ބޭންކްއަށް މި އަހަރު ސްކޭމްގެ 1،400 މައްސަލަ، 39 ޕަސެންޓް ފޯނު ގުޅައިގެން

މި އަހަރުގެ މިހާތަނަށް ސްކޭމްގެ 1،400 މައްސަލައެއް ހުށަހަޅާފައިވާ ކަމަށާ މީގެ ތެރޭން 39 ޕަސެންޓް މައްސަލައަކީ ފޯނު ގުޅައިގެން ހިންގާފައިވާ ސްކޭމްގެ މައްސަލަތައް ކަމަށް ބޭންކުން ބުނެފި އެވެ. 

ސްކޭމްގެ މައްސަލާގައި ސްޓޭޓް އޯން އެންޓަޕްރައިސަސް (އެސްއޯއީ) ކޮމެޓީގައި މައުލޫމާތު ދެއްވަމުން ޑިރެކްޓަރު އޮފް ރީޓެއިލް މޫސާ ނިމާލް ވިދާޅުވީ މި އަހަރުގެ ދެވަނަ ކުއާޓަރުގައި 700 މައްސަލައެއް ހުށަހަޅާފައިވާއިރު މި އަހަރު ޖުމްލަ 1،400 މައްސަލައެއް ހުށަހަޅާފައިވާ ކަމަށެވެ.

ސްކޭމްގެ މައްސަލާގައި ބައެއް މެންބަރުން ވަނީ މިފަދަ މައްސަލަތައް ހިންގުމުގައި ބޭންކުގެ މުވައްޒަފުންގެ ބައިވެރިވުން އޮތް ކަމަށް ތަހުމަތުކޮށްފަ އެވެ. ނަމަވެސް ފުލުހުން ވެސް މިދިޔަ އަހަރު ބޭއްވި ކޮމެޓީއެއްގެ ބައްދަލުވުމެއްގައި ވަނީ ބޭންކުގެ މުވައްޒަފުންގެ ބައިވެރިވުމެއް މިފަދަ މައްސަލަތަކުގައި ނެތް ކަމަށް ބުނެފަ އެވެ.

ބީއެމްއެލްގެ ޑިރެކްޓަރު އޮފް ރީޓެއިލް ނިމާލު ވިދާޅުވީ ސްކޭމްގެ ގިނަ މައްސަލަ ތަކެއް ހުށަހެޅިނަމަވެސް ބޭންކުގެ މުވައްޒަފުންގެ ބައިވެރިވުން އޮތް ކަމަށް މިހާތަނަށް އެނގިފައި ނެތް ކަމަށެވެ.

"މިހާތަނަށް ތަހުގީގީ އިދާރާތަކުން ވެސް ނެތް މުވައްޒަފުންގެ ބައިވެރިވުން އޮތް ކަމަށް ބުނެފައެއް. އަޅުގަނޑުމެން ބެލިބެލުމުން ވެސް އެނގޭކަށް ނެތް،" ނިމާލް ވިދާޅުވި އެވެ.

ޑިރެކްޓަރު އޮފް ރީޓެއިލް ނިމާލް ވިދާޅުވި ގޮތުގައި އިންޓަނެޓް ބޭންކިން ކޮމްޕްރޮމައިޒްވެފައިވަނީ އިންޓަނެޓު ބޭންކިން ގެންގުޅޭ މީހެއްގެ ސަބަބުން ކަމަށެވެ.