ނޭނގި ޔާރު ވަކިވީ - އެޕިސޯޑް 60
ވަގުތުކޮޅަކު ދާއިންއަށް ބަލަން ހުރެފައި އަޔާޒް ވަރަށް އަވަސްކޮށް ހިނގައިގަތީ އެތަނުން ނުކުންނާށެވެ.
- އެޕިސޯޑް 60 –
އެތަނުން އަޔާޒް ނުކުމެގެން ދިޔަ އިރު، ދާއިން އިނީ އަޔާޒަށް ބަލާށެވެ. އަޔާޒް ހިނގާފައި ދިޔައީ ވަރަށް ބާރަށެވެ. ކޮންމެ ވެސް ކަމެއް އަޔާޒަށް ވެއްޖެކަން ދާއިން އަށް ޔަޤީން ކުރެވުނެވެ. ދާއިން ހަމަޖެހުމުގެ ނޭވާއެއް ދޫކޮށްލަމުން ގޮޑިން ތެދުވިއެވެ. އަޔާޒްގެ ސިކުނޑިއަށް ކަންތައް ތަކެއް ނުސީދާކޮށް ނަމަވެސް، ވައްދާލަދެވުނީތީ އެކަމާ ދާއިން ހިތްހަމަޖެހުނެވެ.
މުޅިން އައު ދުވަހަކަށް ދުނިޔެއަށް އިރު މަރުޙަބާ ކިޔައިފިއެވެ. އަޔާޒް އޮތީ އެނދުގައި ޖައްސާލައިގެންނެވެ. ފާޚާނާ އިން ނުކުތް ސުހާގެ ލޮލުގައި އެންމެ ފުރަތަމަ ވެސް އަޅައިގަތީ އަޔާޒެވެ. އަޔާޒްގެ ދެ ކަޅި އަމާޒް ވެފައި ވަނީ ކޮޓަރީގެ ސީލިންގއަށެވެ. ކަޅި ޖަހާ ނުލައި އަޔާޒް މައްޗަށް ބަލަމުން ދިޔައިރު، އޭނާ ވަރަށް ގިނަ ކަންތައްތަކާ ވިސްނާކަށް އެ މޫނު މަތިން ފާހަގަ ވެއެވެ.
"އަޔާޒް.."
ސުހާ މަޑުމަޑުން ގޮވާލިއެވެ. ނަމަވެސް ސުހާގެ އަޑު އަޔާޒްގެ ކަންފަތާ ހަމައަށް ނުފޯރާ ކަހަލައެވެ. ސުހާ ކޮޓަރީގައި ހުރިކަން ވެސް އަޔާޒްގެ ހަނދާނުގައި ނެތެވެ. އަޔާޒަށް އެކަން ރޭކާ ވެސް ނުލައެވެ. ކޮޓަރީގެ މެދަށްހާ ހިސާބުގައި ސުހާ ހުއްޓިގެން ބަލަން ހުރީ އަޔާޒަށެވެ.
އަޔާޒްގެ ސިކުނޑި ފަތަހަކޮށްފައި ވަނީ ޝަރާގެ ހަނދާންތަކުންނެވެ. ދާއިން ދެއްކި ވާހަކަތަކެވެ. އެ ވާހަކަތަކާ މެދުގައި ވަރަށް ފުންކޮށް އަޔާޒަށް ވިސްނާލެވުނެވެ. އެކަމާ ވިސްނާލެ ވުމުން އަޔާޒަށް ލިބެގެން ދަނީ ބަޔާން ކުރަން ދަތި އުނދަގޫ އިޙްސާސް ތަކެކެވެ.
