"ސީޑްސް ފޯ ދަ ފިއުޗާ" ޕްރޮގުރާމަށް ހޮވުނު ދަރިވަރުންނަށް ލިޔުން ހަވާލުކޮށްފި

ހުއާވޭ ކުންފުނިން އައިސީޓީ ދާއިރާގައި ޒުވާނުން ބިނާކުރުމަށް ހިންގާ، "ސީޑްސް ފޯ ދަ ފިއުޗާ" ޕްރޮގްރާމަކީ ދިވެހި ދަރިވަރުންނަށް އައިސީޓީ ދާއިރާގެ ޢަމަލީ ތަޖުރިބާ ފުޅާގޮތެއްގައި ލިބިގެންދާނެ ޕްރޮގްރާމެއްކަމަށް މިނިސްޓަރ އޮފް ހަޔާ އެޑިޔުކޭޝަން ލޭބާ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މާރިޔާ ވިދާޅުވެއްޖެ އެވެ.

ޑރ. މާރިޔާ މިހެންވިދާޅުވީ ހުވާއޭއިން އައިޓީސީ ދާއިރާއިން މީހުންބިނާކުރުމަށް ހިންގާ "ސީޑްސް ފޯ ދަ ފިއުޗާ" ޕްރޮގްރާމަށް ރާއްޖެއިން ހޮވުނު ކުދިންނަށް ލިޔުން ހަވާލުކުރުމަށް ބޭއްވި ރަސްމިއްޔާތުގަ އެވެ.

"މިއީ ދިވެހި ދަރިވަރުންނަށް ލިބުނު ރަނުގެ ފުރުސަތެއް. މި ޕްރޮގްރާމްގެ ތެރެއިން ދަރިވަރުންނަށް ފުޅާދާއިރާއެއްގައި އަމަލީ ތަޖުރިބާ ލިބިގެންދާއިރު، މީގެތެރެއިން ދުނިޔޭގެ އެކި ކަންކޮޅުތަކުގައި މި ދާއިރާގެ ފުންނާބުއިސް ބޭފުޅުންނާއި ބައްދަލުވުމުގެ އިތުރުން ތަފާތު ސަގާފަތްތަކަށް އަހުލުވެރިވުމަށް ލިބޭ ފުރުސަތެއް." އޭނާ ވިދާޅުވިއެވެ.

ޑރ. މާރިޔާ ވިދާޅުވީ 2023 ވަނަ އަހަރުން ފެށިގެން ކުރިއަށްދާ މި އެއްބަސްވުމުގެ ފައިދާ ރާއްޖޭގެ އެތަށް ޖީލަކަށް ލިބިގެން ދާނެ ކަމަށެވެ. އަދި 21 ވަނަ ގަރުނަށް ބޭނުންވާ ހުނަރާއި ގާބިލްކަން ހުރި ޒުވާން ޖީލުތަކެއް ބިނާކުރުމުގެ މި މަސައްކަތުގައި، މަތީ ތައުލީމާއި ތަމްރީނު ހާސިލުކުރުމަށް ދަތުރު ފަށާ ހަތަރު ދިވެހި ދަރިވަރުންނާ މެދު ފަހުރުވެރިވާ ކަމަށް ވެސް ވިދާޅުވި އެވެ.