އެކި ގައުމުތަކަށް މަސްތުވާތަކެތި ފޯރުކޮށްދޭ ދެ މީހަކު އަތުލައިގަނެފި

ރާއްޖެ މެދުވެރިކޮށް ދުނިޔޭގެ އެކި ގައުމުތަކށް މަސްތުވާތަކެތި ފޯރުކޮށްދެމުން އައި މެލޭޝިޔާއަށް ނިސްބަތްވާ ދެ މީހަކު ފުލުހުން އަތުލައިގަނެފި އެވެ. 

ފުލުހުން ބުނި ގޮތުގައި މި ދެ މީހުން އަތުލައިގަތީ ވައިގެ މަގުން ރާއްޖެއަށް އެތެރެކުރަން އުޅުނު މަސްތުވާތަކެތީގެ ޝިޕްމެންޓެއް ހުއްޓުވައި ފުލުހުން ހިންގި ކޮންޓްރޯލްޑް ޑެލިވެރީ އޮޕަރޭޝަނެއްގެ ތެރެއިންނެވެ. 

27 ޖުލައިގައި ރާއްޖެއަށް އައި މެލޭޝިޔާ މީހެއްގެ ލަގޭޖުގައި މަސްތުވާތަކެތި ހުރިކަމަށް ޝައްކު ކުރެވިގެން ކަސްޓަމްސްއިން ލަގޭޖު ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ލަގޭޖުން ފެނުމާ ގުޅިގެން، ކަސްޓަމާއި ފުލުހުން ގުޅިގެން ކޮންޓްރޯލްޑް ޑެލިވަރީ އޮޕަރޭޝަނެއް ހިންގި އެވެ. 

އެ އޮޕަރޭޝަނުގެ ތެރެއިން އެމީހުން މުއާމަލާތް ކުރަމުންދިޔައީ ވީޗެޓް މެދުވެރިކޮށް ހަތް މީހަކު ހިމެނޭ ގުރޫޕެއްގައި ކަން ފުލުހުންނަށް ފާހަގަކުރެވުނެވެ. އަދި އެ މަސްތުވާތަކެތި ބަލައި އިތުރު މީހަކު އަންނާނެކަން އެ ގުރޫޕުގައި ކުރެވުނު މުއާމަލާތްތަކުން ފާހަގަކުރެވުނު ކަމަށް ފުލުހުން ބުންޏެވެ.

ފުލުހުން ބުނެފައިވަނީ ފުލުހުންގެ ތަހުގީގުތަކަށް މި މީހުންނަކީ ދުނިޔޭގެ އެކި ގައުމުތަކަށް މަސްތުވާތަކެތި ފޯރުކޮށްދިނުމުގައި އުޅޭ ބައެއްކަން އެނގުނު ކަމަށެވެ. އެގޮތުން މި މައްސަލާގައި ހިމެނޭ 13 ކިލޯގެ ކެނަބިސްގެ ޕެކިން ބަދަލުކުރުމަށްފަހު އިނގިރޭސިވިލާތަށް ބޭރުކުރަން ރާވާފައިވާކަން ތަހުގީގަށް ދެނެގަނެވުނު ކަމަށް ފުލުހުން ބުންޏެވެ. 

ފުލުހުން އިތުރަށް ބުނީ އެ މައްސަލާގައި ހިމެނޭ އިތުރު ފަރާތްތަކާ ގުޅޭ މައްސަލަތައް އެމީހުން ނިސްބަތްވާ ގައުމުތަކުގެ ގާނޫނު ތަންފީޒުކުރާަ ފަރަތްތަކާ ގުޅިގެން ބަލަމުންދާ ކަމަށާއި، އެ މައްސަލަ ބެލުމުގައި އިންޓަޕޯލުގެ އެހީތެރިކަން ފުލުހުން ހޯދަމުންދާ ކަމަށް އެ އިދާރާއިން ބުނެފައިވެ އެވެ. 

މި މައްސަލާގައި ފުލުހުންގެ ބެލުމުގެ ދަށަށް ގެންގޮސްފައިވަނީ މެލޭޝިޔާއަށް ނިސްބަތްވާ ދެ މީހުންނެވެ. އެކަކީ މަސްތުވާތަކެތި ހިފައިގެން ރާއްޖެއަށް އައި މީހާ އެވެ. ދެވަނަ މީހަކީ އެތަކެއްޗާ ހަވާލުވާން ދިޔަ މީހާ އެވެ. އޭނާ އެތަކެއްޗާ ހަވާލުވާން އުޅުނީ އެތަކެތި ނެގުމަށްފަހު ޕެކިން ބަދަލުކުރުމަށެވެ.