުޅަކީ އެ މަސައްކަތް މިއަށްވުރެ ފުޅާ ކުރުން ކަމަށެވެ.

މިނިސްޓަރު ވިދާޅުވީ މޯލްޑިވްސް ސްފޭސް ރިސާޗް އޯގަނައިޒޭޝަނުގައި މަސައްކަތްކުރާ ވަރަށް ޒުވާން ކުދިންތަކެއް ޑިފެންސް މިނިސްޓްރީއާއެކު އެކަމާ ގުޅިގެން މަސައްކަތްތަކެއް ކުރަމުންދާ ކަމަށެވެ. އެކުދިންނަކީ ނާސާގައި މަސައްކަތް ކުރާ ފަރާތްތަކާއެކު ވެސް ގާތް ގުޅުމެއް އޮންނަ ކުދިންތަކެއްކަން މިނިސްޓަރު ފާހަގަކުރެއްވި އެވެ.

"މި މަސައްކަތުގެ ތެރެއިން އަޅުގަނޑުމެން މިހާރު މިބަލަނީ ދިވެހިރާއްޖޭގަ އަޅުގަނޑުމެންގެ މެރިޓައިމް ޑޮމެއިން އެވެއާނަސް، މާނައަކީ އަޅުގަނޑުމެންގެ މުޅި ސަރަހައްދު ބެލުމުގެ މަސައްކަތް ވަރަށް ކައިރި މުސްތަގުބަލެއްގެ ތެރޭގައި އިރާދަކުރެއްވިއްޔާ ސެޓެލައިޓް މެދުވެރިކޮށް ބެލޭނެ ނިޒާމެއް ވެސް ގާއިމްކުރަން،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ދުނިޔޭގެ ގައުމުތަކާއެކު މަސައްކަތް ކޮށްގެން ރައީސް ބޭނުންވެވަޑައިގަންނަވަނީ ރާއްޖޭގެ ބައިނަލްއަގްވާމީ ޒިންމާ އަމިއްލައަށް އުފުލައި، މި ސަރަހައްދަކީ ދުނިޔޭގެ އެހެން ގައުމުތަކަށް ވެސް ސުލްހަވެރިކަމާއެކު ރައިޓް އޮފް ޕެސެޖް އޮންނަ އުސޫލުން ދަތުރުފަތުރުކޮށް އަދި އެއްވެސް ކަހަލަ ނުރައްކަލެއް ނެތް ސަރަހައްދަކަށް ހެދުން ކަމަށެވެ.

"އަޅުގަނޑުމެންގެ ރައީސުލްޖުމްހޫރިއްޔާގެ ވިސްނުންފުޅު ހުރީ ދިވެހިރާއްޖޭގެ ބައިނަލްއަގްވާމީ މަސްއޫލިއްޔަތު ދިވެހިރާއްޖޭން އަދާކުރުން. މާނައަކީ އަޅުގަނޑުމެންގެ ޓެރެޓެރީ، އަޅުގަނޑުމެންގެ މަސްއޫލިއްޔަތުގެ ތެރެއަށް އަންނަ މިދެންނެވި މުއާމަލާތްތައް ހިނގާ، ކަނޑުގެ ސަރަހައްދު ބެލުން އެއީ އަޅުގަނޑުމެން އަމިއްލަ ގާބިލިއްޔަތު އިތުރުކޮށްގެން ކުރާ މަސައްކަތެއް ކަމުގަ ހައްދަވަން،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ މި ސަރަހައްދަކީ މުދާ އުފުލުމަށް ބޭނުން ކުރާ ރޫޓަކަށްވާއިރު، ޓްރާންސްނޭޝަނަލް ކަރައިމް ހިންގާ މީހުންގެ ކަޅިތައް މި ސަރަހައްދަށް އަމާޒުވެފައި ހުންނަނީ އެހެންވެގެން ކަމަށެވެ. އެހެންކަމުން މިއީ ވަރަށް ރަގަޅަށް ބަލަަހައްޓަން ޖެހޭ ސަރަހައްދެއް ކަމަށް ވިދާޅުވި އެވެ.