ޑުރަގް ކޯޓަށް ވަދެ ފައިސާތަކެއް ވަގަށް ނަަގައިފި
ޑްރަގް ކޯޓުން މިއަދު ނެރުނު ބަޔާނެއްގައި ބުނެފައިވަނީ ރޭ ދަންވަރުގެ ވަގުތެއްގައި އެކޯޓަށް ވަގަކު ވަދެފައިވާ ކަމަށެވެ. އަދި މިކަން ކޮށްފައިވަނީ އެންމެ މީހެއްކަން މިހާތަނަށް ބެލި ބެލުމުން އެނގިފައިވާ ކަމަށެވެ.
ކޯޓަށް ވަދެ ވައްކަން ކޮށްފައިވަނީ، އެ ކޯޓާއި އިންވެގެން ހުންނަ ގެތަކާއި ކޯޓާއި ދެމެދުގައި އޮންނަ ގޯޅި ތެރެއިން އެ ކޯޓުގެ ޝަރީއަތް ކުރާ މާލަމުގެ ކުޑަ ދޮރެއް ހަލާކުކޮށްލައިިގެން ކަމަށް މިހާތަނަށް ބެލި ބެލުމުން އެނގިފައިިވާ ކަމަށްވެސް ބުނެފައިވެއެވެ.
ޝަރީއަތް ކުރާ މާލަމުން، ކޯޓުގެ އެހެން ހިސާބުތަކަށްވަދެ، ރެކްރިއޭޝަން ކުލަބުގެ ފައިސާތަކެއް ވަނީ ވަގަށް ނަގާފައެވެ. އެހެން ނަމަވެސް ނެގީ ކިހާ އަދަދެއްގެ ފައިސާ ކަމެއް ހާމަކޮށްފައެއް ނުވެއެވެ.
މި މައްސަލަ ފުލުހުންނަށް ހުށަހަޅާފައިވާއިރު، ފުލުހުންގެ ޓީމެއް އެ ކޯޓަށް ގޮސް ވަނީ ބަލައި ފާސްކޮށްފައެވެ. އަދި މި މައްސަލަ ފުލުހުން ދަނީ ތަހުގީގު ކުރަމުންނެވެ.
ރޭ ދަންވަރު ޑުރަގް ކޯތުން ވައްކަން ކޮށްފައިވާއިރު 2022 ވަނަ އަހަރުވެސް އެ ކޯޓަށް ވަދެ މީހަކު ވަނީ ވައްކަން ކޮށްފަ އެވެ.
ކޮމެންޓް
Republic of Maldives