މި އޮތީ ތާސްބައި އެއްކޮށް ހުސް "ބިބީ"، އަޅެ ޝައުގުވެރިއެއް ނޫންތަ!

ރާއްޖޭގެ އެންމެ ކާމިޔާބު ފިލްމު ސްޓޫޑިއޯ -- ޑާކްރެއިން އެެންޓަމައިންޓްގެ އާ ފިލްމް "ބިބީ" ގެ ކާސްޓުންގެ ޕޯސްޓަރުތަކެއް އާންމުކޮށްފި އެވެ. 

އޮކްޓޫބަރު ހަތްވަނަ ދުވަހު ސިނަމާއަށް ގެންނަން ހަމަޖެހިފައިވާ މި ފިލްމަކީ ހޮރޯ-ކޮމެޑީ އެކެވެ. ފަސްޓްލޫކުން ފެނިގެން ދަނީ ބިރުވެރި ކަމެވެ. އޭގެ ފަހަތުގައި ފޮރުވިފައިވާ ހެއްވާ/ މަޖާ ކަންތައްތަކަކީ ކޮބައިކަން ބަލައިލަން ޖެހެނީ އިންތިޒާރު ކޮށްލާށެވެ. 

ދެން ފެނުނީ އޮފިޝަލް ޕޯސްޓަރެވެ. ފިލްމަށް އިތުރަށް ޝައުގުވެރި ކުރުވާނެ އެވެ. ފިލްމުގެ ކެރެކްޓާތައް ފެންނަނީ ވަރަށް ތަފާތު ކޮށެވެ. ބިރުގަންނަވާލާނެ ކަން ގައިމެވެ. ހެއްވާ ލާނެ ކަން ވެސް ކަށަވަރެވެ. ތަފާތު ސްކްރީންޕްލޭ އަކަށް ވާނެ ކަމީ ވެސް ޔަގީން ކަމެކެވެ.

ޑާކްރެއިން މިއަދު ވަނީ "ބިބީ" ގެ ކާސްޓުންގެ ޕޯސްޓަރުތަކެއް އާންމުކޮށްފަ އެވެ. އެ ޕޯސްޓަރުތަކާ އެކު ވެސް ފިލްމަށް އޮތް ޝައުގުވެރިކަން އިތުރަށް ވަނީ ބޮޑުވެފަ އެވެ. ކޮންމެ ޕޯސްޓަރެއް ގައި ތަފާތު ދެ ލުކެއް ފެނެ އެވެ. 

ފިލްމުގެ ޝޫޓިން މުޅީން ނިމި މިވަގުތު ކުރަމުން ދަނީ ޕޯސްޓް-ޕްރޮޑަކްޝަންގެ މަސައްކަތްތަކެވެ. ޑާކްރެއިންގެ ފެންވަރު ގައި ފިލްމު ބެލުންތެރީންނަށް ގެނެސް ދިނުމުގެ މަސައްކަތެވެ.

ޒުވާން ރޭޑިއޯ / ޓީވީ ހުށައެޅުންތެރިޔާ އަދި ކުޅަދާނަ ވާހަކަ ލިޔުންތެރިޔާ ޝަހުދާ މަހުމޫދުގެ ސްކްރީންޕްލޭ އަކަށް މި ފިލްމު ޑައިރެކްޓް ކޮށްފައި ވަނީ ވެސް އޭނާ އެވެ. މިއީ ޝަހުދާގެ ފުރަތަމަ ފީޗާ ފިލްމެވެ.

ފިލްމުގެ ލީޑް ތަރީންނަކީ ޝަރަފު އަބްދުﷲ އާއި މަރިޔަމް މަޖުދާ އެވެ. މީގެ އިތުރުން ޝީލާ ނަޖީބާއި އަހްމަދު ސައީދު އާއި ފުބޫ ފަދަ ތަރީން ވެސް މުހިންމު ރޯލުތަކުން ފެނިގެންދާނެ އެވެ. ހާއްސަ ރޯލަކުން އިސްމާއީލް ވަޖީހު ވެސް ފެންނާނެ އެވެ.