ޓިޗަރަށް ބިރު ދެއްކި މީހާގެ މައްސަލަ ޕީޖީ އޮފީހަށް ހުށަހަޅައިފި

މާލޭގެ ސްކޫލަކަށްވަދެ ޓީޗަރަކަށް ބިރުދެއްކި މައްސަލައިގައި ހައްޔަރުކުރި މީހާއަށް ދައުވާ ކުރުމަށް ޕްރޮސެކިއުޓާ އޮފީހަށް މައްސަލަ ހުށަހަޅައިފިއެވެ.

މި މައްސަލަ އާއި ގުޅިގެން ހައްޔަރުކޮށްފައިވަނީ މއ. ކަނޑޫގެ، އަހުމަދު އަލީ 27އ، އެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ކުރިމިނަލް ކޯޓުން އެންމެ ފުރަތަމަ އޭނާގެ ބަންދަށް 10 ދުވަސްޖެހިއެވެ. އެ މމުއްދަތު ހަމަވެގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ވަނީ އިތުރު 15 ދުވަސް ބަންދަށް ޖަހާފައެވެ.

އޭނާ ސްކޫލަށް ވަދެ ޓީޗަރަށް ބިރު ދެއްކީ ކިޔަވައިދޭން ކުލާސްރޫމުގައި ހުއްޓައި ދަރިވަރުންގެ ކުރިމަތީގަ އެވެ. މިކަމުގެ ސަބަބުން ދަރިވަރުންނަށްވެސް ނަފުސާނީގޮތުން ވަނީ އަސަރުކޮށްފަ އެވެ.

ބަންދު އަމުރުގައިވާ ގޮތުން އޭނާ އާއި ދެކޮޅަށް ޓިޗަރާއި ދަރިވަރުންވެސް ވަނީ ބަޔާންދީފަ އެވެ. 

އަމުރުގައިވާގޮތުން އޭނާ ވަނީ މިކަމަށް އެއްބަސްވެ، އޭނާ އަށް އެކަން ކުރެވުނީ ޖަޒުބާތުގައި ޖެހިގެން ކަމަށާއި އެކަމާ ދެރަވާ ކަމަށް ބުނެ މައާފަށްވެސް އެދިފަ އެވެ. 

މި މައްސަލަ ފުލުހުން ވަނީ މިހާރު ޕީޖީ އޮފީހަށް ހުށަހަޅާފައެވެ. އެހެން ކަމުން އެ އޮފީހުން ދައުވާ ކުރުމާމެދު ގޮތެއް ނިންމައި ކޯޓަށް މައްސަލަ ހުށަހެޅުމުން އޭނާ ޝަރީއަތް ނިމެންދެން ބަންދު ކުރުމަކީ އެންމެ އެދެވޭ ގޮތް ކަމަށސް އަމުރުގައި ވަނީ ފާހަގަކޮށްފަ އެވެ.

މި މައްސަލައިގައި ހައްޔަރު ކުރި މީހާ އަކީ ވަރަށް ގިނަ ކުށުގެ ރެކޯޑު އޮތް މީހެއް ކަމަށާއި ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވާނެ ކަމަށް ކުރިމިނިލް ކޯޓުގެ ގާޒީ އައިޝަތު ނުޒުހާ ވަނީ ކަނޑައަޅުއްވާފަ އެވެ.