އަނެއްކޮޅުން ސުހާއަށް އައިސްފައިވާ ބަދަލުތަކާ މެދުގައި ވެސް އަޔާޒަށް ގެންދެވުނީ ވިސްނެމުންނެވެ. އަބަދުވެސް ސުހާ މަސައްކަތް ކުރަނީ އަޔާޒާ ގާތް ވާށެވެ. ސުހާ ރަޝިޔާއަށް އައި ފުރަތަމަ ރޭގައި އެ ދެމީހުންގެ ދެމެދުގައި ހިނގާ ދިޔަ ގުޅުމާ އެކުގައި އަޔާޒަށް ވަރަށް ގިނަ ޝައްކު ތަކެއް ވެގެން ދިޔައެވެ. ނަމަވެސް އެއްވެސް ކަމަކާ ބެހޭ ގޮތުން ވާހަކަ ދައްކާކަށް އަޔާޒް ބޭނުމެއް ނުވެއެވެ. ކުރެވޭ ޝައްކަކީ މީހާގެ ހަލާކު ކަމުގައި ވެދާނެތީއެވެ. ނަމަވެސް އަޔާޒްގެ ހިތުގައި އުފެދިފައިވާ ޝައްކުތައް ޔަޤީން ކުރުން އެއީ އަޔާޒް ކުރަން ބޭނުންވެފަ، އަދި ކުރަން ނިންމާފައިވާ ކަމެކެވެ.
އަޔާޒަށް ސިހިފައި ބަލައިލެވުނީ، ސުހާ ގޮވާ އަޑަށެވެ. އިރުގަނޑަކު އެހެން ކޮޅަށް ހުރެހުރެ އަޔާޒަށް ރޭކާ ނުލުމުން، ސުހާ އެންމެ ފަހުން އަޔާޒަށް ގޮވީއެވެ.
"ކިހިނެއް ވެފަ ތި އޮންނަނީ؟ އަބަދުވެސް ތިހެން ކޮންމެެސް ކަމަކާ ވިސްނާތަން ފެންނަނީ.. އަނެއްކާ އަޔާޒް އޯކޭ ނުވަނީތަ އަހަރެން މިތާ ހުންނަން؟ ނޫނީ އަޔާޒް ހިތްހަމަ ނުޖެހޭ ކަމެއް އަހަންނަށް ކުރެވެނީތަ؟ މާ އަވަހަށް ދޯ ގާތް ވެވުނީ.. އެކަމާ އޯކޭ އެއް ނޫން ދޯ؟"
ސުހާ ފައްޗަކަށް ސުވާލު ތަކެއް އަަމުނާލިއެވެ.
"ނޫން ނޫން ސުހާ.."
އަޔާޒް ކުއްލިއަކަށް އެނދުން ތެދުވިއެވެ. އަދި ސުހާގެ ފަހަތުން އައިސް އަޔާޒް ވަރަށް ލޯބިން ސުހާގެ ގައިގައި ބައްދާލިއެވެ.
"އަހަރެމެން ދެމީހުން އަކީ ދެމަފިރިން.. ސުހާއަށް ވެސް ފުރިހަމަ ހައްޤު އޮންނާނެ ބޭނުން ވީމަ އަހަންނާ އެކު އެ ގުޅުން ބޭއްވެން.. ދެމީހުން ކައިވެނި ކުރަނީ އެކަން ކުރަން ދޯ؟ އެހެން ވީމަ ސުހާ އިސްވެ އެކަމާ އުޅުނަސް، އެއީ ހަޑި ކަމެއް ނޫން.. އަހަރެން މި ދުވަސްކޮޅު ހޮސްޕިޓަލްގަ ބިޒީ ވީމަ އެހެންވެ.. ސުހާ އައީމަ އަހަރެން ވަރަށް އުފާވޭ.."
އަޔާޒްގެ ވާހަކަތަކާ އެކުގައި ސުހާ ހިނިތުންވެލިއެވެ. ސުހާގެ ގައިގައި އަޔާޒްގެ ދެ އަތުން ވަށާލާފައި އޮތް އިރުވެސް، އަޔާޒަށް ޔަޤީން ވަމުން ދިޔައީ އަޔާޒްގެ ހިތުގައި ސުހާއަށް ލޯބި ނެތް ކަމެވެ. ނަމަވެސް ކައިވެނި ކުރި ދުވަހުން ފެށިގެން މިހާ ހިސާބަށް އައި އިރު ސުހާއަށް ބަދަލު ތަކެއްނައި ނަމަ، އަޔާޒްގެ ހިތް ސުހާއަށް ދެވިފައި ވުން އެއީ ވަރަށް ގާތް ކަމެއް ކަމުގައި އަޔާޒް ވެސް ޤަބޫލު ކުރެއެވެ.
