ރާއްޖޭން ޑީޕޯޓް ކޮށްލުމުން އިމިގްރޭޝަނާ ދެކޮޅަށް ކޯޓަށް

މޯލްޑިވްސް އިމިގްރޭޝަނުން ރާއްޖެ ނާދެވޭ ގޮތަށް ޑީޕޯޓް ކޮށްލި ބިދޭސީ މީހަކު ސިވިލް ކޯޓަށް މައްސަލައެއް ހުށަހަޅައިފި އެވެ.

ދިވެއްސަކާ ކައިވެނި ކޮށްގެން އުޅޭ ސްރީ ލަންކާގެ ރައްޔިތެއް ކަމަށްތާ އެންތެނީ ވަރެން ނަދިޝް ޕެރޭރާ ރާއްޖޭން ޑީޕޯޓް ކޮށްލާފައި ވަނީ މިދިޔަ މޭމަހުގެ ފަސް ވަނަ ދުވަހު އެވެ. އޭނާ ޑީޕޯޓް ކޮށްލާފައި ވަނީ ދެ ދުވަހު އިމިގްރޭޝަންގެ ޑިޓެންޝަން ސެންޓަރުގައި ބެހެއްޓުމަށްފަހު އެވެ.

އެންތެނީގެ ފަރާތުން ސިވިލް ކޯޓަށް ހުށަހަޅާފައިވާ މައްސަލައިން އެނގޭ ގޮތުގައި، ޑީޕޯޓް ކޮށްލި ފަހުން މޭ މަހުގެ 24 ވަނަ ދުވަހު ޓޫރިސްޓު ވިސާގައި އޭނާ ރައްޖެ އެތެރެވާން މަސައްކަތް ކޮށްފައިވެ އެވެ. އަލުން ރާއްޖެ އެތެރެވާން މަސައްކަތް ކޮށްފައި ވަނީ، އޭނާ ބުނާ ގޮތުގައި ޑީޕޯޓް ކުރި ކަމުގެ ލިޔުން ނުވަތަ ބްލެކް ލިސްޓު ކުރި ކަމުގެ ލިޔުން އިމިގްރޭޝަނުން ދީފައި ނުވާތީ އެވެ. 

ނަމަވެސް އިމިގްރޭޝަނުން ވަނީ އޭނާ އެތެރެވިޔަ ނުދީ އަލުން ފޮނުވާލާފަ އެވެ. ސިވިލް ކޯޓަށް އޭނާ ހުށަހަޅާފައި ވަނީ ރާއްޖެ އެތެރެވިޔަ ނުދީ ހިފެހެއްޓި ނިންމުން ރިވިއުކުރަން، ޖުޑިޝަލް ރިވިއު މައްސަލައެކެވެ. 

މި މައްސަލަ ބެލުމުގެ އިހުތިސޯސް ސިވިލް ކޯޓަށް ލިބިގެން ނުވާ ކަމަށް ބުނެ އިމިގްރޭޝަންގެ ފަރާތުން ވަނީ އިއުތިރާޒުކޮށްފަ އެވެ. ނަމަވެސް އިމިގްރޭޝަންގެ އިއުތިރާޒު ބަލައިނުގަނެ، މައުލޫއީ މައްސަލަ ކުރިއަށް ގެންދިއުމަށް ކޯޓުން ވަނީ އިއްޔެ ނިންމާފަ އެވެ.

އިމިގްރޭޝަނުން އެ މީހާ ޑީޕޯޓް ކޮށްލާފައި ވަނީ ގަވާއިދާ ހިލާފަށް އުޅޭ ބިދޭސީން ހޯދައި، ޑީޕޯޓް ކުރުމަށް ފަށާފައިވާ އޮޕަރޭޝަނުގެ ތެރެއިންނެވެ. 

އިމިގްރޭޝަން އޮފިސަރުން ދަނީ ބިދޭސީން އުޅޭ ތަންތަނަށް ވަދެ، ގަވާއިދާ ހިލާފަށް އުޅޭ މީހުން އެ އިދާރާގެ ބެލުމުގެ ދަށަށް ގެންދަމުންނެވެ. އެފަދަ ތަންތަން ބަލައިފާސްކޮށް، ގަވާއިދާ ހިލާފަށް ބިދޭސީން ހިންގާ ވިޔަފާރިތައް ވެސް ދަނީ ބަންދު ކުރަމުންނެވެ. އެހެންކަމުން ބިދޭސީންނަށް އެކަމުގެ އެލާޓް ލިބިފައިވާއިރު، ސްކޭމަރުން ދަނީ އެކަމުގެ ނާޖައިޒު ފައިސާ ނަގަމުންނެވެ.