ރައީސް އަޅުއްވާ ފިޔަވަޅުތަކަށް ސަރުކާރު ކޯލިޝަނުން މަރުހަބާ ކިޔައިފި
ކޮންގްރެސް ކޯލިޝަނުން ބުނީ ރައްޔިތުންނަށް އޭގެން މާބޮޑު ނޭދެވޭ އަސަރެއް ނުކުރާނެ ގޮތަކަށް މާލީ ނިޒާމް ހަރުދަނާ ކުރެއްވުމަށް ފިޔަވަޅު އަޅުއްވާނެ ކަމަށެވެ.
ރާއްޖޭގެ މާލީ ނިޒާމް ހަރުދަނާކުރުމުގެ މުހިންމު ފިޔަވަޅުތަކެއް އަޅުއްވަން ނިންމެވިކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ސަރުކާރު ހިންގާ ކޮންގްރެސް ކޯލިޝަނުން މަރުހަބާ ކިޔައި ޝުކުރު އަދާކޮށް ބަޔާނެއް ނެރެފި އެވެ.
ޕީއެންސީއާ ޕީޕީއެމް ހިމެނޭ ކޯލިޝަނުން ބުނީ ރާއްޖެ ވައްޓާލާފައިވާ އިގްތިސާދީ އަނދަވަޅުން ނަންގަވައި ރާއްޖޭގެ މާލީ ނިޒާމް ހަރުދަނާކުރުމުގެ މުހިންމު ފިޔަވަޅުތަކެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަޅުއްވަން ނިންމަވާ އެކަން އިއުލާނު ކުރެއްވިކަމަށްޓަކައި އެ ކޯލިޝަންގެ ފަރާތުން ރައީސުލްޖުމްހޫރިއްޔާއަށް އިހްލާސްތެރިކަމާއެކު މަރުހަބާ ދަންނަވައި ޝުކުރު އަދާކުރާ ކަމަަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ދައުލަތުގެ ހަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އަޅުއްވަން ނިންމަވާފައި ކަމަށާ އެގޮތުން ސަރުކާރުގެ ރިކަރަންޓް ހަރަދު ކުޑަކުރުމުގެ ގޮތުން ސިޔާސީ މަގާމުތަކުގެ އަދަދު މަދުކުރުމާއި އެކި މުނާސަބަތުތަކުގައި ބާއްވާ ހަފްލާތަކަށް ކުރާ ހަރަދުތައް މަދު ކުރެއްވުން ފަދަ ކަންކަން ހިމެނޭ ކަން އެ ބަޔާނުގައި ވަނީ ފާހަގަކޮށްފަ އެވެ.
އަދި އެނޫންވެސް އިތުރު ފިޔަވަޅުތައް އަޅުއްވާނެކަން ހާމަކުރައްވާފައިވާ ކަން ފާހަގަ ކޮށްފައިވެ އެވެ.
ކޮންގްރެސް ކޯލިޝަނުން ބުނީ ރައްޔިތުންނަށް އޭގެން މާބޮޑު ނޭދެވޭ އަސަރެއް ނުކުރާނެ ގޮތަކަށް މާލީ ނިޒާމް ހަރުދަނާ ކުރެއްވުމަށް ވިސްނަވާ އަޅުއްވަން ނިންމެވި ފިޔަވަޅުތަކަކީ ސިޔާސީ މަންފާ އަށްވުރެ ބޮޑަށް ގައުމީ ވިސްނުމަކުން ވިސްނަވާ އަޅުއްވާ ފިޔަވަޅުތަކެއް ކަމަށް ގަބޫލުކުރާ ކަމަަށެވެ.
"... އަދި މިކަމުގައި ރައީސުލްޖުމްހީރިއްޔާ އާއިއެކު މިކޯލިޝަން ސާބިތުވެ ތިބޭނެ ކަމުގެ ޔަގީންކަންވެސް އަރުވަމެވެ،" އެ ބަޔާނުގައި ވެ އެވެ.
