އަމިއްލަ ބޭނުމަށް ގެންނަ ތަކެތިން ޑިއުޓީ މާފުވާ މިންވަރު 10،000ރ. އަށް މަތިކޮށްފި

ދަތުރުވެރިން ގެންނަ ތަކެއްޗާއި އަމިއްލަ ފަރާތްތަކުގެ ކުދި ކުދި ބޭނުންތަކަށް ގެންނަ ތަކެތީން ޑިއުޓީ މައާފުވާ މިންވަރު 6,000 ރުފިޔާ އިން 10,000 ރުފިޔާ އަށް މަތިކޮށްފި އެވެ. 

މޯލްޑިވްސް ކަސްޓަމްސް ސާވިސަސް އިން މާދަމަ އިން ފެށިގެން ގެނެސްފައިވާ މި ބަދަލާއެކު އަމިއްލަ ބޭނުންތަކަށް މުދާ އެތެރެކުރާ ގިނަ ފަރާތްތަކަށް ހިތްހަމަޖެހުމަށްވާނެ އެވެ. މި ބަދަލާއެކު ކަސްޓަމްސްއިން ވަނީ މި އިނާޔަތް ހޯދޭނެ އުސޫލުތަކެއް ވެސް އިއުލާނުކޮށްފަ އެވެ. 

މިހާތަނަށް އަމަލު ކުރި ގޮތް - ކަސްޓަމްސް އިން މި ބަދަލު ގެނެސްފައިވާއިރު މިހާތަނަށް އަމަލު ކުރަމުން ގޮސްފައިވަނީ ރާއްޖެއިން ބޭރުގަ 6 މަސް ދުވަހާއި އެއް އަހަރާއި ދޭތެރޭ މުއްދަތަށް އުޅެފައި އަންނަ ފަރާތްތަކުން ގެންނަ ތަކެތިން 9000 (ނުވަހާސް) ރުފިޔާގެ މިންވަރު ޑިއުޓީ މައާފުކޮށްދެ އެވެ. އަދި އެއް އަހަރާއި ތިން އަހަރާ ދެމެދުގެ ދޭތެރޭ މުއްދަތަށް އުޅެފައި އަންނަ ފަރާތްތަކުން ގެންނަ ތަކެތިން 11000 ރުފިޔާގެ މިންވަރަށެވެ. މީގެ އިތުރުން ރާއްޖެއިން ބޭރުގަ ތިން އަހަރަށް ވުރެ ގިނަ މުއްދަތަށް އުޅެފައި އަންނަ ފަރާތްތަކުން ގެންނަ ތަކެތިން ޑިއުޓީ މައާފުކޮށްދެނީ 14000ރ ގެ މުދަލުންނެވެ. ރާއްޖެއިން ބޭރުގަ އެއް އަހަރަށް ވުރެ ގިނަ މުއްދަތަށް އުޅެފައި އަންނަ ފަރާތްތަކުން ގެންނަ ތަކެތީގެ ތެރެއިން އެފަރާތްތަކުން ރާއްޖެއިން ބޭރުގައި ބޭނުން ކޮންފަ ގެންނަ ތަކެތިން ޑިއުޓީ މައާފުކޮށްދެ އެވެ. އަދި އަމިއްލަ ކުދިކުދި ބޭނުމަށް ގެންނަ ތަކެތީގެ 6000 ރުފިޔާގެ މިންވަރަށެވެ.