ބައިލައްކައަށްވުރެ ގިނަ ރުފިޔާ ފޭރުމުގައި ހިމެނޭ ފިރިހެން މީހާގެ ބަންދަށް އިތުރު 15 ދުވަސް

މަގުމަތިން ދިޔަ ފިރިހެނަކު ކޮޓަރިއަށް ވައްދައި ފައިސާ ފޭރުނު މައްސަލައިގައި ހިމެނޭ، ފިރިހެން މީހާގެ ބަންދުގެ މުއްދަތު ދެވަނަ ފަހަރަށް އިތުރުކޮށްފި އެވެ.

މި މައްސަލައިގައި ހިމެނެނީ އަންހެނަކާއި ފިރިހެނެކެވެ. އަންހެން މީހާވެސް ވަނީ ބަންދުކޮށްފަ އެވެ.

މި މައްސަލައަކީ މިދިޔަ މަހުގެ 26 ވަނަ ދުވަހުގެ ރޭ 21:30 ހާއިރު އައިޖީއެމްއެޗް ކައިރިން ދިވެހި ފިރިހެނަކު ހުއްޓުވާ އޭނާއަށް ކޮޓަރިއަށް ދިއުމަށް ދައުވަތު ދިނުމަށްފަހު، މާފަންނު މުރަނގަ މަގުގައި ހުރި ގެސްޓްހައުސް އަކަށް ގެންގޮސް ދިވެހި ފިރިހެނަކު ބައިވެރިވެގެން، އެ މީހާ ރަހީނުކޮށް އޭނާގެ ފޯނާއި ކޭޝްކާޑު އަތުލައި އޭނާގެ އެކައުންޓުން 53،000 ރުފިޔާ ފޭރިގެނަފައިވާ މައްސަލަ އެވެ.

ބިރުދެއްކުމާއި، ފޭރުމާއި، ވައްކަމުގެ މި މައްސަލައިގައި ހިމެނޭ ފިރިހެން މީހާ އަކީ ގއ. ކަނޑުހުޅުދޫ، ވިދާތަރި، އިކްލީލް އިބްރާހިމެވެ.

އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން އެ ކޯޓުން ވަަނީ އޭނާގެ ބަންދަށް ފުރތަމަ 15 ދުވަސް ޖަހާފަ އެވެ. އޭގެ ފަހުން އެ މުއްދަތު ހަމަވެގެން ބަންދާމެދު ގޮތެއް ނިންމުމަށް އެ ކޯޓަށް ހާޒިރުމުން ވަނީ އިތުރު 15 ދުވަސް ބަންދަށް ޖަހާފަ އެވެ.

ބަންދު އަމުރުގައިވާގޮތުން އިކްލީލް އަކީ އެހެން މީހަކާއި ބައިވެރިވެގެން ގެސްޓްހައުސްތަކަށް މީހުން ގެންގޮސް، ވަޅިން ބިރުދައްކައި އެމީހުން އަތުން ފައިސާ ފޭރެމުންދާ މީހެއް ކަމަށެވެ. އަދި މި ދެ މީހުންނަކީވެސް މިބާވަތުގެ ކުށުގެ ރެކޯޑް އޮންނަ މީހުން ކަމަށްވެސް އަމުރުގައިވެ އެވެ.

މި މައްސަލައިގައި ފޭރުނު ފައިސާ އިކްލީލުގެ އެކައުންޓަށް ޖަމާވެފައިވާ ކަމަށް ސްޓޭޓްމެންޓުތަކުން ފެންނަ ކަމަށް ފުލުހުންގެ ފަރާތުން ވަނީ ކޯޓުގައި ފާހަގަކޮށްފަ އެވެ. 

މީގެ އިތުރުން އޭނާ އަކީ ބޮލުގައި ޓިއުމަރެއް ހުންނަ މީހެއް ކަމަށް ބުނަމުންދާތީ އެކަން ބެލުމަށް ގާޒީ ވަނީ ފުލުހުންނަށް އަންގާފަ އެވެ.