ރާއްޖޭގެ މަހުގެ އެކްސްޕޯޓުން އީޔޫން ނަގާ ޑިއުޓީއާމެދު ރައީސްގެ ކަންބޮޑުވުން ހިއްސާކުރައްވައިފި
އެގޮތުން ރާއްޖެއިން އީޔޫއަށް ބޭރުކުރާ ކަނޑުމަހުން ނެގުމަށް ކަނޑައަޅާފައިވާ 25 އިންސައްތައިގެ ޑިއުޓީގެ ސަބަބުން ރާއްޖެއަށް އީޔޫގެ ބާޒާރަށް ވާދަވެރިކަމާއެކު މަހުގެ ބާވަތްތައް ބޭރުކުރަން ހުރި ގޮންޖެހުންތައް ރައީސް ހިއްސާކުރެއްވި އެވެ.
ޔޫރަޕިއަން ޔޫނިއަން (އީޔޫ)އަށް ދިވެހިރާއްޖެއިން ބޭރުކުރާ މަހުގެ އުފެއްދުންތަކުން ބޮޑު ޑިއުޓީއެއް ނަގާތީ ހުރި ކަންބޮޑުވުންތައް ޔޫރަޕިއަން ކޮމިޝަނުގެ ރައީސާ އުރުސުލާ ވޮން ޑަ ލަޔަންއާ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހިއްސާ ކުރައްވައިފި އެވެ.
އދ.ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ދެ ލީޑަރުން ބައްދަލުކުރައްވާފައިވާއިރު އެ ބައްދަލުވުމުގައި ރައީސްވަނީ އީޔޫއާއި ރާއްޖޭގެ މެދުގައި އޮތް ބަދަހި ގާތްގުޅުމަށް ތާރީފު ކުރައްވާފަ އެވެ. އަދި އީޔޫއާއެކު ސިޔާސީ ގުޅުން އިތުރަށް ބަދަހިކުރައްވަން ބޭނުންފުޅުވާކަމަށް ރައީސް ވިދާޅުވެފައިވެ އެވެ.
ރާއްޖޭގެ ތަރައްގީއާމެދު އެމަނިކުފާނުގެ ސަރުކާރުން ގެންގުޅޭ އެޖެންޑާ އުރުސަލާއާ ހިއްސާކުރެއްވުމާއެކު، ތަރައްގީއަށް އީޔޫން އެހީތެރިކަން ބޭނުންވާ ދާއިރާތައް ރައީސް ފާހަގަކުރެއްވިކަމަަށް ރައީސުލްޖުމްހޫރިއްޔާގެ އޮފީހުން ބުނެ އެވެ.
އެގޮތުން ރާއްޖެއިން އީޔޫއަށް ބޭރުކުރާ ކަނޑުމަހުން ނެގުމަށް ކަނޑައަޅާފައިވާ 25 އިންސައްތައިގެ ޑިއުޓީގެ ސަބަބުން ރާއްޖެއަށް އީޔޫގެ ބާޒާރަށް ވާދަވެރިކަމާއެކު މަހުގެ ބާވަތްތައް ބޭރުކުރަން ހުރި ގޮންޖެހުންތައް ހިއްސާކުރައްވައި އެކަމުގެ ކަންބޮޑުވުން ރައީސް ހިއްސާކުރެއްވި އެވެ.
ހަމައެހެންމެ މޫސުމީ ބަދަލުތަކުން ލިބޭ ގެއްލުންތައް ކުޑަކުރުމަށް މޫސުމީ ބަދަލުތަކަށް ހޭނުމަށް ރާއްޖެއިން ކުރަމުންދާ މަސައްކަތްތަައް އެމަނިކުފާނުގެ ވާހަކަފުޅުގައި ފާހަގަކުރެއްވިކަމަށް ރައީސް އޮފީހުން ބުނެފައިވެ އެވެ.
އީޔޫއާއި ރާއްޖޭގެ ގުޅުން ބަދަހިކޮށް، އެކުގައި ކުރިއަށް އޮތް ތަނުގައި އިތުރު މަސައްކަތްތައް ކުރެވޭނެކަމށް އުންމީދުކުރައްވާކަމަށް މި ބައްދަލުވުމުގައި ރައީސް ވިދާޅުވެފައިވެ އެވެ.
ކޮމެންޓް
Republic of Maldives