ދެ ދުވަހުން މަސައްކަތް ނިންމައި ކުންފުނީގެ ބިލު ފާސްކޮށްފި
އެ ބިލާ ގުޅޭ ބަހުސް އިއްޔެ މަޖިލީހުގައި ހިންގުމަށްފަހު އިގުތިސާދީ ކޮމިޓީއަށް ފޮނުވައި ކޮމިޓީން ބިލު ފާސްކުރަން ފެންނަކަމަށް އިއްޔެ ކަނޑައެޅި އެވެ. އަދި މިއަދު މަޖިލީހުގެ އިއްތިފާގުން އެ އިސްލާޙު ފާސްކޮށްފައިވެ އެވެ.
ދެ ދުވަހުން ކުންފުނީގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށަހެޅި ބިލުގެ މަސައްކަތް ނިންމައި ރައްޔިތުންގެ މަޖިލީހުން އެ ބިލު ފާސްކޮށްފި އެވެ.
ސަރުކާރުގެ ފަރާތުން ހުށަހެޅި ބިލަކީ މިހާރު އަމަލުކުރަމުންދާ ކުންފުނީގެ ގާނޫނުގައި ހުރި ބައެއް މާއްދާތައް އިސްލާހުކޮށް، އެ ގާނޫނުގެ ދަށުން ލާޒިމުކުރާ ބައެއް ކަންކަން ކުރުމަށް ކަނޑައަޅާފައިވާ މުއްދަތުތައް ކުރު ކުރުމަށް ސަރުކާރުގެ ފަރާތުން ހުށަހެޅި އިސްލާހެކެވެ.
އެގޮތުން ކުންފުނިތަކުގެ އާންމު ޖަލްސާ ބާއްވަންޖެހޭ މުއްދަތު ޖަލްސަ ބޭއްވުމަށް އެދޭތާ ތިން ދުވަހުގެ ތެރޭގައި ޖަލްސާއަށް ދައުވަތު ދީ 10 ދުވަހުގެ ތެރޭގައި ޖަލްސާަ ބާއްވަަން ވާނެ ކަމަށެވެ. އަދި ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ ހަތް ދުވަސްކުރިން ނޯޓިސް ފޮނުވާ ގޮތަށް ގާނޫނު އިސްލާހުކޮށްފައިވެ އެވެ.
އޭގެ އިތުރަށް ކުންފުނީގެ މެނޭޖިން ޑިރެކްޓަރެއް ނެތް ހާލަތުގައި ނުވަތަ ކުންފުނީގެ ޑިރެކްޓަރުންގެ ބޯޑުގެ މެންބަރުންގެ އަދަދު ކަނޑައެޅިފައިވާ އަދަދަށްވުރެ މަދުވެއްޖެނަމަ، ބޯޑަށް މެންބަރުން އަދި އެމްޑީ އައްޔަންކުރަން އަންގާތާ ދިހަ ދުވަހުގެ ތެރޭގައި އެމްޑީ އަދި ބޯޑުގެ މެންބަރުން އައްޔަންކުރަންޖެހޭނެ ކަމަށެވެ.
މި އިސްލާހު މަޖިލީހަށް ހުށަހެޅީ 11 ސެޕްޓެންބަރުގަ އެވެ. އެ ބިލާ ގުޅޭ ބަހުސް އިއްޔެ މަޖިލީހުގައި ހިންގުމަށްފަހު އިގުތިސާދީ ކޮމިޓީއަށް ފޮނުވައި ކޮމިޓީން ބިލު ފާސްކުރަން ފެންނަކަމަށް އިއްޔެ ކަނޑައެޅި އެވެ. އަދި މިއަދު މަޖިލީހުގައި ނެގި ވޯޓުގައި ހުރިހާ މެންބަރުންގެ އިއްތިފާގުން އެ އިސްލާޙު ފާސްކޮށްފައިވެ އެވެ.
ކޮމެންޓް
Republic of Maldives