ޑޮލަރުގެ އާމްދަނީ މިދިޔަ މަހު ދަށް، މުޅި އަހަރަށް ބަލާނަމަ އިތުރު

މިދިޔަ ޖުލައި މަހު ޑޮލަރުން ލިބުނު އާމްދަނި ދަށްވި ނަމަވެސް މުޅި އަހަރަށް ބަލާއިރު ޑޮލަރުގެ އާމްދަނީ އިތުރުވެފައިވާ ކަމަށް ދައްކައިފި އެވެ. 

ދައުލަތުގެ ޓެކްސް އިދާރާ (މީރާ) ގެ ޖުލައި މަހުގެ ހިސާބުތައް ދައްކާ ގޮތުގައި މި އަހަރު 636 މިލިއަން ޑޮލަރު ލިބިފައިވާއިރު މިދިޔަ އަހަރުގެ ޖުލައިގެ ނިޔަލަށް ޑޮލަރުގެ އާމްދަނީ ހުރީ 593 މިލިއަން ޑޮލަރެވެ. އަދި ޖުލައި މަސް ވަކިން ބަލާނަމަ މިދިޔަ ޖުލައި މަހު ޑޮލަރުން އާމްދަނީގެ ގޮތުގައި 75 މިލިއަން ޑޮލަރު ލިބިފައިވެ އެވެ. ނަމަވެސް މިދިޔަ އަހަރުގެ ޖުލައި މަހު މި އަދަދު ހުރީ 100 މިލިއަން ޑޮލަރުގަ އެވެ. 

ޑޮލަރުގެ އާމްދަނީގެ ގޮތުގައި ޓެކުހަށް 520 މިލިއަން ޑޮލަރު ލިބިފައިވެ އެވެ. އަދި ޓެކްސް ނޫން ގޮތް ގޮތުން 116 މިލިއަން ޑޮލަރު ވަނީ ލިބިފަ އެވެ.  

ޑޮލަރުގެ އާމްދަނީން އެންމެ ބޮޑަށް އިތުރުވެފައިވަނީ ޓީޖީއެސްޓީގެ ގޮތުގައި ލިބުނު އަދަދެވެ. ޓީޖީއެސްޓީގެ ގޮތުގައި މި އަހަރުގެ މިހާތަނަށް 389 މިލިއަން ޑޮލަރު ވަނީ ލިބިފަ އެވެ. އަދި އިންކަމް ޓެކުހުގެ ގޮތުގައި 46 މިލިއަން ޑޮލަރު މިލިއަން ޑޮލަރު ލިބިފައިވެ އެވެ. މީގެ އިތުރުން ޓޫރިޒަމް ލޭންޑް ރެންޓުގެ ގޮތުގައި ލިބުނު އަދަދު ހުރީ 66 މިލިއަން ޑޮލަރުގަ އެވެ. 

ރާއްޖެ އަށް މައިގަނޑު ގޮތެއްގައި ޑޮލަރުން އާމްދަނީ ލިބެނީ ޓޫރިޒަމުންނެވެ. މިގޮތުން މި އަހަރުގެ މިހާތަނަށް 1,254,646 މިލިއަން ޓޫރިސްޓުން ވަނީ ޒިޔާރަތްކޮށްފަ އެވެ. މިއީ މިދިޔަ އަހަރު އައި 1,136,289 މިލިއަން މީހުންނާ އަޅާ ބަލާނަމަ 10 ޕަސެންޓުގެ އިތުރުވުމެކެވެ.