އެފްއޭއެމްގެ ނޯމަލައިޒޭޝަން ކޮމިޓީއާ ފީފާގެ ވަފްދާއި ޕީޖީ ބައްދަލު ކުރައްވައިފި

ޕްރޮސިކިއުޓާ ޖެނެރަލް އައްބާސް ޝަރީފް، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ނޯމަލައިޒޭޝަން ކޮމިޓީ އާއި ރާއްޖެ ވަޑައިގެން އުޅުއްވާ ބައިނަލްއަގްވާމީ ފުޓްބޯޅައާބެހޭ ޖަމިއްޔާ (ފީފާ) ގެ ވަފްދާ ބައްދަލު ކުރައްވައިފި އެވެ.

އެފްއޭއެމްގެ ނޯމަލައިޒޭޝަން ކޮމިޓީގެ އެދިވަޑައިގަތުމަށް މިއަދު ހޮޓެލް ޖެން ގައި ކުރިއަށްގެންދިޔަ މި ބައްދަލުވުމުގައި ޕްރޮސިކިއުޓާ ޖެނެރަލް ވަނީ އެފްއޭއެމްގެ ގިނަ އަދަދެއްގެ ފައިސާއަށް ހިޔާނާތްތެރިވި މައްސަލައިގެ އެންމެ ފަހުގެ މައުލޫމާތު ހިއްސާ ކުރައްވާފަ އެވެ.

އަދި މި ހިޔާނާތުގެ ސަބަބުން އެފްއޭއެމަށް ގެއްލިފައިވާ ފައިސާ އާއި މުދާ އަނބުރާ ހޯދުމަށް އެޅެންހުރި ފިޔަވަޅުތަކާ ގުޅޭގޮތުން މި ބައްދަލުވުމުގައި މަޝްވަރާ ކުރެއްވި އެވެ. އަދި އެފްއޭއެމްގެ ކުރީގެ ވެރިންގެ މައްޗަށް ހިންގަމުންދާ ޖިނާއީ ތަހުގީގާ ގުޅިގެން، އެފްއޭއެމްގެ މަސައްކަތްތައް އާންމު ހާލަތަކަށް ރުޖޫއަކުރުމަށް ކުރަމުންދާ މަސައްކަތު ގައި ދިމާވާ ދަތިތައް އެފްއޭއެމްގެ ފަރާތުން ޕްރޮސިކިއުޓާ ޖެނެރަލްއާ ހިއްސާ ކުރެއްވި އެވެ. ޕްރޮސިކިއުޓާ ޖެނެރަލް ވަނީ ތަހުގީގީ އިދާރާތަކާ ގުޅިގެން އެކަންކަން ހައްލު ކޮށްދެއްވާނެ ކަމަށް ވިދާޅުވެފަ އެވެ.

އަދި އެފްއޭއެމް ތެރޭގައި މިފަދަ ކަންކަން ތަކުރާރު ނުވާނެގޮ ތަށް އަމާޒުކޮށްގެން ނޯމަލައިޒޭޝަން ކޮމިޓީގެ މަސައްކަތްތައް ބައްޓަންކުރުމަށް ޕީޖީ ބާރުއެޅުއްވި އެވެ.

ފުޓްބޯލް އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، އިތުރު ކުށުގެ އަމަލުތައް ހިންގާ ކަމަށް ތުހުމަތުކުރެވޭ މައްސަލައެއް ޕްރޮސިކިއުޓާ ޖެނެރަލްގެ ސަމާލު ކަމަށް އައުމާ ގުޅިގެން، އެ މައްސަލަ ތަހުގީގު ކުރުމަށް ޕީޖީ އަމުރު ކުރެއްވީ އޮކްޓޫބަރު 22، 2023 ގަ އެވެ.

އެފްއޭއެމްގެ ރައީސްގެ މަގާމުގައި ހުންނަވައިގެން ބައްސާމް އަދީލް ޖަލީލު ވަނީ އެ އެސޯސިއޭޝަންގެ ފައިސާއަށް ވަރަށް ބޮޑަށް ހިޔާނާތްތެރިވެފަ އެވެ. އެ ފައިސާ އިން އަމިއްލަ އެޕާޓްމަންޓްތައް ގަތުމާއި އެ ނޫން އެތައް ކަމެއް ކޮށްފައިވެ އެވެ.