ހެނބަދޫގައި ފުލުހެއްގެ ސައިކަލުގައި ރޯކޮށްލި ދެ މީހުން ހައްޔަރުކޮށްފި
ފުލުހުން ބުނީ ހެނބަދޫ ޕޮލިސް ޕޯސްޓުގައި މަސައްކަތް ކުރާ ފުލުހުންނަށާއި އެ ފުލުހުންގެ އާއިލާތަކާއި މުދަލަށް ގެއްލުން ދޭނެ ކަމުގެ އިންޒާރުތަކެއް ލިބިފައިވާ ކަމަށެވެ.
މިދިޔަ ބުރާސްފަތި ދުވަހު ނ. ހެނބަދޫގައި ފުލުހެއްގެ ސައިކަލުގައި ރޯކޮށްލި ދެ މީހަކު ކޯޓު އަމުރެއްގެ ދަށުން މިއަދު ހައްޔަރު ކޮށްފި އެވެ.
ފުލުހުން ބުނީ ހެނބަދޫ ޕޮލިސް ޕޯސްޓުގައި މަސައްކަތް ކުރާ ފުލުހުންނަށާއި އެ ފުލުހުންގެ އާއިލާތަކާއި މުދަލަށް ގެއްލުން ދޭނެ ކަމުގެ އިންޒާރުތަކެއް ލިބިފައިވާ ކަމަށެވެ. އޭގެ ފަހުން އެއް ފުލުސް އޮފިސަރުގެ ސައިކަލަށް ގެއްލުންދީ އަދި އިތުރު ފުލުހެއްގެ ސައިކަލުގައި ރޯ ކޮށްލާފައިވާ ކަމަށެވެ.
މި މައްސަލައިގައި މިއަދު ހައްޔަރު ކޮށްފައިވާ މީހުންގެ ވަނަވަރު ފުލުހުން ވަނީ އާންމުކޮށްފަ އެވެ. އެއީ އެރަށު ސެލްވިޔޯ، އިލްޔާސް އިބްރާހިމް އަދި އެރަށު ހުދުތަރި، މުހައްމަދު އިލްޔާސެވެ.
"މިކަމަކީ ނޫނު އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާއި ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއް ކަމަށް ތުހުމަތު ކުރެވޭ،" މިހާދިސާ ހިނގިމާއެކު އެސިސްޓެންޓް ކޮމިޝަނާ އޮޕް ޕޮލިސް އަހުމަދު ޝިފާން ވިދާޅުވެފައިވެ އެވެ.
އެއީ ވަރަށް ފިނޑި އަމަލެއްކަން ފާހަގަކުރައްވަމުން ޝިފާން ވިދާޅުވެފައި ވަނީ އެކަމުގެ ސަބަބުން ފުލުހުންގެ ހިތްވަރާއި ސާބިތުކަމަށް ކުޑަވެސް ބަދަލެއް ނާންނާނެ ކަމަށެވެ.
ކޮމެންޓް
Republic of Maldives