ރާއްޖެއާއި ޗައިނާގެ ފައިސާއިން މުއާމަލާތް ކުރަން ފެށުމުން މާލީ ގޮތުން ކުރިއަރާނެ: ސައިދު
ރާއްޖެއާއި ޗައިނާއިން ދެގައުމުގެ ފައިސާއިން މުއާމަލާތް ކުރަން ފެށުމުން އިގުތިސާދީ ގޮތުންނާއި މާލީ ގޮތުން ކުރިއެރުންތައް ލިބިގެންދާނެ ކަމަށް އިކޮނޮމިކް މިނިސްޓަރު މުހައްމަދު ސައިދު ވިދާޅުވެއްޖެ އެވެ.
ދިވެހި ސަރުކާރާއި ޗައިނާގެ ޕީޕަލްސް ބޭންކް (ޕީބީއޯސީއާ) ދެމެދު، ކަރަންޓް އެކައުންޓް މުއާމަލާތްތައް ދެ ގައުމުގެ ފައިސާއިން ހިންގުމަށް މަގުފަހިކޮށްދިނުމަށް އެއްބަސްވުމެއްގައި އިއްޔެ ވަނީ ސޮއިކޮށްފަ އެވެ.
މި އެއްބަސްވުމާ ގުޅޭ ގޮތުން ވާހަކަ ދައްކަވަމުން މިނިސްޓަރު ސައިދު ވިދާޅުވީ، މި އެއްބަސްވުމުން ޗައިނާ އާއި ރާއްޖޭގެ ގާތް ގުޅުން ދައްކުވައިދޭ ކަމަށެވެ. އަދި އެ އެއްބަސްވުމުން ވިޔަފާރީގެ ގޮތުންނާއި މާލީ ގޮތުން ދެ ގައުމަށް އެއްބާރުލުން ލިބިގެންދާނެ ކަމަށާއި އިގްތިސޯދީ ގުޅުންތަކަށް ބޮޑެތި ބަދަލުތަކެއް އަންނާނެ ކަމަށް ވިދާޅުވި އެވެ.
"މިއީ ރާއްޖެއަށް ތާރީހީ ބަދަލެއް ގެނެސްދޭނެ އެއްބަސްވުމެއް. މިހާރު ރާއްޖެއަށް އެންމެ ބޮޑަށް ދިމާވެފައިވާ ޑޮލަރުގެ ދަތިކަމަށްވެސް ހައްލު ލިބިގެންދާނެ. އަދި މިއީ ވިޔަފާރިވެރިންނަށް އެތަށް ގޮތަކުން ފައިދާވެ ލުއިފަސޭހަވެގެންދާނެ ކަމެއް." އޭނާ ވިދާޅުވިއެވެ.
ސައިދު ވިދާޅުވީ މިއީ ކުރު މުއްދަތެއްގެ ތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހޯއްދެވި ވަރަށް ބޮޑު ކާމިޔާބެއް ކަމަށެވެ.
ރައީސް މުއިއްޒު ވަނީ މިއަހަރުގެ ކުރީކޮޅު ޗައިނާ އަށް ރަސްމީ ދަތުރުފުޅެއް ކުރައްވާފައެވެ. މި ދަތުރުފުޅުގައި އިގުތިސާދާާއި ގުޅެ ގޮތުން ގިނަ މަޝްވަރާތަކެއް ކުރެއއްވިއެވެ. މި ދަތުރުފުޅުގައި އެމަނިކުފާނު ވަނީ އެގައުމުގެ ރައީސްއާ އެކު ގިނަ މަޝްވަރާތަކެއްވެސް ކުރައްވާފައެވެ.
ކޮމެންޓް
Republic of Maldives