އިސްރާއީލުގެ ޖަރީމާތަކަކީ ޓެރަރިޒަމްގެ ގޮތުގައި ސިފަކުރައްވައި ޖަވާބުދާރީކުރުވަން ރައީސް ގޮވާލައްވައިފި

އިސްރާއީލުން ފަލަސްތީނާއި ލުބުނާނުގައި މިހާރު ހިންގަމުންދާ ހަނގުރާމައަކީ ޓެރަރިޒަމުގެ އަމަލުތަކެއްގެ ގޮތުގައި ސިފަކުރައްވައި އެ ގައުމު ޖަވާބުދާރީކުރުވުމަށް ބައިނަލްއަގުވާމީ މުޖުތަމައަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގޮވާލައްވައިފި އެވެ. 

އދގެ އާންމު މަޖިލީހުގެ 79 ވަނަ ބައްދަލުވުމުގައި މިރޭ ދެއްވި ތަގުރީރުގައި ރައީސް ވިދާޅުވީ ރާއްޖެއަކީ ބައިނަލްއަގުވާމީ މުއާހަދާތައް ތަސްދީގުކޮށް ތަންފީޒުކުރުމާއެކު ރިޕޯޓުކުރުމުގެ ރަނގަޅު ތާރީހެއް އޮތް ގައުމެއް ކަމަށެވެ. ތިމާވެށި ހީނަރުވުމުން ކުރާ ނުރަނގަޅު އަސަރުތައް ރަނގަޅަށް ދެނެ ތިބެ ތިމާވެށީގެ ހައްގުތަކަށް އެންމެ ބޮޑަށް މަސައްކަތްކުރަނީ ރާއްޖެއިންކަން އެމަނިކުފާނު ފާހަގަކުރެއްވި އެވެ. 

އަދި އެއްވެސް ގައުމަކުން ހައްގުތަކަށް އަރައިގަތުމަކީ ތަހައްމަލުކުރެވޭނެ ކަމެއް ނޫން ކަމުގައި ރައީސް ވިދާޅުވި އެވެ. 

"ބޮޑަސް ކުޑަޔަސް، މުއްސަންޖަސް ފަގީރަސް، ބާރުގަދަ އެކުވެރިން ތިއްބަސް ނެތަސް، އިންސާނީ ހައްގުތަކަށް އަރައިގަތުން ތަހައްމަލުކުރެވިގެންނުވާނެ،" ރައީސް ވިދާޅުވި އެވެ. 

އިތުރަށް އެމަނިކުފާނު ވިދާޅުވީ ޣައްޒާގައި އިސްރާއީލުން ހިންގަމުންދާ ގަތުލު އާންމަކީ އަދުލު އިންސާފަށް އަރައިގަނެ ބައިނަލްއަގުވާމީ ނިޒާމަށް އިހާނެތިކޮށް ހިތުމުގެ އަމލެއް ކަމަށެވެ. އިސްރާއީލުން ޣައްޒާގެ ގެދޮރާއި ހޮސްޕިޓާތަކާއި، ސުކޫލުތަކާއި އިންސާނީ ވަސީލަތްތައް ސުންނާފަތިކޮށް، ތަކުރާރުކޯށް އަންހެނުންނާއި ކުޑަކުދިންނާއި ތުއްތުކުދިން ގަތުލުކުރަމުންދާ ކަމަށް ވިދާޅުވި އެވެ. 

އަދި ޣައްޒާގައި އެހާ ގިނަ އާންމުން ގަތުލުކުރި ކުރުން ދުނިޔެއަށް އަދި ހަޖަމުނުވެގެން އުޅެނިކޮށް އިސްރާއީލުން ލުބުނާނަށް ހަމަލާދީ އެތައް ސަތޭކަ ބަޔަކު ގަތުލުކޮށްފިކަމަށް ވިދާޅުވެ ރައީސް ވިދާޅުވީ މަރުވަމުންދާ މީހުންގެ ކެކުޅުންތަކުގެ އަޑު އިންސާނިއްޔަތުކަމެއް ހުރި މީހެއްނަމަ އެމީހެއްގެ ޟަމީރުގައި ހަރުލާފައިވާ ކަމަށެވެ. އަދި އެ މީހުންގެ ކަރުނައިން ޟަމީރުތަކުގައި ހިތި ރަހަ ލައްވަމުންދާ ކަމަށެވެ. 

އިސްރާއީލުން އިންސާނިއްޔަތުގެ ކަންފަތާއި ލޯ ކަމަށްވާ ނޫސްވެރިން ގަތުލުކުރަމުންދާކަން ފާހަގަކުރައްވައި އެމަނިކުފާނު ވިދާޅުވީ ފަލަސްތީނު، ލުބުނާނު އަދި އަލްޖަޒީރާގެ ނޫސްވެރިން މަރައި، އަލްޖަޒީރާގެ އޮފީސް ބަންދުކުރުމަކީ ހިނގަމުންދާ ޖަރީމާތައް ދުނިޔެއަށް ކަޝްފުވުން ހުއްޓުވުމަށް ކުރާ ކަމެއް ނޫން ގޮތަށް މާނަ ނުކުރެވޭނެ ކަމަަށެވެ. 

އިސްރާއީލުން ހިންގަމުންދާ  ބައިނަލްއަގުވާމީ ގާނޫނާއި، އދގެ މުއާހަދާތަކާ ހިލާފު ޓެރަރިސްޓު އަމަލުތަކަށް ޖަވާބުދާރީ ކުރުވަންޖެހޭ ކަމަށް ރައީސް ވިދާޅުވި އެވެ.

އޭގެ އިތުރަށް އެމަނިކުފާނު މިއަދުވެސް ތަކުރާރކޮށް ވިދާޅުވީ 1967 ވަނަ އަހަރުގެ ކުރީގެ ބޯޑަރުތަކުގެ މައްޗަށް އެކުލެވިފައިވާ އިރުމަތީ ގުދުސްގައި ވެރިރަށް އޮންނަ ފުރިހަމަ ސިޔާދަތު ލިބިފައިވާ މުސްތަގިއްލު ފަލަސްތީނު ދައުލަތެއް ބަލައިގަންނަންޖެހޭ ކމަށެވެ.