ގަވަރުނަރު މަގާމުން ވަކިކުރަން ރައީސަށް ލަފާދޭން ކޮމެޓީން ފާސްކޮށްފި

މަރުކަޒީ ބޭންކް، އެމްއެމްއޭގެ ގަވަރުނަރު އަލީ ހާޝިމް މަގާމުން ވަކިކުރަން، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ލަފާ ދިނުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ފާސްކޮށްފި އެވެ.

މި މައްސަލަ މާލިއްޔަތު ކޮމިޓީއަށް ހުށަހެޅުއްވީ ދިއްގަރު ދާއިރާގެ މެމްބަރު އަހުމަދު ނާޒިމެވެ. ކޮމެޓީގައި ނާޒިމް ވިދާޅުވީ ގައުމުގެ ފިސްކަލް ހާލަތު ރަގަޅު ކުރުމަށްޓަކާ އިކޮނޮމިކް ރިޕޯމް އެޖެންޑާއެއް އެކުލަވާލައި، އެކަމަށް ބޭނުންވާ ގާނޫނުތައް ތައާރަފްކޮށް، އާ ސިޔާސަތުތަކެއް ތަންފީޒު ކުރުމަށް ސަރުކާރުން ތައްޔާރުވެފައިވާ ކަމަށެވެ.

ނާޒިމް ވިދާޅުވީ ގައުމުގެ އިގުތިސޯދު އަލުން އަނބުރާ އިޔާދަކުރަން އުނދަގޫ ހިސާބަކަށް ގޮސްފައިވާއިރު، އެމްއެމްއޭއަށް މަނިޓަރީ ޕޮލިސީ ރަގަޅަށް ހިންގޭތަން ނުފެންނަ ކަމަށެވެ.

"ގައުމުގެ އިގުތިސޯދު ހީނަރުވެ، އަނބުރާ އިޔާދަކުރަން އުނދަގޫ ހިސާބަކަށް ގައުމުގެ އިގްތިސޯދު ދިޔައިރު އެމްއެމްއޭގެ ގާނޫނުތައް ބަޔާންކުރާ މަގުސަދުތައް ހާސިލު ކުރެވިފައި ނެތް ހިނދު، އެމްއެމްއޭގެ އެ މައިގަނޑު އެއް އަސާސް ކަމުގައިވާ މަނިޓަރީ ޕޮލިސީ އެންމެ އެކަށޭނަ ގޮތުގައި ހިނގަމުންދާތަން ފެންނާކަށް ނެތް،" ނާޒިމް ވިދާޅުވި އެވެ.

ނާޒިމް ފާހަގަކުރެއްވި ގޮތުގައި، ރާއްޖޭގައި ހިންގާ ބޭންކުތަކާއި މާލީ އިދާރާތަކުން އާންމުންނަށް ލޯނު ދޫކުރާ މިންވަރު ނުސީދާކޮށް ހިފަހައްޓައި، ބޭންކުތަކުގެ ރިޒާވް އެމްއެމްއޭގައި ބަހައްޓަން ގަވަރުނަރު ބާރުއަޅުއްވާތަން ފެންނަމުން ނުދާ ކަމަށެވެ. އަދި، ސަރުކާރުން ފައިސާ ހޯދަމުން ގެންދަނީ ޑޮމެސްޓިކް މާކެޓަށް ވެފައި، އެ މާކެޓު ރަގަޅަށް ރެގިއުލޭޓް ކުރާ ތަން ވެސް ފެންނަމުން ނުދާ ކަމަށެވެ.

އޭގެ އިތުރުން، ކުށްކުރުން ހުއްޓުވުމަށް ހުރި ގޮންޖެހުންތަކުގެ ތެރޭގައި އެމްއެމްއޭގެ ގަވާއިދުތައް އަދާހަމަ ކޮށްފައި ނުވާ މައްސަލަ ހޯމް މިނިސްޓްރީން މަޖިލީހުގެ 241 ކޮމެޓީގައި ފާހަގަކޮށްފައިވާ ކަމަށް ވެސް ނާޒިމް ވިދާޅުވި އެވެ. 

"އެމްއެމްއޭގެ ގާނޫނުގައި ސަރީހަ އިބާރާތުން ބަޔާންކޮށްފައިވާ މައިގަނޑު މަގުސަދުތައް ހާސިލްކުރުމަށްޓަކާ 17 ނޮވެމްބަރު 2023 އިން ފެށިގެން މިވޭތުވެދިޔަ މުއްދަތުގެ ތެރޭގައި ސަރުކާރުން ލަފާދިނުމާއި އަދި އެ މަގުސަދު ހާސިލް ކުރުމަށްޓަކާ އަމަލީ ގޮތުން މަސައްކަތްތަކެއް ކުރެވިފައި ނުވާތީ [ނުވޭ]،" ހާޝިމް ވަކުކުރައްވަން ހުށަހަޅުއްވާ ސަބަބުތަކުގެ ތެރޭގައި ނާޒިމް ފާހަގަކުރެއްވި އެވެ.

ނާޒިމްގެ ހުށަހެޅުއްވުން ކޮމެޓީން ފާސްކޮށްފައިވާއިރު، ގަވަރުނަރު ވަކިކުރުމަށް މަޖިލީހުން ރައީސަށް ލަފާ ދެއްވޭނެ އެވެ. ކޮމެޓީން މައްސަލަ ނިންމި ގޮތުގެ ރިޕޯޓް ތަޅުމަށް ފޮނުވުމުން ތަޅުމުން ވެސް އެކަން ފާސްކުރަން ޖެހޭނެ އެވެ.

ނާޒިމް މިއަދު ވަނީ މަޖިލީސް ތަޅުމުގައި ވެސް ގަވަރުނަރުގެ މަސްއޫލިއްޔަތުތައް އަދާ ނުކުރައްވާ ކަމަށް ވިދާޅުވެ ވަރަށް ބޮޑަށް ކަންބޮޑުވުން ފާޅުކުރައްވާފަ އެވެ. އެ ވާހަކަ ދެއްކެވީ މަޖިލީހަށް މިއަދު ހުށަހެޅި ދައުލަތުގެ ފިސްކަލް ޒިންމާގެ ބިލަށް ބަހުސް ކުރައްވަމުންނެވެ. ނާޒިމް ވިދާޅުވެފައި ވަނީ މި ސަރުކާރަށް ހަތް މަސްވެފައިވާއިރު، މިހާތަނަށް ގަވަރުނަރުގެ ލަފަޔެއް ސަރުކާރަށް ލިބިފައި ނުވާ ކަމަށެވެ.

ހާޝިމަކީ ނިމިދިޔަ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެ މަގާމަށް އައްޔަނު ކުރެއްވި ބޭފުޅެކެވެ. އޭނާ އެ މަގާމަށް އައްޔަނުކޮށްފައި ވަނީ ސެޕްޓެމްބަރު 8، 2019ގަ އެވެ