ހުޅުޖަހަން ގޮވާލީ އެ ނިޔަތުގައި ނޫން ކަމަށް ވިދާޅުވެ، އައްބާސް ދައުވާއަށް އިންކާރު ކުރައްވައިފި

އިންޑިއާ ހައިކޮމިޝަނުގައި ހުޅު ޖަހައި އަންދާލަން ގޮވާލީ އެފަދަ ނިޔަތެއް އޮވެގެން ނޫން ކަމަށް ވިދާޅުވެ އައްބާސް އާދިލް ރިޒާގެ މައްޗަށް ދައުލަތުން ހުށަހަޅާފައިވާ ދައުވާއަށް އިންކާރު ކުރައްވައިފި އެވެ.

އައްބާސްގެ މައްޗަށް އުފުލާފައި ވަނީ ފަނާ ކޮށްފާނެ ކަމުގެ ބިރު ދެއްކުމުގެ ކުށުގެ ދައުވާ އެވެ. މި ދައުވާ ކުރީ، ޑިސެމްބަރު 22، 2022 ވަނަ ދުވަހު "ކްލަބްހައުސް" ގައި ވާހަކަ ދައްކަމުން ކުރީގެ ރައީސް އަބްދުﷲ ޔާމީންގެ މައްޗަށް ތުހުމަތުކުރެވޭ މަނީލޯންޑަރިންގެ މައްސަލައެއްގެ ޝަރީއަތް ކްރިމިނަލް ކޯޓުގައި އޭރު ކުރިއަށްދާ ގޮތާމެދު ހިތްހަމަ ނުޖެހިގެން ޕެޓްރޯލާއި، ވާބުރި ފަދަ ތަކެތި އެއްޗެހި ހޯދައި، މާލޭގެ އެކި ތަންތަނުގައި ހުޅުޖަހައި، ހަމަނުޖެހުން ހިންގުމަށް އޭނާ ހިތްވަރު ދީފައިވާ ކަމަށް ތުހުމަތުކޮށެވެ.

މީގެ އިތުރުން، އޭނާ ބޭނުންކުރާ ޓްވިޓާ އެކައުންޓުން ރާއްޖާގައި ހުންނަ އިންޑިއާ އެމްބަސީގައި ހުޅުޖެހުމަށް ވެސް ގޮވާލާފައިވެ އެވެ. މައްސަލަ ވަރަށް ބޮޑަށް ހޫނުވި އެ ޓްވީޓުގައި ބުނެފައި ވަނީ ފެބްރުއަރީ 8، 2012 ގެ ހަމަނުޖެހުމުގެ ތެރޭ އައްޑޫގައި ހުޅުޖެހީ އިންޑިއާގެ އޯޑަރަށް ކަމަށެވެ. އެހެން ނަމަވެސް، ލިބުނު އެ ގެއްލުމަށް އަދި އޮތީ ބަދަލު ނުހިފި ކަމަށެވެ. އަދި ބަދަލު ހިފުމުގެ ގޮތުން "އެމްބަސީން ފަށަން އަޅުގަނޑަށް ފެންނަ،" ކަމަށެވެ. އެކަން ވެސް ދައުވާގައި ފާހަގަކޮށްފައިވެ އެވެ.

މި މައްސަލައިގެ މިއަދުގެ އަޑުއެހުމުގައި އައްބާސް ވަނީ ދައުލަތުން ކޮށްފައިވާ ދައުވާއަށް އިންކާރު ކޮށްފަ އެވެ. އޭނާގެ ފަރާތުން ދިފާއީ ވަކީލް ނޫރުލްސަލާމް އަބޫބަކުރު ވިދާޅުވީ އެ ވާހަކަތައް އައްބާސް ދެއްކީ އެއްގޮތަކަށް ވެސް އެފަދަ ކަމެއް ކުރަން ހިތްވަރު ދިނުމަށް ނޫން ކަމަށެވެ. އެވާހަތަކުގެ ހަގީގަތް ދައުލަތުން އޮޅުވާލާފައިވާ ކަމަށް އޭނާ ވިދާޅުވި އެވެ.