ސަރުކާރުގެ ހަރަދުތައް ކުޑަކުރުމުގެ ގޮތުން މާލީ އިސްލާހީ ފިޔަވަޅުތައް ތަންފީޒުކުރަން ފެށުމަށް ސަރުކާރުން ތައްޔާރުވަމުން އަންނައިރު މި ހާލަތުގައިވެސް ބައެއް ފިޔަވަޅުތައް އެޅުމަށް ސަރުކާރުންވަނީ ނިންމާފަ އެވެ. އެގޮތުން ތަންފީޒުކުރަން ނިންމާފައިވާ ބައެއް ކަންކަން ރައީސް ރޭ އެކްސްގައި ޝާއިއުކުރެއްވި ޕޯސްޓެއްގައި ފާހަގަ ކުރެއްވި އެވެ.
ރައީސް ވިދާޅުވީ ސަރުކާރުގެ ހަރަދުތައް ކުޑަކުރުމަށް އަޅަން ނިންމާފައިވާ ފިޔަވަޅުތަކުގެ ތެރޭގައި ސަރުކާރުގެ ހިންގުމުގެ ނުވަތަ ރިކަރަންޓު ހަރަދު ކުޑަކުރުމަށް އަޅާނެ ފިޔަވަޅުތައް ހިމެނޭ ކަމަށެވެ. އެ ފިޔަވަޅުތަަކުގެ ތެރޭގައި ސިޔާސީ މަގާމުތަކުގެ އަދަދު މަދުކުރުމާއި، އެކި މުނާސަބަތުގައި ބާއްވާ ހަފުލާތަކަށް ކުރާ ހަރަދުތައް ކުޑަކުރުމާއި ބައެއް ހަފުލާތައް ނުބޭއްވުން ހިމެނޭ ކަަމށް އެމަނިކުފާނު ވިދާޅުވި އެވެ.
ހަރަދު ކުޑަކުރުމަށް ބައެއް މުނާސަބަތުތަކާ ގުޅިގެން ބާއްވާ ހަފުލާތައް މަދުކޮށް ނުވަތަ ހަފުލާތައް ނުބާއްވަން ނިންމާފައިވާކަން ހާމަކުރެއްވުމާއެކު، ރައީސް ވިދާޅުވީ ކުރިއަށް އޮތް މިނިވަން ދުވަހުގައި ބާއްވަން ނިންމާފައިވާ ފުޅަނދުބުރާއި ކުޅިވަރުތަކާއި ރިސެޕްޝަން ފަދަ ހަރަކާތްތައް ނުބޭއްވުމަށް ނިންމާފައިވާ ކަމަށެވެ.
ރައީސް ވިދާޅުވި ގޮތުގައި އެ ހަރަކާތްތައް ނުބާއްވައި މިފަހަރު މިނިވަން ދުވަސް ފާހަގަ ކުރުމަށް ބާއްވާނީ ހަމައެކަނި މިނިވަން ދުވަހުގެ ޖަލްސާއެކެވެ.
މިނިވަން ދުވަހުގައި ބާއްވާ ހަރަކާތްތައް މަދުކުރުމުން ދައުލަތުގެ ހަރަދުތައް އެތައް ގުނައަކުން ކުޑަވާނެ ކަމަށްވެސް އެމަނިކުފާނު ވިދާޅުވި އެވެ. ރައީސް ވިދާޅުވި ގޮތުގައި ކުރިއަށް އޮތް ދުވަސްތަކުގައި ހަރަދު ކުޑަކުރުމަށް އިތުރު ގިނަ ފިޔަވަޅުތަކެއް ސަރުކާރުން އަޅާނެ އެވެ.
ހަރަދު ކުޑަކޮށް ދައުލަތުގެ މާލީ ހާލަތު ރަނގަޅު ކުރުމަށް މި އަހަރުގެ ޖުލައި މަހުން ފެށިގެން ބޮޑެތި މާލީ އިސްލާހުތަކެއް އެކިލެވޭ އިސްލާހީ އެޖެންޑާއެއް ތަންފީޒުކުރަން ފަށަން ސަރުކާރުންވަނީ ނިންމާފަ އެވެ. ސަރުކާރުން ގެންނަން ކަނޑައަޅާފައިވާ އިސްލާހުތަކުގެ ތެރޭގައި އާސަންދައާއި ސަބްސިޑީގެ ނިޒާމަށް ގެންނަން ނިންމާފައިވާ ބަދަލުތައް ހިމެނެ އެވެ.
ކޮމެންޓް
Republic of Maldives