ގެވެށި އަނިޔާ ލިބޭ އަންހެނުންގެ ނިސްބަތް ދަނީ އިތުރުވަމުން

ޖެންޑާ މިނިސްޓްރީގެ ދަށުން ހިންގާ ފެމެލީ އެންޑް ޕްރޮޓެކްޝަން އޮތޯރިޓީ (އެފްޕީއޭ) އަށް މިދިޔަ އަހަރު ގެވެށި އަނިޔާގެ 614 މައްސަލަ ހުށަހަޅާފައިވާއިރު، އޭގެ ތެރޭގައި ގިނައީ އަންހެނުންނަށް އަނިޔާ ކުރާ މައްސަލަތައް ކަމަށް ތަފާސްހިސާބުތަކުން ދައްކައިފި އެވެ.

އެފްޕީއޭ އިން މިއަދު ވަނީ 2023 އަހަރުގެ ގެވެށި އަނިޔާގެ މައްސަލަތައް ހިމެނޭ ތަފާސްހިސާބު ރިޕޯޓު އާންމު ކޮށްފަ އެވެ. މި ރިޕޯޓުގައި ފާއިތުވި އަހަރުތަކުގައި ގެވެށި އަނިޔާގެ މައްސަލަތައް ހުށަހަޅާފައިވާ މިންވަރު ވަނީ ހިމަނާފަ އެވެ. 

ރިޕޯޓުން އެނގޭ ގޮތުގައި އެންމެ ގިނައިން ގެވެށި އަނިޔާ ކުރަނީ މައިންބަފައިން ނުވަތަ ބެލެނިވެރިއެއްގެ ފަރާތުންނެވެ. ދެން އެންމެ ގިނައީ ކައިވެނި ކޮށްގެން އުޅޭ ނުވަތަ އިނދެ ވަރި ކޮށްފައިވާ މީހުނެވެ. 

މިދިޔަ އަހަރު އެފްޕީއޭއަށް ހުށަހަޅާފައިވާ ގެވެށި އަނިޔާގެ ރިފަރަލްތަކުން އެންމެ ގިނަ އަދަދަކަށް ހިނގާފައިވާ ގެވެށި އަނިޔާގެ އަމަލުތަކަކީ:

މިދިޔަ އަހަރު އެފްޕީއޭއަށް އެންމެ ގިނަ މައްސަލަތައް ހުށަހަޅާފައި ވަނީ ޖެންޑާ މިނިސްޓްރީންނެވެ. ތިންވަނަ ފަރާތެއްގެ ހައިސިއްޔަތުން ޖެންޑާ މިނިސްޓްރީން ވަނީ 421 މައްސަލަ އެ އޮތޯރިޓީއަށް ހުށަހަޅާފަ އެވެ. ދެން އެންމެ ގިނަ މައްސަލަ ހުށަހެޅީ ފުލުހުންގެ ހިދުމަތުންނެވެ. އެއީ 236 މައްސަލަ އެވެ. 

މި މައްސަލަތަކުގައި ޖުމްލަ 973 މީހަކަށް އަނިޔާ ލިބިފައިވާ ކަމަށް ރިޕޯޓްގައި ބަޔާންކޮށްފައިވެ އެވެ. މީގެ ތެރެއިން 619 މީހުންނަކީ އަންހެނުންނެވެ.

ރިޕޯޓުން އެނގޭ ގޮތުގައި 240 ފިރިހެނަކަށް ގެވެށި އަނިޔާ ލިބިފައިވެ އެވެ. ޖިންސުގެ މައުލޫމާތު ކަށަވަރު ނުވާ 114 މީހަކު ތިބި ކަމަށް ވެސް ރިޕޯޓުގައި ބަޔާން ކޮށްފައިވެ އެވެ.

"އަނިޔާ ލިބިފައިވާ އަންހެނުންނާއި އަންހެން ކުދިންގެ ތެރެއިން، އަނިޔާ ލިބިފައިވާ އަންހެނުންގެ އަދަދު ގާތްގަނޑަކަށް ދެގުނަ ބޮޑުވެ، އަދި 18 އަހަރުން މަތީގެ އަންހެނުންނާއި ފިރިހެނުންގެ ތެރެއިން، އަނިޔާ ލިނިފައިވާ އަންހެނުންގެ އަދަދު ގާތްގަނޑަކަށް ފަސް ގުނަ ބޮޑު،" ރިޕޯޓުގައި ހުރި ނަންބަރުތަކަށް ރިއާޔަތްކޮށް އެފްޕީއޭ އިން ފާހަގަ ކޮށްފައި ވެއެވެ.

މިދިޔަ އަހަރު އެކި ކޯޓުތަކުން 28 ރައްކާތެރިކަމުގެ އަމުރާއި 103 އަވަސް އަމުރެއް ވަނީ ނެރެފަ އެވެ. މި އަމުރުތަކަކީ އަނިޔާ ލިބުނު މީހާގެ ރައްކާތެރިކަމަށް ނެރެފައިވާ އަމުރުތަކެކެވެ. މިފަދަ އެންމެ ގިނަ އަމުރުތައް ނެރެފައި ވަނީ ފެމެލީ ކޯޓުންނެވެ.

ރިޕޯޓުން އެނގޭ ގޮތުގައި، 67 މައްސަލަ ތަހުގީގު ކުރުމަށްފަހު ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވެ އެވެ. މީގެ ތެރެއިން މިދިޔަ އަހަރުގެ ޖޫން މަހުގެ ނިޔަލަށް 10 މައްސަލަ ސާބުތުވެފައިވާއިރު 44 މައްސަލަ އޮތީ ކޯޓުގަ އެވެ.