އޭނާ އަކީ ގައުމަށް ހިދުމަތްތެރި މީހެއް ކަމަށާއި އެވާހަކަތައް ދެއްކީ ހިޔާލުފާޅުކުރުމަށް ލިބޭ މިނިވަންކަމުގެ ތެރެއިން ސިޔާސީ ފޯރަމެއްގައި ކަމަށް ވަކީލް ވިދާޅުވި އެވެ. އެ ވާހަކަތައް އޭރު ދެއްކީ އޭރުގެ ސަރުކާރުން ފޮރިން ޕޮލިސީ ގެންގުޅޭ ގޮތާމެދު ހިތްހަމަނުޖެހިގެން ކަމަށާއި ނަމަވެސް އެ ވާހަކަތަކުގެ އަސްލަކީ އެއްވެސް ތަނެއްގައި ހުޅުޖަހައި އަދި އެއްވެސް އިންސާނެއްގެ ފުރާނައަށް ގެއްލުން ދިނުން ނޫން ކަމަށް ވަކީލް ފާހަގަކުރެއްވި އެވެ.

ވަކީލް ވިދާޅުވީ އައްބާސްގެ މާޒީގެ ރެކޯޑަށް ބަލާއިރު ވެސް އޭނާ އަކީ މައްސަލައެއްގަ ހައްޔަރުކޮށް އަދި އަދަބެއް ދީފައިވާ މީހެއް ވެސް ނޫން ކަމަށެވެ. އައްބާސަކީ ގައުމަށް ހިދުމަތްތެރި، ވަތަނީ ބޭފުޅެއް ކަމަށް ވެސް ވަކީލް ވަނީ ފާހަގަކުރައްވާފަ އެވެ.

މި މައްސަލައަކީ ނިމިދިޔަ ސަރުކާރުގެ ސިޔާސީ މަސްލަހަތާ ގުޅުން ހުރި މައްސަލައެއް ކަމަށް ވެސް ވަކީލް ވަނީ ފާހަގަ ކުރައްވާފަ އެވެ. އެކަމަށް ރައްދު ދެއްވަމުން ދައުލަތުން ބުނެފައި ވަނީ މިއީ ސިޔާސީ މައްސަލައެއް ނޫން ކަމަށާއި މިއީ ޖިނާއީ މައްސަލައެއް ކަމަށެވެ.

އައްބާސްގެ ފަރާތުން ދައުވާއަށް އިންކާރު ކުރުމުން ދައުލަތުން ވަނީ ހެކި ހާމަކޮށްފަ އެވެ. ގާޒީ ސޮފްވަތު ހަބީބް ވަނީ ދިފާއީ ހެކި ހުށަހަޅަން އައްބާސަށް 10 ދުވަހުގެ ފުރުސަތެއް ދީފަ އެވެ. އޭގެ ފަހުގައި ހެކިތައް ވަޒަން ކުރުމަށްފަހު މަދަނީ މިންގަނޑުން މައްސަލަ ކުރިއަށް ގެންދެވޭނެ ކަމާމެދު ގޮތެއް ނިންމަވާނެ ކަމަށް ގާޒީ ވަނީ ވިދާޅުވެފަ އެވެ.

މި މައްސަލައިގައި ދައުވާ އުފުލި ފަހުން އެކި ފަހަރު މަތިން އަޑުއެހުމެއް ބޭއްވޭތޯ ކޯޓުން ވަނީ މަސައްކަތް ކޮށްފަ އެވެ. ނަމަވެސް އައްބާސް އުޅޭ ވަކި ތަނެއް ނޭނގޭތީ ޗިޓު ރައްދު ނުކުރެވި ޝަރީއަތް ބޭއްވޭ ގޮތެއް ނުވެ އެވެ. ކޯޓުން ކުރިން ވަނީ އޭނާ ބަންދު ކޮށްގެން ކޯޓަށް ހާޒިރު ކުރަން ފުލުހުންގެ މައްޗަށް އަމުރެއް ވެސް ނެރެފަ އެވެ.

