އުދަބާނީގެ އާ ޓްރެއިލާ؛ މިއީ މި އަހަރު ފެންނާނެ އެންމެ ރީތި އެއް ފިލްމު

ހާމިދު އަލީ ޕްރޮޑިއުސްކޮށް، ކުޅަދާނަ ޑައިރެކްޓަރު އަމްޖަދު އިބްރާހީމް (އަމްޖޭ) ޑައިރެކްޓް ކޮށްފައިވާ "އުދަބާނީ -2" ގެ އިތުރު ޓްރެއިލާ އެއް ދައްކާލާއިފި އެވެ. 

ސެޕްޓެންބަރު 19 ވަނަ ދުވަހު އޮލިމްޕަހުގައި ދައްކަން ފަށާ މި ފިލްމުގެ ދެވަނަ ޓްރެއިލާއާ އެކު ފިލްމަށް ކުރެވޭ އިންތިޒާރު އިތުރު ކުރުވަ އެވެ. މިއީ ވަރަށް ރީތި ފިލްމަކަށް ވާނެ ކަމަށް ބެލެވެ އެވެ.

ހާމިދުއާ އަމްޖޭ ވެސް ބުނީ ފުރަތަމަ ބަޔަށް ވުރެ ހުރިހާ ގޮތަކުން ވެސް މި ފަހަރުގެ ބައި ފުރިހަަމަ ވާނެ ކަމަށެވެ. ފިލްމުގެ ޓީޒާ އާ މިހާތަނަށް އާންމުކުރި ޓްރެއިލާ އިން ވެސް އެކަން ބުނެ އެވެ.

ޅަދާނަ ވާހަކަ ލިޔުންތެރިޔާ މުހައްމަދު ގާސިމް ލިޔެފައިވާ މި ވާހަކަ އަކީ ދިވެހީންގެ މެދުގައި ވަރަށް މަގުބޫލު ވެގެން ދިޔަ ވާހަކަ އެވެ. ފިލްމުގެ ފުރަތަމަ ބައިގައި މުހިންމު ރޯލުތަކުން ފެނިގެން ދިޔައީ ޔޫސުފް ޝަފީއު (ޔޫއްޕެ) އާއި އާމިރާ އަދި ހާމިދު އަލީ އެވެ.

ފިލްމުގެ މައިގަނޑު ތިން ކެރެކްޓާ އަކީ ލަތާފާ އާއި ލާމިއު އަދި އާދަންފުޅެވެ. މި ބައިގައި ލާމިއުގެ ބައި އަދާކޮށްދީފައި ވަނީ ކުޅަދާނަ އެކްޓަރު އަހްމަދު އީސަ (އާނަންދު) އެެވެ. ލަތާފާގެ ބައި އައިމިނަތު ޝުހާ އެވެ. އަދި އާދަންފުޅުގެ ބައި ހާމިދު އަލީ އެވެ. މީގެ އިތުރުން ނަތާސާ، އަލީ އާޒިމް (ދޮން އައްޔަ) އަލީ ޝަމީލް، މަރިޔަމް ޝަކީލާ، ވަހީދު، ސަހާ، މަރިޔަމް ހަލީމް، އަލީ ފާރޫގު ވެސް މުހިންމު ރޯލުތަކުން ފެނިގެންދާނެ އެވެ.

ފިލްމުގެ މަންޒަރުތައް ނަގާފައި ވަނީ ރ. މާކުރަތުގަ އެވެ.

މި ފިލްމުގެ ފުރަތަމަ ދެ ޝޯގެ ޓިކެޓް މިހާރު ވަނީ ވިކި ހުސްވެފަ އެވެ. އުދަބާނީ އެކަކީ މިހާތަނަށް އުފެއްދި އެންމެ ވިޔަފާރި ރަނގަޅު ފިލްމެވެ. އޮލިމްޕަހު ގައި ހުރިހާ ޝޯއެއް ދެއްކީ ހައުސްފުލް ކޮށެވެ. އަދި ރާއްޖޭގެ އެންމެ ގިނަ ރަށްރަށުގައި ދެއްކި އެއް ފިލްމަކީ ވެސް އުދަބާނީ އެވެ.

ފިލްމުގެ ޓިކެޓް މިހާރު އޮލިމްޕަހުން ދަނީ ވިއްކަމުންނެވެ.