"ފަޒީސް ހިޖާމާ ކްލިނިކް" ބަންދު ކޮށްފި
"ކްލިނިކްގެ ވެރިފަރާތުން ގާނޫނުގެ ދަށުން ހޯދަން ޖެހޭ ހުއްދަތައް ހޯދައިގެން ހިޖާމާގެ ފަރުވާ ދިނުމަށާއި، މިހާރު ދެމުން ގެންދާ ހިޖާމާ ޖެހުމުގެ ހިދުމަތް، ހުއްދަ ލިބެންދެން ހުއްޓާލުމަށް ލިޔުމުން އަންގައި ވާނީ ނަސޭހަތްދެވިފައި،" ފުލުހުން ބުންޏެވެ
ހެލްތު މިނިސްޓްރީގެ ހުއްދަ ނުހޯދައި ހިންގާ "ފަޒީސް ހިޖާމާ ކްލިނިކް" ފުލުހުން އަންގައިގެން ބަންދުކޮށްފި އެވެ.
ހެލްތު މިނިސްޓްރީން މި މަހުގެ 11 ވަނަ ދުވަހު ފަޒީސް ހިޖާމާ ތެރަޕީގެ ވެރިޔާ ފަޒީލާ އުސްމާނަށް އެތަން ރަޖިސްޓްރީކޮށް، އެތަން ހިންގުމުގެ ހުއްދަ ލިބެންދެން އެތަނުން ފޯރުކޮށްދޭ ހިޖާމާ ޖެހުމުގެ ހިދުމަތް ހުއްޓައިލުމަށް އަންގާފައިވެ އެވެ. އެ މައްސަލަ ބަލައިދިނުމަށް ފުލުހުންނަށް ވެސް ހުށަހަޅާފައިވެ އެވެ.
ފުލުހުން މިއަދު ބުނީ ހެލްތު މިނިސްޓްރީން ބަލައިދޭން އެދުނު ކަންކަން މިހާރު ބަލައިފައިވާ ކަމަށެވެ. މި މައްސަލައާ ގުޅިގެން ފުލުހުން ހިންގާ ތަހުގީގަށް ކްލިނިކުން އެއްބާރުލުން ދެމުން ގެންދާ ކަމަށް ވެސް ފުލުހުން ބުންޏެވެ.
"ކްލިނިކްގެ ވެރިފަރާތުން ގާނޫނުގެ ދަށުން ހޯދަން ޖެހޭ ހުއްދަތައް ހޯދައިގެން ހިޖާމާގެ ފަރުވާ ދިނުމަށާއި، މިހާރު ދެމުން ގެންދާ ހިޖާމާ ޖެހުމުގެ ހިދުމަތް، ހުއްދަ ލިބެންދެން ހުއްޓާލުމަށް ލިޔުމުން އަންގައި ވާނީ ނަސޭހަތްދެވިފައި،" ފުލުހުން ބުންޏެވެ.
އެ ހިދުމަތް ހުއްޓައިލަން އެންގުމާ ގުޅިގެން ހެލްތު މިނިސްޓްރީން ކުރިން ނެރުނު ބަޔާނެއްގައި ބުނެފައި ވަނީ ފަޒީސް ހިޖާމާ ހުއްޓައިލަން އެންގީ އެތަނާ ގުޅޭ ގޮތުން މިނިސްޓްރީއަށް ލިބެމުންދިޔަ ޝަކުވާތަކާ ގުޅޭ ގޮތުން ފަޒީލާއާ ބައްދަލުކޮށް އެތަން ރަޖިސްޓްރީ ކުރަން އެންގުމަށްފަހު އެގޮތަށް އަމަލު ނުކުރުމުންނެވެ.
ބައެއް ކަހަލަ ބަލިތަކަށް ޑޮކްޓަރީ ފަރުވާގެ ބަދަލުގައި ހިޖާމާ ފަރުވާ ބޭނުންކުރެވޭނެ ކަމަށް ބުނެ ފަޒީސް ހިޖާމާއިން މީސްމީޑިޔާގައި އާންމުކޮށްފައިވާ އިޝްތިހާރުތަކަކީ ހެލްތު މިނިސްޓްރީގެ ހުއްދަ ނުހޯދައި އާންމުނުކުރެވޭނެ އިޝްތިހާރުތަކަކަށްވާތީ އިޝްތިހާރުތައް ނެގުމަށް އަންގާފައިވެ އެވެ.
އަދި ފަޒީސް ހިޖާމާއިން އާންމުކޮށްފައިވާ ބަލި މީހުންގެ މެޑިކަލް ރެކޯޑުތަކުގެ މައުލޫމާތަކީ ސައްހަ މައުލޫމާތުކަން ކަށަވަރުނުވާތީ އެ ރިޕޯޓުތައްވެސް ނެގުމަށް ހެލްތު މިނިސްޓްރީން އެންގި އެވެ.
ފުލުހުން މިއަދު ބުނީ ހެލްތު މިނިސްޓްރީގެ ހުއްދައެއް ނެތި ހުޅުމާލޭގައި ހިޖާމާ ކްލިނިކެއް ހިންގާ މައްސަލަ ބަލައިދިނުމަށް އެ މިނިސްޓްރީން އެދިފައިވާ ކަމަށެވެ. އަދި ފުލުހުންގެ ހިދުމަތުން އެ މައްސަލަ މިހާރު ބަލަމުންދާ ކަމަށެވެ.
މީގެ ކުރިން ފަޒީސް ހިޖާމާގެ ހިދުމަތްތައް ހުއްޓައިލަން ހެލްތުން އެންގިކަން ނޫސްތަކުން ރިޕޯޓުކުރުމުން ފަޒީލާވަނީ އެކަމާ ހިތްހަމަނުޖެހުން ފާޅުކޮށް އެވާހަކަތައް ދޮގުކޮށްފަ އެވެ.
ކޮމެންޓް
Republic of Maldives