ޗުއްޓީ ނިމޭ ދުވަސް، ބޮޑު ބަޔަކަށް މޫސުމީ އިންޒާރު

ރާއްޖޭގެ ބޮޑު ސަރަހައްދަކަށް މޫސުން ގޯސްވާނެ ކަމަށް ލަފާކޮށް ވައިޓް އެލާޓް ނެރެފި އެވެ.

ނިމިދިޔަ އީދު ބަންދަށް ފަހު މިއަދަކީ ގިނަ ބަޔަކު ދަތުރު ކުރާނެ ދުވަހެކެވެ. މިއަދުގެ މޫސުން ލަފާކޮށް މެޓް އޮފީހުން ބުނީ ރާއްޖޭގެ އެންމެ ދެކުނު ކަމަށްވާ، ހއ. އަތޮޅުން ފެށިގެން ތ. އަތޮޅަށް މޫސުން ގޯސްވާނެ ކަމަށެވެ.

އެ ހިސާބަށް ނެރުނު އެލާޓްގައި ބުނެފައި ވަނީ ބޯކޮށް ވާރޭ ވެހުމާއެކު ގުގުރުން އެކަށީގެންވާ ކަމަށެވެ. ވައިޖެހޭނީ ގަޑިއަކު 19 މޭލާއި 24 މޭލާ ދެމެދު ކަމަށާއި ވިލާގަނޑުގައި ގަޑިއަކު 50 މޭލަށް ވައިގަދަވެ، ކަނޑުތައް ގަދަވާނެ ކަމަށް ލަފާކޮށްފައިވެ އެވެ.

ދެކުނަށް އެލާޓް ނެރެފައި ނެތް ނަމަވެސް، ވިލާގަނޑުގައި ކަނޑު އާދައިގެ ވަރަކަށް ގަދަވާނެ ކަމަށް ވެސް ލަފާކޮށްފައިވެ އެވެ.

އިއްޔެ ވެސް ބައެއް ސަރަހައްދުތަކަށް ވަނީ ބޯކޮށް ވާރޭ ވެހިފަ އެވެ. އިއްޔެ އެންމެ ގިނައިން ވާރޭ ވެހިފައި ވަނީ ކ. ގާފަރާއި ބ. ގޮއިދޫ އަށެވެ. ގޮއިދޫއަށް 61.2 މިލިލީޓަރުގެ ވާރޭ ވެހިފައިވާއިރު ގާފަރަށް 67.7 މިލިލީޓަރުގެ ވާރޭ ވެހިފައިވެ އެވެ.

ދަތުރުފަތުރު ކުރުމުގައި މޫސުމަށް ސަމާލުވާން މެޓް އޮފީހުން ވަނީ އިލްތިމާސްކޮށްފަ އެވެ.