މިއަދުގެ އަޑުއެހުން ނިންމަވާލައްވަމުން ގާޒީ ވިދާޅުވީ ކޯޓަށް ހާޒިރުނުވެ އައްބާސް އުޅުނު މުއްދަތުގައި ސޯޝަލް މީޑިއާގައި ލިޔުންތައް ލިޔެ އެކި ފޯރަމްތަކުގައި ވާހަކަދައްކަވާފައި ހުރި މަންޒަރު ނޫސްތަކުން ފެނިފައިވާ ކަމަށެވެ. ކޯޓަށް ހާޒިރު ނުކުރެވޭތީ ކޯޓަށް މީހުން މަލާމާތުގެ ބަސްތައް ވެސް ރައްދުކުރަމުންދާތަން ފެނިފައިވާ ކަމަށެވެ.

ގާޒީ ވިދާޅުވީ ގަސްތުގައި ކޯޓަށް ހާޒިރު ނުވާ މީހެއްގެ މައްޗަށް ފުލުހުން މެދުވެރިކޮށް ހަރުކަށި ފިޔަވަޅު އެޅުމުގެ ފުރުސަތު ކޯޓަށް ލިބިގެންވާ ކަމަށެވެ. އެމީހެއްގެ ފޯނު ނަންބަރު ނުވަތަ އުޅޭ އެޑްރެސް ބަދަލުވެއްޖެނަމަ ކޯޓަށް އެކަން އަންގަން ވާނެ ކަމަށާއި ރާއްޖޭން ބޭރަށް ދާނަމަ ސިޓީއަކުން ލިޔެ ކޯޓުގެ ހުއްދަ ހޯދަން ވާނެ ކަމަށެވެ،

"މިއަދު ސިޓީއެއް ކޯޓަށް ލިއްޔާ މިއަދު ކޯޓުން ހުއްދަ ދޭނެ. އެހާވެސް ފަސޭހަ ކަމެއް އެއީ. ގައުމަށް ހިދުމަތްތެރި ބޭފުޅަކަސް، ވަތަނީ ބޭފުޅަކަސް، ސިޔާސީ ބޭފުޅަކަސް މޫނަކަށް ކަނދުރާއަކަށް ބެލުމެއްނެތި ހަރުކަށި ފިޔަވަޅު އަޅަން ޖެހޭނީ މިފަދަ ކަންކަމުގަ،" ގާޒީ ވިދާޅުވި އެވެ.

ކޯޓަށް ހާޒިރު ނުވެ "ފިލައިގެން" އުޅުމަށްފަހު އައްބާސް ފެނުނީ ނޮވެމްބަރު 17، 2023 ގައި ވެރިކަން ބަދަލުވިފަހުން ޕީޕީއެމް އެތެރޭގައި ޖެހުނު މައްސަލަގަނޑުގެ ތެރެއިން ޕީޕީއެމްގެ ހިންގުމާ ހަވާލުވެ ހުއްޓަ އެވެ. އޭނާ ވަނީ އެކަން އިއުލާނު ވެސް ކޮށްފަ އެވެ. އޭރު އޭނާ އުޅޭ ތަނެއް ނޭނގި އެތައް ޝަރީއަތެއް އޮތީ ކެންސަލް ކޮށްފަ އެވެ.

އޭގެ ފަހުން އޭނާ ކޯޓަށް ހާޒިރުވީ ޑިސެމްބަރު 12 ވަނަ ދުވަހު އެވެ. އެދުވަހު ވަނީ މި މައްސަލައިގެ ފުރަތަމަ އަޑުއެހުން ބާއްވާފަ އެވެ. މިއަދު ބޭއްވީ ދެވަނަ އަޑުއެހުމެވެ. ގާޒީ މިއަދު ވިދާޅުވީ ދެން އަޑުއެހުމެއް އޮންނާނީ އަންނަ މަހުގެ ފަހުކޮޅުގައި ކަމަށެވެ.