ހުރިހާ ދިވެހިން ތިބީ ފަލަސްތީނާއެކު، ކުރެވެން ހުރި ހުރިހާ ކަމެއް ކުރުމުގައި ދެމިތިބޭނަން: ރައީސް
ހުރިހާ ދިވެހިން ތިބީ ފަލަސްތީނާއެކު ކަމަށާއި ރާއްޖެއިން ފަލަސްތީނުގެ ހައްގުގައި ކުރެވެން ހުރި ހުރިހާ މަސައްކަތްތަކެއް ކުރަމުންދާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް ނިއުޔޯކަށް ކުރައްވަމުންދާ ދަތުރުފުޅުގެ ތެރެއިން އެ ބައްދަލުވުމުގެ ހަވާސާގައި ފަލަސްތީނުގެ ރައީސް މަހްމޫދު އައްބާސްއާަ ބައްދަލުކުރެއްވުމަށްފަހު ފަލަސްތީނުގެ މީޑިޔާއަށް ދެއްވި ބަސްދީގަތުމެއްގަ އެވެ.
އެ ބަސްދީގަތުމުގައި ރައީސް ވިދާޅުވީ ދިވެހިން އެންމެ ފުރިހަމަ މާނާގައި ތިބީ ފަލަސްތީނު ރައްޔިއްތުންނާއެކު ކަމަށެވެ. އަދި ފަސްތީނު ރައްޔިތުންނާއި އެމީހުންގެ ޤަޟިއްޔާއަކީ ކޮންމެ ދިވެއްސަކުވެސް ފުރިހަމައަށް ތާއީދުކުރާ ޤަޟިއްޔާއެއް ކަމުގައި ރައީސް ވިދާޅުވި އެވެ.
ފަލަސްޠީނުގެ ރައީސާ ބައްދަލުކުރައްވައި ކުރެއްވި މަޝްވަރާތަކުގައި ފަލަސްތީނުގެ މިނިވަން މުސްތަގިއްލު ދައުލަތެއް ގާއިމުކުރުމާ ގުޅޭ ގޮތުން މަޝްވަރާކުރެއްވިކަން ފާހަގަކުރައްވައި ރައީސް ވިދާޅުވީ ފަލަސްތީނު ރައްޔިތުންނާމެދު ހިންގަމުންދާ ޖަރީމާތަކާއި ދެމުންދާ އަނިޔާތަކާ ގުޅޭ ގޮތުން ދެ ބޭފުޅުން ވާހަކަދެއްކެވި ކަމަށެވެ.
"ފަލަސްތީނުގެ ގަޒިއްޔާއަށް ދިވެހިރާއްޖެއިން ފުރިހަމައަށް ތާއީދުކުރާކަމަށް ރައީސް އައްބާސް އަރިހުގައި ދެންނެވިން. އަދި މުސްތަގިއްލު މިނިވަން ދައުލަތެއް ލިބުމުގެ ހައްގު ފަލަސްތީނު ރައްޔިތުންނަށް އޮތްކަން ފާހަގަކުރިން،" ރައީސް ވިދާޅުވި އެވެ.
ފާއިތުވި ތަނުގައިވެސް ރާއްޖެއަށް ފަލަސްތީނު މައްސަލާގައި އެހީވެވެން އޮތް ހުރިހާ ގޮތަކުން އެހީވެފައިވާކަމަށާއި، މިހާރުވެސް ރާއްޖެއަށް ކުރެވެން ހުރި ހުރިހާ ކަމެއް ކުރަމުންދާ ކަމަށް ރައީސް ވިދާޅުވި އެވެ. އެމަނިކުފާނުވަނީ އެގޮތުގައި މުސްތަގުބަލުގައިވެސް ރާއްޖެ ދެމިއޮންނާނެ ކަމުގެ ޔަގީންކަން ދެއްވާފަ އެވެ.
"ރާއްޖޭގެ އިތުރު ބޭނުމެއް ނެތް. ކޮންމެ ދިވެއްސަކުވެސް ހުރީ ފަލަަސްތީނާއެކު،" ރައީސްގެ ބަސްދީގަތުން ނިންމަވައިލައްވަމުން ވިދާޅުވި އެވެ.
ކޮމެންޓް
Republic of Maldives