އާ ސީއެޗްއެސްއީ؛ މާލޭގައި ސަރުކާރުގެ އޭލެވެލް ސްކޫލު ހުޅުވައިފި

މާލޭގައިި މަތީ ސާނަވީއަށް ކިޔަވައިދިނުމަށް ސަރުކާރުގެ ސްކޫލެއް އަލުން ގާއިމުކޮށް ކިޔަވައިދޭން މިއަދު ފަށައިފި އެވެ.

މާލޭގައި ސަރުކާރުގެ އޭލެވެލް ސްކޫލެއް ހުޅުވަން ނިންމާފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު އިއުލާނު ކުރެއްވީ މިދިޔަ ޖޫން މަހުގެ 30 ވަނަ ދުވަހު އެވެ. އެ ދުވަހު މިނިސްޓަރު ވިދާޅުވި ގޮތުގައި މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމަކީ އެކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާ ކަމެއް ކަމަށެވެ.

އެެހެން ކަމުން އެ ކަމަށް ހައްލެއް ހޯދައިދިނުމުގެ ގޮތުން ސެޕްޓެމްބަރު މަހު އޭލެވެލް ކިޔެވުން ފެށެން ވާއިރަށް ކުރީގެ ސީއެޗްއެސްސީގެ އިމާރާތުގައި އޭލެވެލް ކިޔެވެމުގެ އިންތިޒާމު ހަމަޖަހިގެން ދާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު ވަނީ މިއަދު އެ ސުކޫލު ހުޅުވާ ކިޔަވައިދޭން ފެށިކަން ފާހަގަ ކުރައްވާފަ އެވެ. އަދި ވިދާޅުވީ މި ސްކޫލު ވެގެން ދާނީ ފުރަމާލޭގައި ހުރި މަތީ ސާނަވީއަށް ކިޔަވައިދޭ އެންމެ ފެންވަރު ރަނގަޅު، ހިތްފަސޭހަ އަދި ދަރިވަރުންނަށް އުފާވެރި އުގެނުމުގެ މާހައުލު ތަނަވަސްވެފައިވާ ސްކޫލަށް ކަމަށް ވިދާޅުވި އެވެ.

"މި ބަދަލާ އެކު މަތީ ސާނަވީއަށް އުނގެނުމަށް، ފުރަމާލެ އާއި ހުޅުމާލެއާ ދެމެދު ދަތުރުކުރާ ދަރިވަރުންގެ އަދަދު މަދުވާނެ. އަދި ގާތުން ތައުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވި ދަރިވަރުންނާއި ބެލެނިވެރިންނަށް ނުހަނު ބޮޑު ފަސޭހަ އަކަށް ވެގެންދާނެ،" މިނިސްޓަރު ވިދާޅުވި އެވެ.

ފުރަމާލެ އަކީ ދިވެހިރާއްޖޭ ގައި އެންމެ ގިނަ ދަރިވަރުން ކިޔަވަމުންދާ ރަށް ކަމަށްވާއިރު މިހިނގާ 2024 ވަނަ އަހަރު ގްރޭޑް 10 ގައި 1700 ދަރިވަރުން މާލޭގާ ކިޔަވަމުންދާ ކަން މިނިސްޓަރު ފާހަގަ ކުރެއްވި އެވެ.

މާލޭގައި ކުރީން ހިންގަމުން އައި ސީއެޗްއެސްސީ މިހާރު ހިންގަނީ ހުޅުމާލޭގަ އެވެ.