ބޭނުންވާނަމަ ރާއްޖެއަށް ހަތިޔާރު އެތެރެކުރެވޭނެ: ކަސްޓަމްސް

ދިވެހިރާއްޖެއަށް ހަތިޔާރު އެތެރެކުރަން ބޭނުންވެއްޖެނަމަ ހަތިޔާރު އެތެރެކުރެވޭނެ މަގު މިހާރު އޮތީ ހުޅުވިފައިކަމަށް މޯލްޑިވްސް ކަސްޓަމްސް ސާވިސްއިން ބުނެފި އެވެ. 

ކަސްޓަމުގެ ހިދުމަަތްތައް ދިނުމުގައި ހުރި ގޮންޖެހުންތަކާއި އެ އިދާރާއަށް މަޖިލީހުން ފޯރުކޮށްދެވޭނެ އެހީތެރިކަމާ ގުޅޭ މައުލޫމާތު ހޯދުމަށް ސަލާމަތީ ހިދުމަތްތަކާ ބެހޭ ކޮމިޓީއަށް ހާޒިރުކުރުމުން ކަސްޓަމުން މައުލޫމާތު ދެމުން ބުނެފައިވަނީ ކަސްޓަމްގެ ހިދުމަތްތައް ދިނުމަށް ގޮންޖެހުންތައް އެބަހުރި ކަމަށެވެ. 

ކަސްޓަމްގެ ފަރާތުން ކަސްޓަމުގެ ޑެޕިއުޓީ ޗީފް ސުޕްރިންޑެންޓު އަހްމަދު ސިމާހު ވިދާޅުވީ ތިލަފުށީގެ ބަނދަރަކީ އަމިއްލަ ފަރާތަކުން ވަކި ޝަރުތަކަކާއެކު ތަރައްގީކޮށް ބަލަހައްޓަމުންދާ ބަނދަރެއް ކަމަށެވެ. 

އަދި ކަސްޓަމާ ގާނޫނުން ހަވާލުކޮށްފައިވާ ޒިންމާ އަދާކުރުމުގެ ގޮތުން އެ ބަނދަރުވެސް ކަސްޓަމުން ބަލަހައްޓަމުންދާ ކަން ސިމާހު ފާހަގަކުރެއްވި އެވެ. 

ރާއްޖެއަށް އެތެރެވާ ކަނޑު އުޅަނދުފަހަރުގެ ކަންކަން ބެލެހެއްޓުމުގައި ކަސްޓަމަށް ކުރިމަތިވާ ގޮންޖެހުންތައް ފާހަގަކުރައްވަމުން ސިމާހު ވިދާޅުވީ ބަނދަރަށް ވާސިލުވުމުގެ ކުރިން ކަނޑުމަތީގައި ކަންތައްތަކެއް ހިންގުމުގެ ފުރުސަތު އުޅަނދުފަހަރަށް މިހާރު އެބަ އޮތް ކަމަށެވެ. 

"[ބޭރު އުޅަނދުފަހަރު] ބަނދަރާ ހަމައަށް ނައިސް ކިތަންމެ ކަމެއް ކުރެވޭގޮތަށް [މިހާރު އޮތީ]، ރާއްޖޭގެ އިގްތިޞާދީ ސަރަހައްދަކީ ވަރަށް ބޮޑު ސަރަހައްދެއް، ސިޔާދަތީ ބާރު ލިބެނީ 12 މޭލާ ހަމައިން، އެ ސަރަހައްދުވެސް ރަނގަޅަށް ނުބެލެހެއްޓޭ،" ސިމާހު ވިދާޅުވި އެވެ. 

މިހާރު ކަންކަން އޮތް ގޮތުން އުޅަނދެއްގައި އެތެރެކުރަނީ ކޮން މުދަލެއްކަން ކަސްޓަމްސްއަށް ބެލެނީ އެ އުޅަނދެއް ބަނދަރަށް ފޯރުމުންނެވެ. އޭގެ ކުރިން އެ އުޅަނދުގައި ހުރި މުދާ އެހެން އުޅަނދަކަށް ބަރާ ކުރުމުގެ ފުރުސަތު އޮތްކަން ކަސްޓަމުން ފާހަގަކުރި އެވެ. 

ނިޒާމު މިގޮތަށް އޮތުމުން ހަތިޔާރު އެތެރެކުރަން މީހަކު ނިޔަތް ގަނެފިނަމަ ހަތިޔާރުވެސް ރާއްޖެއަށް އެތެރެކުރުމުގެ ފުރުސަތު އެބައޮތް ކަމަށް ސިމާހު ވިދާޅުވި އެވެ. 

"އެމީހަކު ނިޔަތް ގަންނަ ކަމެއް، މިސާލަކަށް ހަތިޔާރު ގެންނަން މީހަކު ނިޔަތް ނުގަންނަނީ، ނިޔަތް ގަނެފިއްޔާ ރާއްޖެއަށް ހަތިޔާރު ގެނައުމުގެ މަގު އޮތީ ހުޅުވިފައި،"

ސިމާހު ވިދާޅުވީ އެހެން ގައުމުތަކުގައިވެސް ކަނޑުގެ ސަރަހައްދު ބަލަހައްޓަނީ ވައިގެ މަގުންނެވެ. އެހެންކަމުން އެފަދަ ނިޒާމެއް ރާއްޖޭގައި ގާއިމުކުރުމުގެ މުހިއްމުކަން އޭނާ ފާހަގަކުރެއްވި އެވެ. 

މިއަދުގެ ކޮމިޓީގައި ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު ވިދާޅުވީ މިހާރު ރާއްޖެއަށް އެތެރެވާ ބޯޓު ފަހަރު މޮނީޓާކުރަންޖެހެނީ ފިޒިކަލީ އެތަނަށް ގޮސްގެން ކަމަށެވެ. އެގޮތަށް ދަނީ ކޯސްޓުގާޑުގެ ބޯޓުފަހަރުގައި ކަމަށެވެ. 

މާނިއު ވިދާޅުވީ އެ މައްސަލަ ހައްލު ކުރުމުގެ ގޮތުން އެމެރިކާއާއި ޗައިނާއިން ޑްރޯނު ގެނައުމުގެ މަސައްކަތް ފަށާފައިވާ ކަމަށެވެ. އަދި ޑްރޯނުތައް ލިބުމުން އުޅަނދުފަހަރު މޮނީޓާ ކުރާނީ ޑްރޯނު ބޭނުންކޮށްގެން ކަމަށާއި އުޅަނދު ފަހަރުގައި ދާނީ ޝައްކުވާ ކަމެއް އޮތް ނަމަ ކަމަށް އޭނާ ވިދާޅުވި އެވެ.