މި އަހަރު 1،200 އަށްވުރެ ގިނަ ގެސްޓްހައުސް އެނދު އިތުރުވި

މި އަހަރުގެ މިހާތަނަށް ގެސްޓްހައުސް ތަކަށް 1،200 އަށްވުރެ ގިނަ އެނދު އިތުރުވިއިރު އިތުރުވެފައިވާ ކަމަށް ޓޫރިޒަމް ހިސާބު ތަކުން ދައްކައިފި އެވެ.

ޓޫރިޒަމް ރަސްމީ ހިސާބުތައް ދައްކާ ގޮތުގައި މި އަހަރުގެ ޖެނުއަރީ މަސް ނިމުނުއިރު ރާއްޖޭގައި ހުރީ 13,657 ގެސްޓްހައުސް އެނދެ އެވެ. ނަމަވެސް މިހާރު އެނދުގެ އަދަދު ވަނީ 14,903 އަށް އިތުރުވެފަ އެވެ. މިއީ 1,246 އެނދު އިތުރުވުމެކެވެ. މިދިޔަ އަހަރު ނިމުނުއިރު ޖުމްލަ 809 ގެސްޓްހައުސް ހުރިއިރު މި އަހަރު މި އަދަދު ވަނީ 883 އަށް އިތުރުވެފަ އެވެ. 

އެންމެ ގިނަ އެނދު ހުރީ މާފުށީގަ އެވެ. ނަމަވެސް މާފުށީގައި ހުރި ގެސްޓްހައުސްތަކާ އެއް އަދަދަކަށް މިހާރު އއ. ތޮއްޑޫގައި ވެސް ގެސްޓްހައުސް އެބަހުއްޓެވެ. ގެސްޓްހައުސްގެ އަދަދުން ބަލާނަމަ ތޮއްޑޫގައި ގިނަ އެވެ. 

ރިސޯޓްތަކުގައި މި އަހަރު ފެށުނުއިރު 176 ރިސޯޓުގައި 43,279 އެނދު ހުއްޓެވެ.ނަމަވެސް މިހާރު އޮފް ސީޒަންއާ ދިމާކޮށް ގިނަ ރިސޯޓު ތަކެއް މަރާމާތު ކުރަން ބަންދުކޮށްފައިވާތީ 174 އަށް މަދުވެފަ އެވެ. މި ވަގުތު ރިސޯޓްތަކުގައި ޖުމްލަ ހުރީ 42,965 އެނދެވެ. 

ޓޫރިޒަމް ހިސާބުތައް ދައްކާ ގޮތުން މި އަހަރުގެ މިހާތަނަށް ރާއްޖޭގައި ޓޫރިސްޓުންނަށް ހިދުމަތްދޭން ހުރި އެނދުގެ އަދަދު ވަނީ 62,814 އަށް އިތުރުވެފަ އެވެ. އެނދުގެ 70 ޕަސެންޓް ހިއްސާ ކުރަނީ ރިސޯޓްތަކުންނެވެ.