ތިނަދޫ މަގު ހެދުމުގެ ދެވަނަ ފިޔަވަހި ނިންމާލައިފި

ގދ.ތިނަދޫގެ މަގުތަައް ޒަމާނީ ފެންވަރަށް ތަރައްގީކުރުމަށް ރޯޑް ޑިވެލޮޕްމެންޓު ކޯޕަރޭޝަނުން ހިންގި މަޝްރޫއު ނިންމާލައިފި އެވެ. 

ފާއިތުވި އެމްޑީޕީ ސަރުކާރުގައި 2022 ވަނަ އަހަރު ފެށި މި މަޝްރޫއަކީ 78.8 މިލިއަން ރުފިޔާ ހަރަދުކޮށްގެން އާރުޑީސީއާ ހަވާލުކޮށްގެން ހިންގި މަޝްރޫއެކެވެ. 

އެ މަޝްރޫއުގެ ދަށުން ހުވަދު އަތޮޅުގެ އެންމެ އާބާދީ ބޮޑު ތިނަދޫގެ 19 މަގެއްގައި 7.8 ކިލޯ މީޓަަރުގެ ސަރަހައްދެއްގައި ތާރު އަޅާފައިވެ އެވެ. 

އާރްޑީސީން ތިނަދޫ މަގު ހެދުމުގެ މަޝްރޫއު ކުރިއަށް ގެންދިޔައީ ކޮންޓްރެކްޓު މުވައްޒަފުންގެ ގޮތުގައި އެ ރަށުން ޖުމްލަ 64 މީހަކު ވަޒީފާއަށް ނަގައިގެންނެވެ. 

އެންމެ ފުރަތަމަ ތިނަދޫގެ މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތް ކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގައި އެއިރުގެ ހައުސިން މިނިސްޓަރު އަދި މިހާރު ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ބެއްލެވުމުގެ ދަށުންނެވެ. 

އެ ސަރުކާރުގައި މާލެއިން ބޭރުގައި އެއް ރަށެއްގައި އުމްރާނީ ތަރައްގީގެ އެންމެ ގިނަ މަޝްރޫއުތައް ހިންގާފައިވާ އެއް ރަށަކީ ތިނަދޫ އެވެ. 

އެގޮތުން ތިނަދޫގެ ބިން ހިއްކުމާއި، އެރަށުގައި މިއުޒިއަމެއް ބިނާކުރުމާއި އިސްލާމީ މަރުކަޒެއް ގާއިމުކުރުން ފަދަ މުހިއްމު ތަރައްގީގެ މަޝްރޫއުތައް ހިންގާފައިވެ އެވެ.