ޝަމީމަށް ހަމަލާ ދިނުން؛ ޝަރީއަތް ފަށައި ވަކީލުން އައްޔަނު ކުރަން 10 ދުވަސް

ކުރީގެ ޕްރޮސެކިއުޓަރު ޖެނެރަލް ހުސައިން ޝަމީމަށް ހަމަލާ ދިން މައްސަލައިގައި ދައުވާ ކޮށްފައިވާ މީހުންގެ ޝަރީއަތް މިއަދު ފަށައިފި އެވެ.

މިދިޔަ ޖެނުވަރީ މަހުގެ 31 ވަނަ ދުވަހު ހެނދުނު ކަސްރަތަށް ނުކުމެ އުޅުއްވަނިކޮށް ސައިކަލެއްގައި އައި ދެ މީހަކު ވަނީ މަރުތޭލަކުން ޝަމީމަށް ހަމަލާ ދީފަ އެވެ. ހަމަލާ އަމާޒުވީ ޝަމީމްގެ އަތަށެވެ. އެ ހަމަލާއާ ގުޅިގެން ޝަމީމްގެ އަތުގެ ކަށިގަނޑުގައި ވަނީ ރެނދެއް އަޅާފަ އެވެ.

މި މައްސަލައިގައި ދައުވާ ކޮށްފައި ވަނީ ހަތް މީހެއްގެ މައްޗަށެވެ. އެއީ، ރ. އަލިފުށި، ރިވެލި، މިދުހަތު އާދަމާއި ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާނާއި ދަފްތަރު ނަންބަރު ދރ 2247، އަހުމަދު މައިސާން ހާޝިމާއި ލ. މާމެންދޫ، މުރިނގު، ރަޖުވާން ލަތީފާއި ތ. ގާދިއްފުށި، މުސްތަރީގެ، ޝަމާލް ހުސައިންގެ އިތުރުން ތ. ދިޔަމިގިލި، ރުވާ، އަބާން އަބްދުލްހަންނާނާއި
އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.

ޝަމީމަށް ހަމަލާ ދިން މައްސަލައިގައި މި ހަތް މީހުންގެ މައްޗަށް ވެސް އުފުލާފައި ވަނީ ތޫނު ހަރިޔާރެއް ބޭނުން ކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.

މައްސަލައިގެ ޝަރީއަތް ފެށުމަށް މިއަދު ބޭއްވި ފުރަތަމަ އަޑުއެހުމަށް މިދުހަތު އާދަމް ހާޒިރުކޮށްފައެއް ނުވެ އެވެ. އޭނާ ކޯޓަށް ހާޒިރުކޮށްފައި ނުވަނީ އިދާރީ އޮޅުމެއްގެ ސަބަބުންނެވެ. މި މައްސަލައިގެ ޗިޓު ފޮނުވިއިރު އޭނާ ހުރީ ފުލުހުންގެ ބެލުމުގެ ދަށުގަ އެވެ. އޭގެ ފަހުން އޭނާ މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށަށް ބަދަލުކުރިއިރު ފުލުހުންގެ ފަރާތުން އޮތީ އެކަން ނާންގަ އެވެ.

އެހެންވެ، އޭނާގެ ބައި ވަކިން ގެންދިއުމަށް ނިންމައި، ދެންތިބި ހަ މީހުންގެ ބައި މިއަދު ވަނީ ފަށައިފަ އެވެ. އަޑުއެހުމަށް ހަ މީހުން ހާޒިރުވީ ވަކީލަކާ ނުލަ އެވެ. ވަކީލެއްގެ ފުރުސަތު ބޭނުންވޭތޯ ގާޒީ އިބްރާހިމް އިހުސާން ސުވާލުކުރެއްވުމުން ހަ މީހުން ވެސް ވަނީ ވަކީލަކު އައްޔަނުކުރަން ބޭނުންވާ ކަމަށް ބުނެފަ އެވެ.

އެހެންވެ، ގާޒީ ވަނީ ހަ މީހުންނަށް ވެސް ވަކީލަކު އައްޔަނު ކުރަން 10 ދުވަހުގެ ފުރުސަތެއް ދެއްވާފަ އެވެ.

މި މައްސަލައިގެ އަޑުއެހުމެއް ދެން އޮންނާނީ ހުރިހާ ލިޔެކިޔުންތަކެއް ހަމަވެ، ދިފާއާވެސް ހަވާލު ކުރެވުމުން ކަމަށް ގާޒީ ވަނީ އަޑުއެހުން ނިންމަވާލައްވަމުން ވިދާޅުވެފަ އެވެ.

ޕީޖީ އޮފީހުން ބުނެފައި ވަނީ ޝަމީމްގެ ބޮލަށް ހަމަލާދޭން މަސައްކަތް ކޮށްފައި ވަނީ މި ހަތް މީހުންގެ ތެރެއިން މިދުހަތު ކަމަށެވެ. އަދި، ސައިކަލުގައި މިދުހަތު ގޮވައިގެން އެތަނަށް ދިޔައީ ޖަޒްލާން ކަމަށާއި، ހަމަލާއަށްފަހު އޭނާ ގޮވައިގެން އެތަނުން ދިޔައީ ވެސް ޖަޒުލާން ކަމަށެވެ. ހަމަލާ ދޭން ބޭނުން ކުރި ސައިކަލު ހޯދައިދިނީ ދައުވާކޮށްފައިވާ މައިސާން ކަމަށް ވެސް އެ އޮފީހުން ބުންޏެވެ.

މި މައްސަލައިގައި ދައުވާ ކޮށްފައި އަނެއް ހަތަރު މީހުންނަކީ ހަމަލާ ދިން ވަގުތު އެ ސަރަހައްދުގައި ކާރެއްގައި މަޑުކޮށްގެން ތިބި މީހުންނެވެ. ހަމަލާއަށްފަހު ސައިކަލުގައި ތިބި ދެ މީހުންނާއެކު ހަތަރު މީހުން ކާރުގައި އެ ސަރަހައްދު ދޫކޮށް ގޮސްފައިވާ ކަމަށް ޕީޖީ އޮފީހުން ބުންޏެވެ.

ޝަމީމަށް ހަމަލާދީފައި ވަނީ ދުރާލާ ރާވައިގެން، ފާރަލުމަށްފަހުގައި ކަމަށް ކުރީން ފުލުހުން ވަނީ ބުނެފަ އެވެ. މި މައްސަލައިގައި ދައުވާ ކޮށްފައިވާ މީހުން ތިބީ ޝަރީއަތް ނިމެންދެން ބަންދުކޮށްފަ އެވެ