ސަމާހު ނިޔާވި އެކްސިޑެންޓް: ދޮގު ވާހަކަތައް ނުފަތުރަން އެދިއްޖެ
ސަމާހް ނިޔާވި މައްސަލައިގެ ތަހުގީގު ކުރިއަށްދާ ގޮތާއި މިހާތަނަށް ލިބިފައިވާ މައުލޫމާތު އެއްވެސް ފަރާތަކާ ފުލުހުންގެ ހިދުމަތުން ހިއްސާކޮށްފައި ނުވާނެ ކަމަށެވެ.
މިދިޔަ ހުކުރު ވިލޭރޭ ދަންވަރު ހިނގި ނުރައްކާތެރި އެކްސިޑެންޓާއި ގުޅޭގޮތުން ބައެއް މީހުން ހަގީގަތާއި ހިލާފު ވާހަކަތައް ފަތުރާތީ އެފަދަ ކަންކަން ނުކުރުމަށް ފުލުހުންގެ އިދާރާ އިން އިލްތިމާސް ކޮށްފި އެވެ.
ހުޅުމާލެ ސެންޓްރަލް ޕާކު ކައިރި ހިނގި ނުރައްކާތެރި އެކްސިޑެންޓް ގައި ލ. އިސްދޫ ބީޗްހައުސް، ހަސަން ސަމާހް ވަނީ ނިޔާވެފަ އެވެ. އެކްސިޑެންޓްވީ ރޭސް ކާރަކާއި ސައިކަލެއް ޖެހި އެވެ. ބާރު ސްޕީޑްގައި ދުއްވާފައި އައި ކާރު، ސަމާހު އިން ސައިކަލުގައި ޖެހި އެކްސިޑެންޓްވެ ސަމާހު ނިޔާވީ އެވެ.
ސައިކަލު ދުއްވަން އިނީ ސަމާހު އެވެ. އޭރު ފަހަތުގައި އޭނާގެ އެކުވެރިއަކު އިނެވެ.
އެކްސިޑެންޓްވީ ސަމާހު، ނުބައި ލޭނަކުން އައުމުން ކަމަށް ބުނެ ބައެއް މީހުން ދަނީ ވާހަކަ ދައްކަމުންނެވެ. އަދި ކާރު ދުއްވީ އެހާ ބާރަށް ނޫން ކަމަށް ވެސް ބުނެ އެވެ.
ފުލުހުން މިރޭ ބުނީ ހުޅުމާލޭގެ ސެންޓްރަލް ޕާކު ސަރަހައްދުގައި ހިނގި އެކްސިޑެންޓެއްގައި ސަމާހް ނިޔާވި މައްސަލައިގެ ތަހުގީގު ކުރިއަށްދާ ގޮތާއި މިހާތަނަށް ލިބިފައިވާ މައުލޫމާތު އެއްވެސް ފަރާތަކާ އެ ހިދުމަތުން ހިއްސާކޮށްފައި ނުވާނެ ކަމަށެވެ.
އަދި ބުނީ މި ހާދިސާއާ ގުޅިގެން އަސާސެއް ނެތް ތަފާތު ތުހުމަތުތައް ކުރުމަކީ މަރުހޫމްގެ އާއިލާއަށް އިތުރު ހިތްދަތިކަން ލިބި ފުލުހުން ހިންގަމުން ގެންދާ ތަހުގީގަށް ހުރަސްއެޅިދާނެ ކަމެއްކަމުގައި ދެކޭ ކަމަށެވެ.
"އެހެން ކަމުން ސައްހަކަން ކަށަވަރު ނުކުރެވޭ މައުލޫމާތު ސޯޝަލް މީޑިއާގަ އާއި އެހެނިހެން ވަސީލަތްތަކުގައި ނުފެތުރުމަށް މި ހިދުމަތުން އިލްތިމާސް ކުރަމެވެ،" އެކްސްގައި ކުރި ޕޯސްޓެއް ގައި ފުލުހުން ބުނެފައިވެ އެވެ.
ކޮމެންޓް
Republic of Maldives