ގެވެށި އަނިޔާގެ ޝިކާރައަކަށްވި އަންހެނެއް؛ ވަރިވާން އެދި ކޯޓުގައި އާދޭސްކުރާތާ 7 މަސް!

ގެވެށި އަނިޔާގެ ޝިކާރައަކަށްވި އަންހެނަކު އޭނާގެ ފިރިމީހާގެ ގާތުން ވަރިވާން އެދިި ކޯޓަށް ދިޔުމުންވެސް އިންސާފު ނުލިބުނު ކަމަށް ބުނެ އަންހެނަކު ސޯޝަލް މީޑިއާގައި ކަންބޮޑުވުން ފާޅުކޮށްފި އެވެ.

މިހާރު ސޯޝަލް މީޑިއާގައި ދައުރުވަމުންދާ ޕޯސްޓެއްގައި އަންހެން މީހާ ބުނެފައިވަނީ، އޭނާގެ ފިރިމީހާގެ ފަރާތުން އަނިޔާ ލިބެމުންދާތާ އެތައް ދުވަހެއް ވެފައިވާ ކަމަށެވެ. 

އަނިޔާ ލިބެމުންދާތީ އެތައް ފަހަރަކު އޭނާގެ ގާތުން ވަރިވުމަށް އެދި އއ. އުކުޅަހު މެޖިސްޓްރޭޓު ކޯޓުގައި އެދޭތާ ހަތް މަސްވެފައިވާ ކަމަށްވެސް އެ މީހާ ވަނީ ބުނެފައެވެ.

އެގޮތުން އެ ކޯޓުގެ ގާޒީ މި މައްސަލަ ނުބަލައި ދިގު ދަންމަމުންދާ ކަމަށްވެސް އެ އަންހެން މީހާ ވަނީ ތުހުމަތު ކޮށްފައެވެ. އަދި މިއަދާ ހަމަޔަށް ކުރިއަށް ގެންގޮސްފައި ވަނީ އެންމެ ދެ އަޑު އެހުން ކަމަށްވެސް އޭނާ ވަނީ ބުނެފައެވެ.

އަންހެން މީހާ ބުނެފައިވަނީ އޭނާގެ ފިރިމީހާ އޭނާއަށް އަނިޔާކޮށްފައިހުއްޓާ ނަގާފައިވާ ފޮޓޯތަށް ޕެން ޑްރައިވަކަށް އަޅާ ހެކީގެ ގޮތުގައި ކޯޓަށް ހުށަހެޅި ކަމަށެވެ. އެކަމަކު އޭގައި ބަލާވަރުގެ އެއްޗެއް ނެތް ކަމަށް ގާޒީ ވިދާޅުވެފައިވާ ކަމަށްވެސް އަންހެން މީހާ ވަނީ ބުނެފައެވެ.

މީގެ އިތުރުން ގާޒީ މަދު ފައިސާކޮޅަކަށް މި މައްސަލައިގެ އަޑުއެހުންތައް ކެންސަލްކޮށް، މައްސަލަ ދިގުދަަންމާ ކަމަށްވެސް އަަންހެން މީހާ ވަނީ ތުހުމަތު ކޮށްފަައެވެ. އަދި މި މައްސަލަ ފުލުހުންނަށްވެސް ހުށަހަޅާފައިވާ ކަމަށާއި މިކަމުގައި އެއްވެސް ކުރިއެރުމެއް މިއަދާ ހަމަޔަށް ވެސް ނުލިބޭ ކަމަށް އެމީހާ ވަނީ ބުނެފައެވެ.

ފުލުހުންނާއި ކޯޓަށް މައްސަލަ ހުށަހެޅި ކަމުގެ ލިޔެކިޔުންތަކާއެކު ދައުރުވަމުންދާ މި ޕޯސްޓުގައި ބުނެފައިވަނީ އަންހެން މީހާ، މިކަމުގެ ސަބަބުން ވަރަށް ބޮޑަށް ނަފުސާނީ ވެފައިވާ ކަމަށެވެ. މި ޕޯސްޓުގައި އަންހެން މީހާއަށް އަނިޔާކޮށްފައިވާ ފޮޓޯތައް ހާމަކޮށްފައިވާއިރު ލޯ މަތީގައި ޖަހައި ލޮލަށް ލޭއަރައި، ލޯ ކައިރި ރަތްވެ ދުޅަވެފައި ހުރި މަންޒަރު ފެނެއެވެ.

މިކަމާ ގުޅިގެން ޖެންޑާ މިނިސްޓްރީއިން ވެސް އަދި ފުލުހުންވެސް އެއްވެސް އެއްޗެއް މިހާތަނަށް ހާމަކޮށްފައެއް ނުވެއެވެ.