ވިޓޯލުން ދިން ޔަގީންކަން، ރާއްޖެއަށް ވާދަވެރިންނަށްވުރެ ފުރުސަތު ބޮޑު

އެހެން ގައުމުތަކަށްވުރެ ރާއްޖެ އަށް ބަންކަރިން ވިޔަފާރީގައި ފުރުސަތު ބޮޑު ކަމަށް ދުނިޔޭގެ އެންމެ ބޮޑު ބަންކަރިން ކުންފުނި ހޮލެންޑުގެ ވިޓޯލް އިން ބުނެފި އެވެ. 

އެސްޓީއޯއާއެކު ޕާޓްނާޝިޕް ވެގެން ރާއްޖޭގައި ބަންކަރިންގެ ވިޔަފާރި މިއަދު ފެށި ވިޓޯލް އިން ހޯރަފުށީގައި ބޭއްވި ނޫސްވެރިންގެ ބައްދަލުވުމެއްގައި "މިރާ" އިން ކުރި ސުވާލަކަށް ޖަވާބު ދެއްވަމުން އެ ކުންފުނީގެ އޮފިޝަލަކު ވިދާޅުވީ އެހެން ގައުމުތަކަށްވުރެ ރާއްޖެ އަށް ބަންކަރިންގައި ހުރި އެޑްވާންޓޭޖުތައް ގިނަ ކަމަށާ، އެ ކުންފުނިން ރާއްޖޭގައި މި ވިޔަފާރި ފެށީ އެހެންވެ އެވެ. 

"ރާއްޖޭން ބަންކަރިން މި ފަށަނީ އެންމެ ގިނަ އިން ބޯޓުތައް ދަތުރު ކުރާ އަށް ޑިގުރީ ޗެނަލުން. މިއީ ޖިއޮގްރެފިކަލީ ރާއްޖެ އަށް އޮތް ބޮޑު އެޑްވާންޓޭޖެއް. ބަންކަރިންގައި ވަރަށް މުހިންމު އާއްމުކޮށް ބޯޓުތައް ދަތުރު ކުރާ މެއިން ލައިނާއާ ގާތްވުމަކީ. ރާއްޖެ އަށް ގުދުރަތީ ގޮތުން އެ އެޑްވާންޓޭޖް އެބައޮތް ރޮޓަޑަމް [ހޮލެންޑް] އާއި [ޔޫއޭއީ] ގެ ފުޖެއިރާ ފަދަ ތަންތަނާ ބެލިނަމަވެސް ރާއްޖެ އަށް އެއީ އެޑްވާންޓޭޖެއް،" ބަންކަރިން ތެޔޮ ސަޕްލައި ކުރުމުގެ 50 އަހަރުގެ ތަޖުރިބާ ލިބިފައިވާ ކުންފުނީގެ އޮފިޝަލް ވިދާޅުވި އެވެ. 

އޭނާ ވިދާޅުވީ ބަންކަރިން ބަނދަރެއް ހިއްކައިގެން ހަދަން ވަގުތު ނަގާނެ ކަމަށާ ނަމަވެސް އެ ކުންފުނީގެ ނެޓްވޯކުގެ ބޭނުންކޮށްގެން މިހާރު ވެސް ރަނގަޅު ވިޔަފާރިއެއް ކުރެވިދާނެ ކަމަށް ގަބޫލު ކުރެވެ އެވެ. ވިޓޯލް އިން ވާހަކަ ދެއްކެވި އޮފިޝަލް ވަނީ ބަންކަރިންގައި ރާއްޖެ އަށް އޮތް އެޑްވާންޓޭޖުގެ ސަބަބުން ރާއްޖޭގައި އިތުރު އިންވެސްޓްމަންޓްތައް ކުރާނެކަމުގެ ފެހި ސިގުނަލް ދެއްވާފަ އެވެ. ނަމަވެސް އެކަމުގެ އިތުރު ތަފުސީލެއް އޭނާ ނުދެއްވަ އެވެ. 

ވިޓޯލްގެ އޮފިޝަލް ވިދާޅުވި ގޮތުގައި އެ ކުންފުނީގެ ބޮޑު އެޑްވާންޓޭޖްއަކީ ދުނިޔޭގެ ބޮޑެތި ޕޯޓްތަކަށް ބަންކަރިންގެ ތެޔޮ ފޯރުކޮށް ދިނުން ކަމަށާ މި ތަޖުރިބާ އެސްޓީއޯ ހިއްސާކޮށްގެން ކުރިއަށް ދާނެ އެވެ. 

