ދަތުރުފުޅު ނިންމަވައިލެއްވުމަށްފަހު ޖައިޝަންކަރު ފުރާވަޑައިގެންފި

އިންޑިޔާގެ ހާރިޖީވަޒީރު ޑރ.ސުބްރަމާނިޔަމް ޖައިޝަންކަރު ރާއްޖެއަށް ކުރެއްވި ތިން ދުވަަހުގެ ދަތުރުފުޅު ނިންމަވައިލެއްވުމަށްފަހު ފުރާވަޑައިގެންފި އެވެ. 

ޖައިޝަންކަރު ރާއްޖެއަށް ވަޑައިގެންނެވި ހުކުރުދުވަހު އެވެ. އެ ދަތުރުފުޅު ނިންމަވައިލެއްވުމަށްފަހު މިއަދު ފުރާވަޑައިގެންނެވީ އައްޑޫ ސިޓީންނެވެ. އެއީ އެ ސިޓީގައި އިންޑިޔާގެ އެގްޒިމް ބޭންކުގެ ލޯނުގެ ދަށުން ހިންގި ދެ މަޝްރޫއެއް ނިންމައި ދިވެހި ސަރުކާރާ ހަވާލުކުރުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށްފަހު އެވެ. 

ޖައިޝަންކަރުގެ ދަތުރުފުޅުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރެއްވި އެވެ. އަދި އިކޮނޮމިކް މިނިސްޓަރު މުހައްމަދު ސައީދާއި ޑިފެންސް މިނިސްޓަރު މުހައްމަދު ޣައްސާން މައުމޫނާ ބައްދަލުކުރައްވައި އެ ބޭފުޅުންގެ ވުޒާރާތަކާ ގުޅުންހުރި ދާއިރާތަކުން އިންޑިޔާއާއި ރާއްޖޭގެ ގުޅުން ބަދަހިކުރުމާމެދު މަޝްވަރާކުރެއްވި އެވެ. 

އޭގެ އިތުރަށް 28 ރަށެއްގައި އިންޑިޔާ އެހީގައި ހިންގާފައިވާ ނަރުދަމާގެ މަޝްރޫއުތައް ނިންމައި ނަރުދަމާއާއި ފެނުގެ ނިޒާމުތައް ސަރުކާރާ ހަވާލުކުރުމަށް އިއްޔެ ހާއްސަ ރަސްމިއްޔާތެއް ބާއްވާފައިވެ އެވެ. 

މި ދަތުރުފުޅުގައި ދިވެހި ސަރުކާރާއި އިންޑިޔާ ސަރުކާރުންވަނީ ދެ ގައުމުގެ މެދުގައި އޮތް ގުޅުން އިތުރަށް ބަދަހިކުރުމަށް މަސައްކަތްކުރާނެ ކަމުގެ ޔަގީންކަން އަރުވާފަ އެވެ. 

މި ދަތުރުފުޅަކީ ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިޔާގެ ވަޒީރަކު ރާއްޖެއަށް ކުރެއްވި ފުރަތަމަ ދަތުރުފުޅެވެ.