ކުންފުނިތަކަށް އެންމެ ބޮޑު އަދަދަކަށް ފައިސާ ދީފައިވަނީ ސަބްސިޑީގެ ގޮތުގަ އެވެ. އެގޮތުން ސަބްސިޑީގެ ގޮތުގައި 1.2 ބިލިއަން ރުފިޔާ ދޫކޮށްފައިވެ އެވެ.
ދައުލަތުގެ ކުންފުނިތަކަށް މާލީ އެހީތެރިކަމުގެ ގޮތުގައި މި އަހަރުގެ ފުރަތަމަ ކުއާޓާގައި ސަރުކާރުން 1.3 ބިލިއަން ރުފިޔާ ދީފައިވާކަން ހާމަވެއްޖެ އެވެ.
ދައުލަތުގެ ކުންފުނިތަކުގެ ބަލަދުވެރިއެއްގެ ދައުރު އަދާކުރާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އާންމުކޮށްފައިވާ ދައުލަތުގެ އަދި ސަރުކާަރު ހިއްސާވާ ކުންފުނިތަކުގެ ކުއާޓާލީ މާލީ ރިޕޯޓުގައި ބުނެފައިވާ ގޮތުން ސަރުކާރުން ޖުމްލަ 1.32 ބިލިއަން ރުފިޔާ މި އަހަރުގެ ފުރަތަމަ ކުއާޓާގައި ކުންފުނިތަކަށް ދީފައިވެ އެވެ.
ކުންފުނިތަކަށް އެންމެ ބޮޑު އަދަދަކަށް ފައިސާ ދީފައިވަނީ ސަބްސިޑީގެ ގޮތުގަ އެވެ. އެގޮތުން ސަބްސިޑީގެ ގޮތުގައި 1.2 ބިލިއަން ރުފިޔާ ދޫކޮށްފައިވެ އެވެ. ނިމުނު އަހަރުގެ ފުރަތަމަ ކުއާޓާގައި ސަބްސިޑީގެ ގޮތުގައި ދޫކޮށްފައިވަނީ 1.1 ބިލިއަން ރުފިޔާ އެވެ. އެހެންކަމުން ފާއިތުވި އަހަރުގެ ފުރަތަމަ ކުއާޓާއާ އަޅާބަލާއިރު މި އަހަރުގެ ފުރަތަމަ ކުއާޓާގައި ސަބްސިޑީގެ ގޮތުގައި ކުންފުނިތަކަށް ދޫކުރި އަދަދުވަނީ %2 އިތުރުވެފަ އެވެ.
ސަބްސިޑީގެ އިތުރަށް ދެންމެ އެންމެ ގިނަ ފައިސާ ސަރުކާރުން ކުންފުނިތަކަށް ދީފައިވަނީ ކެޕިޓަލްގެ ގޮތުގަ އެވެ. އެގޮތުން ކެޕިލްގެ ގޮތުގައި ކުންފުނިތަކަށް މި އަހަރުގެ ފުރަތަމަ ކުއާޓާގައި ޖުމްލަ 164.94 މިލިއަން ރުފިޔާ ދީފައިވެ އެވެ. އެއީ ނިމުނު އަހަރާ އަޅާބަލާއިރު 9 އިންސައްތަ އިތުރު އަދަދެކެވެ.
ދައުލަތުގެ ކުންފުނިތަކަށް މާލީ އެހީތެރިކަން ފޯރުކޮށްދިނުމަށް ކޮންމެ އަހަރަކުވެސް ދައުލަތުގެ ބަޖެޓުން ބޮޑެތި ހޭދަތައް ކުރަންޖެހެ އެވެ. ކުންފުނިތަކަށް މާލީ އެހީތެރިކަން ފޯރުކޮށްދޭން މަޖުބޫރުވަނީ ކުންފުނިތަކަށް ލިބޭ އާމްދަނީއަށްވުރެ ކުންފުނިތަކުގެ ހަރަދުތައް އިތުރުވުމުގެ ސަބަބުންނެވެ.
ސަރުކާރުން އެކުލަވައިލާފައިވާ މާލީ އިސްލާހީ އެޖެންޑާގެ އެންމެ މުހިއްމު ބައެއްގެ ގޮތުގައި މިހާރު ކަނޑައަޅާފައިވަނީ ދައުލަތުގެ ކުންފުނިތައް އިސްލާހު ކުރުމެވެ. ކުންފުނިތައް އިސްލާހުކުރުމުގެ މަސައްކަތް ވަރަށް އަވަހަށް ތަންފީޒުކުރެވިގެންދާނެ ކަމުގައި ފިނޭންސް މިނިސްޓަރު ޑރ.މުހައްމަދު ޝަފީގު ވިދާޅުވެފައިވެ އެވެ.