ސަލްމާން މިސްކިތުގައި އިސްލާމީ ލައިބްރަރީއެއް ހަދަނީ، ރަށްރަށުގައި ވެސް ގާއިމް ކުރާނެ

ކިންގް ސަލްމާން މިނިސްކިތުގައި އަންނަ ޖެނުވަރީ މަހު އިސްލާމީ ލައިބްރަރީއެއް ހުޅުވަން ހަމަޖެހިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓްރީގެ މަސައްކަތްތަކާ ގުޅޭ ގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ މީގެ ކުރިން އިސްލާމީ މަރުކަޒުގައި ވެސް ލައިބްރަރީއެއް ހުރި ކަމަށެވެ. ނަމަވެސް އެތަން ބަންދުކޮށް، ފޮތްތައް ހުރީ ގުދަން ކޮށްފަ އެވެ.

"ރާއްޖޭގެ އެކި ކަންކޮޅުތަކުގަ ގާއިމްވެފަ ހުރި އިސްލާމީ އެކިއެކި މަރުކަޒުތަކުގަ ލައިބްރަރީތައް ގާއިމް ކުރަން ވަނީ ނިންމާފަ. މިތަންތަން މިހާރު ހުރީ ހުހަށް. މިދިޔަ ދުވަސްތަކުގަ އިސްލާމީ ސެންޓަރުތަކުގަ ދިވެހިރާއްޖޭގެ އިސްލާމީ ޔުނިވާސިޓީގެ ތައުލީމީ މަތީ ޕްރޮގްރާމްތައް ހިންގުމަށް ހަވާލު ކޮށްފަ ވާނެ، އެކަންތައްތައް އެބަ ކުރިއަށް ދޭ، އެޔާއެކު އެތަންތަނުގަ އިސްލާމިކް މިނިސްޓްރީގެ ފަރާތުން އިންޝާﷲ ލައިބްރަރީތައް ގާއިމް ކުރާނެ،" މިނިސްޓަރު ވިދާޅުވި އެވެ.

އިސްލާމީ ފޮތްތަކަށް ފަސޭހައިން ވާސިލް ވެވޭނެހެން ސަލްމާން މިސްކިތުގެ އިތުރުން ރާއްޖޭގެ ފަސް ރަށެއްގައި މިފަދަ ލައިބްރަރީތައް ގާއިމް ކުރަން ހަމަޖެހިފައިވާ ކަމަށް މިނިސްޓަރު ވިދާޅުވި އެވެ. އެއީ ގދ. ތިނަދޫ އާއި ހއ. ދިއްދޫ އާއި އައްޑޫ ސިޓީ، ފުވައްމުލަކު ސިޓީގެ އިތުރު ރ. އުނގޫފާރުގަ އެވެ. މި ލައިބްރަރީތައް ގާއިމް ކުރަން ހަމަޖެހިފައި ވަނީ؛

މިނިސްޓަރު ވިދާޅުވީ އަންނަ އަހަރު ނިމޭއިރު މިހުރިހާ ތަނެއްގައި ލައިބްރަރީ ގާއިމް ކުރެވިގެންދާނެ ކަމަށެވެ.

އޭގެ އިތުރުން އިސްލާމިކް މިނިސްޓްރީގެ ވެބްސައިޓުގައި ޑިޖިޓަލް ލައިބްރަރީއެއް ވެސް މިހާރު ގާއިމްކޮށްފައިވާ ކަމަށް މިނިސްޓަރު ވިދާޅުވި އެވެ. މި ލައިބްރަރީގައި 81 ފޮތް ހިމަނާފައިވާއިރު، މިއަހަރު އަލަށް ހަތް ފޮތް އިތުރުކޮށްފައިވާ ކަމަށް މިނިސްޓަރު ވިދާޅުވި އެވެ. ކޮންމެ އަހަރަކު އާ ފަސް ފޮތް ހިމެނުމަކީ އަމާޒެއް ކަމަށް ވެސް ވިދާޅުވި އެވެ.

ޑިޖިޓަލް ލައިބްރަރީގައި ހުރި ފޮތްތައް ހިލޭ ޑައުންލޯޑް ކުރެވޭނެ އެވެ. މިނިސްޓަރު ވިދާޅުވީ އިސްލާމީ ދާއިރާތަކުން ކިޔަވާ ދަރިވަރުންނާއި ދިރާސާ ކުރާ ފަރާތްތަކަށް މީގެ ސަބަބުން ވަރަށް ބޮޑަށް ފަސޭހަވެގެން ދާނެ ކަމަށެވެ.

އޭގެ އިތުރުން، ދިވެހި ބަހަށް ދީނީ ފޮތް ސެޓެއް ތަރުޖަމާ ކުރުމުގެ މަޝްރޫއެއް ހިންގާ ކަމަށް ވެސް މިނިސްޓަރު ވިދާޅުވި އެވެ. މިއީ ދެ މިލިއަނުގެ ޕްރޮޖެކްޓެކެވެ. ހިލޭ ސާބަހަށް ވެސް ބައެއް ބޭފުޅުން ފޮތްތައް ތަރުޖަމާ ކޮށްދިނުމުގެ މަސައްކަތް ކޮށްދެއްވާކަން ވެސް މިނިސްޓަރު ފާހަގަކުރެއްވި އެވެ. އަންނަ އަހަރު މި ފޮތް ސެޓު ދިވެހި ބަހުން ލޯންޗު ކުރެވޭނެ ކަމަށް ވެސް ވިދާޅުވި އެވެ.

މިހުރިހާ ކަމަކީ ރައީސްގެ މެނިފެސްޓޯގެ ދަށުން، އެމަނިކުފާނުގެ އިރުޝާދުގެ ދަށުން ކުރައްވަމުން ގެންދަވާ ކަންކަން ކަމަށް ވެސް މިނިސްޓަރު ވިދާޅުވި އެވެ.