ހޯނޑެއްދޫ ކައުންސިލުން ކަނޑެވާރެހާގައި ވިލާތަކާއެކު ޓޫރިޒަމް މަޝްރޫއެއް

ހޯޑެއްދޫ ކައުންސިލުން ގދ. ކަނޑެވާރެހާގައި ޓޫރިޒަމްގެ ބިޔަ މަޝްރޫއެއް ހިންގަން ނިންމައި މަޝްރޫއަށް ޝައުގުވެރިވާ ފަރާތެއް ހޯދަން އިއުލާނުކޮށްފި އެވެ.

ހޯޑެއްދޫ ކައުންސިލުން ބުނީ 4.6 ހެކްޓަރުގެ ކަނޑެވާރެހާގައި ޓޫރިޒަމް މަޝްރޫއު ހިންގަން ހުޅުވާލީ ރަށުގެ ގުދުރަތީ ރީތިކަމަށް ގެއްލުމެއް ނުވާނެ ގޮތަކަށެވެ. މިތަނުގައި ހިންގާ މަޝްރޫއުގައި އިކޯ ޓޫރިޒަމްގެ ބައެއް ވެސް ހިމެނެ އެވެ. މި މަޝްރޫއުގެ ދަށުން މި ރަށް ކުއްޔަށް ދޫކުރަން ނިންމާފައިވަނީ 50 އަހަރަށެވެ. 

މި ރަށް ކުއްޔަށް ދޫކުރަން އެކުއެޒިޝަން ކޮސްޓުގެ ގޮތުގައި ހުށަހަޅާފައިވާ އަގަކީ 700،000 ޑޮލަރެވެ. 

މަޝްރޫއަށް ކުރިމަތިލާ ފަރާތްތަކުން ބިޑް ސެކިއުރިޓީގެ ގޮތުގައި މަރުކަޒީ ބޭންކް ގަބޫލުކުރާ ފަރާތަކުން 50،000ރ. ގެ ސެކިއުރިޓީއެއް ބަހައްޓަން ޖެހެ އެވެ. އަދި މަޝްރޫއަށް ބިޑް ފޮތް ވިއްކަނީ 3،000-2،500 ޑޮލަރާ ދެމެދުގެ އަގެއްގަ އެވެ. ރަށަށް ޝައުގުވެރިކަން ފާޅުކުރަން ޖެހޭ ސުންގަޑިއަކީ ނޮވެމްބަރު 17 އެވެ. 

ވެލާނާ އިންޓަނޭޝަނަލް އެއާޕޯޓުން 55 މިނެޓުގެ ރާސްތާގައި އޮންނަ ކާޑެއްދޫ އެއާޕޯޓް ކައިރީގައި އޮންނަ ކަނޑެވާރެހާގައި ހިންގާ ޓޫރިޒަމް މަޝްރޫއުގައި ބީޗް ވިލާ ޕްރައިވެޓް ޕޫލްއާއެކު އަދި ވޯޓާވިލާވެސް ހުންނާނެ އެވެ. މީގެ އިތުރުން ރަށުގެ ގުދުރަތީ ގަސްތަކުގެ ތެރޭގައި ތަރައްގީ ކުރާ މަލްޓިބެޑްރޫމް ބީޗް ވިލާތަކެއްވެސް ހަދާނެ އެވެ. އަދި ދިވެހި ބޭސްވެރިކަމުގެ ފަރުވާ ހިމެނޭ ގޮތަށް މަތީ ފަންތީގެ ސްޕާ އަދި ވެލްނަސް ފެސިލިޓީއެއްވެސް ހުންނާނެ އެވެ. 

ހޯޑެއްދޫ ކައުންސިލުން އަންދާޒާ ކުރާ ގޮތުގައި މި ރިސޯޓުގެ އެވްރެޖު ރޭޓް ހުންނާނީ ރެއަކަށް 1،800-1،200 ޑޮލަރާއި ދެމެދުގަ އެވެ. އަދި އޮކިއުޕެންސީ އެވްރެޖު ގޮތެއްގައި 67-75 ޕަސެންޓާ ދެމެދުގައި ހުންނާނެ އެވެ. އަހަރެއްގެ މައްޗަށް އާމްދަނީގެ ގޮތުގައި 38 މިލިއަން ޑޮލަރުގެ އާމްދަނީއެއް ލިބޭނެ އެވެ. 

ގއ. އަތޮޅުގައި މި ވަގުތު ރަފަލްމޯލްޑިވްސް މިރިޔަންދޫ އާއި އެންއެޗް ކަލެކްޝަން ހޮވައްޑާ ރޮބިންސަން ކްލަބް މޯލްޑިވްސްގެ އިތުރުން އަރާދާ މޯލްޑިވްސް ހިންގަ އެވެ.