ދިވެހި ނޫސްވެރިން ވަނީ ރާއްޖޭން އޮފްޝޯވްކޮށް ބަންކަރިން ފެށިިއިރު އަވަށްޓެރި އިންޑިއާ އާއި ސްރީލަންކާ އިން ބަނދަރު ހަދައިގެން މި ހިދުމަތް ދެމުންދާ ކަމަށާ އެކަމުގެ ސަބަބުން ރާއްޖެއަ ށް އޮތް ފުރުސަތު ހަނި ވެދާނެ ތޯ ވިޓޯލްގެ އޮފިޝަލްއާ ސުވާލުކޮށްފަ އެވެ. 

މި ސުވާލުގެ ޖަވާބުގައި ސިންގަޕޫރާއި އެމެރިކާގެ ބަނދަރު ތަކަށް ވެސް ތެޔޮ ފޯރުކޮށްދޭ ކުންފުނީގެ އޮފިޝަލް ވިދާޅުވި ގޮތުގައި ބޮޑެތި ބޯޓު ފަހަރުތަކުގެ އޯނަރުން ބަލާނީ ހަމައެކަނި ތެޔޮ ވިއްކާ އަގަށް ނޫން ކަމަށާ މި ވިޔަފާރީގައި ހިދުމަތްދޭ ރޫޓަކީ އެންމެ މުހިންމު އެއް ބައެވެ .އަދި  ބޯޓު ފަހަރުގެ ވެރިން ބަލާނީ މިކަމުގައި ދެވޭ ފުލް ޕެކޭޖަށްކަން އޭނާ ފާހަގަ ކުރެއްވި އެވެ. 

"ރާއްޖެއާ [އަވަށްޓެރި] ބަނދަރުތަކުގައި މުޅި އަހަރު ބަންކަރިން ހިދުމަތެއް ނުދެވޭނެ މޫސުން އޮންނަ ގޮތުން. އެކަމަކު ރާއްޖޭގައި މުޅި އަހަރު ވެސް މިކަން ކުރެވޭނެ. ސެކިއުރިޓީ ވެސް ބަލާނެ،" ޖަބަލްއަލީ ބަނދަރަށް "ބަޔޯ ފިއުލް" ސަޕްލައިކުރާ ކުންފުނީގެ އޮފިޝަލް ވިދާޅުވި އެވެ.  

ރާއްޖޭގައި ބަންކަރިންގެ ވިޔަފާރި މިއަދު އިފުތިތާހު ކުރިއިރު ދުވާލަކު 200 އެއްހާ ބޯޓު މި ސަރަހައްދުން ހުރަސްކުރެ އެވެ. ސަރުކާރުގެ އަމާޒަކީ ވާދަވެރި ބާޒާރެއްގައި ހުންނަ ގޮންޖެހުތަކާއެކު އޭގެ އެއް ޕަސެންޓް ރާއްޖެ އަށް ހޯދޭނެ އެވެ. މި ވަރަށް ހޯދުނުނަމަވެސް އަހަރު 400 މިލިއަން ޑޮލަރު ހަމައެކަނި ތެލުން ލިބޭނެ ކަމަށް ސަރުކާރުން އަންދާޒާ ކުރެ އެވެ. މި ވިޔަފާރި ހޯރަފުށީގައި މިއަދު ފެށިއިރު އެސްޓީއޯއިން ވަނީ މިކަމަށް ދެ ބޯޓުވެސް ގެނެސްފަ އެވެ. މި ހިދުމަތް ދިނުމުގެ އިތުރުން މިއާއެކު ހުރި އެހެން ހިދުމަތްތައްދޭން ވަނީ އައިއެސްޕީއެސް ކޮމްޕްލައިންޓް ޕޯޓް ފެސިލިޓީސް ވެސް ގާއިމްކޮށްފަ އެވެ. މި ހިދުމަތާ ގުޅުންހުރި މެރިޓައިމްގެ އެހެން ހިދުމަތްތައްދޭން އެމްޕީއެލްއިން ވަނީ ހާއްސަ ވެބްސައިޓެއްވެސް ހަދާފަ އެވެ.