ސުހާ މަޑުމަޑުން އަޔާޒްއާ މޫނު ވާނެ ގޮތަށް މޫނު އަނބުރާލިއެވެ. އަދި އަޔާޒްއާ ވަރަށް ގާތް ވެލަމުން އަޔާޒް ލައިގެން ހުރި ފޭރާން އޭނާގެ ގަޔާ ވަކިކޮށްލަމުން ދެމީހުން އެއްކޮށް އެނދުމައްޗަށް ވެއްޓިގަތެވެ.
***
ހޮސްޕިޓަލުން ނުކުމުގެން އީމާ ނުކުތީ ވަރަށް އުފަލުން ހުރެގެންނެވެ. އަވަހަށް ކާރަކަށް އަރައިގެން އީމާ މިސްރާބު ޖެހީ އޭނާގެ ގެއާ ދިމާލަށެވެ. އެވަގުތު އީމާގެ ފިރިމީހާ، ވާރިޝް އޮތީ އެނދުމައްޗަށް ޖެހިގަނެގެންނެވެ. ސުހާ ރާއްޖެއިން ބޭރަށް ފުރި ފަހުން ވާރިޝްގެ ހިތަށް އެއްވެސް ހަމަޖެހުމެއް ނުލިބެއެވެ. ސުހާ އެހެން ފިރިހެނަކާ އެކުގައި މަސްތީ އުުފާ ތަކެއް ހާސިލު ކުރަމުންދާކަން ސިކުނޑިއަށް ވަނަސް، ވާރިޝްއަށް ވާ ގޮތް ވެސް ނޭނގެއެވެ.
މުޅި މީހާ "މޫޑް އޮފް" ވެ ނުވާކަށް ގޮތެއް ނެތެވެ. ވާރިޝް މިހާރު ވިސްނަމުން ދަނީ އީމާއާ ވަކިވެގެން ސުހާއާ އެކުގައި އައު ޙަޔާތެއް ފެށޭނެ ގޮތްތަކާ މެދުގައެވެ. އެކަން ވާނެ ގޮތަކާ މެދުގައި ވާރިޝް ވަރަށް ވިސްނިއެވެ. އަދި އަޔާޒް ހޮސްޕިޓަލްގައި އުޅޭ ވަގުތު ތަކުގައި ސުހާ އާއި ވާރިޝް ގުޅައިގެން ވެސް ދިޔައީ އެކި ކަހަލަ މަޝްވަރާތައް ކުރަމުންނެވެ. އެގޮތުން ވާރިޝް ސުހާ އަށް ދިން ޚިޔާލަކީ އެއްވެސް ގޮތެއް ނެތް ޙާލަތެއްގައި އީމާ އާއި އަޔާޒް މަރާލާށެވެ.
އެ ޚިޔާލަށް ސުހާ ވެސް އެއްބަސްވިއެވެ. ނަމަވެސް އެކަން އެގޮތަށް ކުރާނީ އެއްވެސް ޕްލޭނެއް މަސައްކަތް ނުކުރާ ހިސާބުންނެވެ. އެ ގޮތުން އެމީހުން ގެންދިޔައީ އެކި ކަހަލަ ޕްލޭންތައް ކުރެވޭތޯ ވިސްނަމުންނެވެ. ނަމަވެސް އެއްވެސް ރަނގަޅު ޚިޔާލެއް އެމީހުންނަށް މިކަމާ ގުޅިގެން ނުލިބެއެވެ.
ފުން ޚިޔާލުގައި އޮތް ވާރިޝްއަށް ސިއްސައިގެން ގޮސް ދޮރާ ދިމާލަށް ބަލައިލެވުނީ ކޮޓަރީގެ ދޮރު ހުޅުވުމުންނެވެ. ދޮރުމަތީގައި ހުރީ އީމާއެވެ. އީމާ ހުރީ ވަރަށް އުފާވެފައެވެ.
"ކިހިނެއްވީ އީމާ؟" އީމާ އިންތިހާއަށް އުފާވެފައި ހުރުމުން ހައިރާންކަމާ އެކުގައި ވާރިޝް އަހާލިއެވެ.
"ހެލޯ ބައްޕާ..." އީމާ ހިނިތުންވެލަމުން ގޮވާލިއެވެ.
"ބައްޕާ އޭ؟" ވާރިޝްއަށް ފުންމައިގެން އެނދުން ތެދުވެވުނެވެ. (ނުނިމޭ)
ކޮމެންޓް
މި ހަފްތާގެ ބައި ކޮބައި
Republic of Maldives