ކުޑަކުއްޖެއް ގައިގައި ޖިންސީ ނިޔަތް އޮވެގެން އަތްލި މީހަކު 10 އަހަރަށް ޖަލަށް

ޖިންސީ ނިޔަތް އޮވެގެން ކުޑަ ކުއްޖެއްގައިގައި އަތްލި މީހަކު 10 އަހަރަށް ޖަލަށް ލުމަށް ކުރިމިނަލް ކޯޓުން ހުކުމްކޮށްފިއެވެ.

ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލަކުން އަމަލު ކުރުމުގެ ގާނޫނުގެ ދަށުން ހުކުމް ކޮށްފައިވަނީ ހދ. ނޮޅިވަރަންފަރު، ޝެހެނާޒް، މުހައްމަދު އަލީގެ މައްޗަށެވެ.

މިއީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވުމުން ހުކުމުގެ ތަފުސީލީ ރިޕޯޓު ހާމަކޮށްފައެއް ނުވެ އެވެ.

 ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ތިން ވަނަ މާއްދާގެ (ނ) ގެ ދަށުން އޭނާގެ މައްޗަށް ވަނި 10 އަހަރުގެ ޖަލު ހުކުމެއް ކޮށްފަ އެވެ.

ކުޑަކުދިންނަށް ޖިންސީ ގޯނާ ކުރާ މީހުންނާ މެދު ހާއްސަ އުސޫލުތަކުން އަމަލުކުރުމުގެ ގާނޫނުގައިވާ ގޮތުން ކުޑަކުއްޖަކާއެކު ޖިންސީ އަމަލެއް ހިންގި ކަމަށް ބެލެވެނީ ކުޑަކުއްޖެއްގެ ގައިގައި ޖިންސީ ނިޔަތެއް އޮވެގެން، ޖިންސީ ގުނަވަނެއްގައި އަތްލުމުންނެވެ. އަދި އެފަދަ އަމަލެއް ހިންގައިފިނަމަ 10 އަހަރާއި 14 އަހަރަށް ޖަލަށް ލުމަށް ހުކުމް ކުރެވެ އެވެ.