އިމިގްރޭޝަން އޮފިސަރުންގެ ނަމުގައި ބިދޭސީން އަތުން ފޭރެން ފަށައިފި

ގަވާއިދާ ހިލާފަށް އުޅޭ ބިދޭސީން ހޯދުމަށް މޯލްޑިވްސް އިމިގްރޭޝަނުން ކުރަމުންދާ މަސައްކަތުގެ ފައިދާ ނަގައިގެން، އިމިގްރޭޝަން އޮފިސަރުން ކަމަށް ބުނެ ބިދޭސީން އަތުން ފައިސާ ފޭރެން ފަށައިފި އެވެ.

ފުލުހުން މިއަދު ބުނީ އިމިގްރޭޝަންގެ އޮފިސަރުންގެ ނަމުގައި ބިދޭސީން ދިރިއުޅޭ ތަނަކަށް ތިން މީހަކު ވަދެ، އިއްޔެ ބަންގްލަދޭޝް މީހަކު އަތުން ފޭރިފައިވާ ކަމަށެވެ.

އެގޮތުން ބިދޭސީ މީހާ އަތުން ފޯނަކާއި 9000 ރުފިފާ ފޭރިގެންފައިވެ އެވެ. ފުލުހުން ބުނީ މި މައްސަލައާ ގުޅިގެން ބ. ބެރުގެ، މުހައްމަދު ނަވީން (44އ) ހައްޔަރުކޮށްފައިވާ ކަމަށެވެ. މި މައްސަލަ ފުލުހުން ދަނީ ތަހުގީގު ކުރަމުންނެވެ. 

އިމިގްރޭޝަން އޮފިސަރުންނަށް ކަމަށް ހެދިގެން ސްކޭމް ކޯލްތަކެއް ވެސް ދަނީ ކުރަމުންނެވެ. އެގޮތުން، ވަޓްސްއެޕް މެދުވެރިކޮށް ރާއްޖެއިން ބޭރު ގައުމެއްގެ ނަންބަރުން އަންނަ ވީޑިއޯ ކޯލްތަކެއްގައި އިމިގްރޭޝަން ޔުނިފޯމް އާއި ވައްތަރު ޔުނިފޯމެއް އަޅައިގެން ތިބޭ ބަޔަކު، އާންމުންނަށް ގުޅައި އެމީހުންގެ ޒާތީ މައުލޫމާތާއި، ބޭންކު ކާޑުގެ މައުލޫމާތު ދަނީ ހޯދަމުންނެވެ.

އެހެންކަމުން އެކަންކަމަށް ސަމާލުވާން އިމިގްރޭޝަނުން ވެސް ވަނީ އެދިފަ އެވެ.

އިމިގްރޭޝަން އޮފިސަރުން ދަނީ ބިދޭސީން އުޅޭ ތަންތަނަށް ވަދެ، ގަވާއިދާ ހިލާފަށް އުޅޭ މީހުން އެ އިދާރާގެ ބެލުމުގެ ދަށަށް ގެންދަމުންނެވެ. އެފަދަ ތަންތަން ބަލައިފާސްކޮށް، ގަވާއިދާ ހިލާފަށް ބިދޭސީން ހިންގާ ވިޔަފާރިތައް ވެސް ދަނީ ބަންދު ކުރަމުންނެވެ. އެހެންކަމުން ބިދޭސީންނަށް އެކަމުގެ އެލާޓް ލިބިފައިވާއިރު، ސްކޭމަރުން ދަނީ އެކަމުގެ ނާޖައިޒު ފައިސާ ނަގަމުންނެވެ.