ހައުސިން މިނިސްޓްރީން ކުންފުންޏަކަށް 8 ލައްކަ ރުފިޔާ ދައްކަން ޖެހިއްޖެ

ހައުސިން މިނިސްޓްރީން ކުރުވާފައިވާ މަސައްކަތެއްގެ އަގެއްގެ ގޮތުގައި ނުދައްކާ އޮތް އަށް ލައްކައަށްވުރެ ގިނަ ފައިސާ ދެއްކުމަށް ސިވިލް ކޯޓުން ހުކުމެއް ކޮށްފި އެވެ.

މި ދައުވާ ކޮށްފައި ވަނީ ކޮންޓްރެކްޓް ޕްރައިވެޓް ލިމިޓެޑް ކިޔާ ކުންފުނިން ގްރީން އޮފީސް ބިލްޑިން އިމާރާތް ކުރުމުގެ ޕްރޮޖެކްޓުގައި ކޮށްފައިވާ މަސައްކަތްތަކަށް ހައުސީން މިނިސްޓްރީން ނުދައްކާ އޮތް 818،441 ރުފިޔާ ހޯދުމަށެވެ.

މި ދައުވާ ކޮށްފައި ވަނީ ކުރީ ސަރުކާރުގައި އޭރު އޮތް މިނިސްޓްރީ އޮފް ނޭޝަނަލް ޕްލޭނިން އެންޑް އިންފްރާސްޓްރަކްޗާއާ ދެކޮޅަށެވެ. ނަމަވެސް ދައުވާ ކޮށްފައި ވަނީ މިދިޔަ މާޗް މަހުގެ 19 ވަނަ ދުވަހު އެވެ. މިހާރު އެ މިނިސްޓްރީގެ ނަން، މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމެންޓަށް ވަނީ ބަދަލުކޮށްފަ އެވެ.

ދައުވާއަށް އިންކާރުކޮށް، މިނިސްޓްރީގެ ފަރާތުން ޖަވާބުދާރީ ވެފައި ވަނީ، ދައުވާއަށް ޖަވާބު ދާރީވާން އޮތް މުއްދަތު ފަހަނަ އަޅާ ދިއުމުންނެވެ. އެހެންވެ، ކޯޓުން ވަނީ މިނިސްޓްރީގެ ޖަވާބު ބަލައި ނުގަންނަން ނިންމާފަ އެވެ.

އެހެންކަމުން، މިނިސްޓްރީން ދައުވާއަށް ވަކި ޖަވާބެއް ނުދޭ ކަމަށް ނިންމައި، ކޮންޓްރެކްޓް ޕްރައިވެޓް ލިމިޓެޑް އެދިފައިވާ ގޮތަށް 818،441 ރުފިޔާ އެކުންފުންޏަށް ދައްކަން މިނިސްޓްރީގެ މައްޗަށް ވަނީ ހުކުމްކޮށްފަ އެވެ. އެފައިސާ، ތިން މަސް ދުވަހުގެ ތެރޭގައި ދައްކަން ވަނީ އަމުރުކޮށްފަ އެވެ.

ކުރީ ސަރުކާރުން ގްރީން އޮފީސް ބިލްޑިން ބޭނުންކޮށްފައި ވަނީ ތިމާވެއްޓާ ބެހޭ ޕްރޮޖެކްޓެއް ހިންގުމަށެވެ. އެގޮތުން، އެތަން ބްރީމް ސާޓިފައި ކޮށްފައިވެ އެވެ.