ޔޫރަޕަށް އުދުހެން ފަށަން ގައުމީ އެއާލައިން ބޯޓެއް ގަންނަން މާދަމާ ހަވާލު ކުރަނީ
އަލަށް ގެންނަނީ އެއާބަސް 330-200 މަރުކާގެ ބޯޓެވެ. މި ބޯޓް ގެނެސް ދަތުރުތައް ފަށަން ނިންމާފައިވަނީ ސެޕްޓެމްބަރު މަހު އެވެ.
ޔޫރަޕާއި ދުނިޔޭގެ އެކި މަންޒިލްތަކަށް އުދުހެވޭ ވަރުގެ ބޮޑު ބޯޓެއް ގައުމީ އެއާލައިން ގެންނަން މާދަމާ ބޭރުގެ ކުންފުންޏަކާއެކު ސޮއިކުރާނެ އެވެ.
"ދަ" މިރާ އަށް އެނގިފައިވާ ގޮތުގައި ޔޫރަޕާއި ދުރު މަންޒިލްތަކަށް އުދުހެވޭ ވަރުގެ އެއާބަސް އޭ 330-200 މަރުކާގެ ބޯޓެއް ހޯދަން ހަވާލުކުރަނީ ދުނިޔޭގެ ބޮޑެތި އެއާލައިންތަކަށް ބޯޓު ފޯރުކޮށް ދިނުމުގައި މަޝްރޫއު ކުންފުންޏަކާއެކުގަ އެވެ. މި ސޮއިކުރުމުގެ ރަސްމިއްޔާތު އޮންނާނީ މާދަމާ ހަވީރު ވީއައިއޭ އިންޓަނޭޝަނަލް ސީޕްލޭން ޓާމިނަލްގަ އެވެ.
މޯލްޑިވިއަން އިން ގެންނަން ހަވާލު ކުރާ ބޯޓުގައި 250-290 ޝީޓް ހުންނާނެ އެވެ. ގައުމީ އެއާލައިން އިން ކުރިން ބުނީ ގެންނަ ބޯޓުން މި އަހަރުގެ ސެޕްޓެމްބަރު މަހު ދަތުރުތައް ފަށާނެ ކަމަށެވެ.
ސަރުކާރުން ކުރިން ބުނެފައިވާ ގޮތުގައި އަލަށް ގެންނަ ބޯޓާއެކު ވަނީ ޗައިނާގެ ފަސް ސިޓީއަކާއި ޔޫރަޕުގެ ބައެއް މަންޒިލްތަކަށް އުދުހުންތައް އިތުރު ކުރާނެ އެވެ.
ކޮމެންޓް
Republic of Maldives