ސިޔާސީ ދައުވާތަކެއް، ފެންނަނީ ފިނޑިކަން: ޖަމީލް

ޔޯގާ ދުވަހު ހިނގި ހަމަނުޖެހުންތަކާއި ގުޅިގެން 19 މީހަކަށް ދައުވާ ކުރަން ކްރިމިނަލް ކޯޓަށް މައްސަލަ ފޮނުވުމުންް ކުރީގެ ނާއިބު ރައީސް / މަޝްހޫރު ގާނޫނީ ވަކީލް ޑރ. މުހައްމަދު ޖަމީލް އަހުމަދު އެކަމަށް ވަރަށް ބޮޑަށް ފާޑުވިދާޅުވެއްޖެ އެވެ.

ޕްރޮސެކިއުޓާ ޖެނެރަލްގެ އޮފީހުން މިއަދު ބުނީ ޖޫން 21، 2022 ވަނަ ދުވަހު ގަލޮޅު ބޯޅަދަނޑު ހިމެނޭ ސަރަހައްދުގައި ހިންގި ހަމަނުޖެހުމުގައި ޓެރަރިޒަމްގެ އަމަލުތަކެއް ހިންގާފައި ވާތީ އެމީހުންގެ މައްޗަށް ދައުވާ ކުރުމަށް އިއްޔެ ކްރިމިނަލް ކޯޓަށް ހުށަހަޅާފައިވާ ކަމަށެވެ.

އެކަމަށް އިޝާރާތް ކުރައްވާ ޖަމީލް ވިދާޅުވީ އިންސާފުގެ ނަމުގައި ފެންނަނީ މުޑުދާރު އަމަލުތައް ކަމަށެވެ. ޔޯގާ ދުވަހު ހިނގި ހަމަނުޖެހުންތަކާއި ގުޅިގެން ދައުވާ އުފުލިއިރު ވެންޓިލޭޓަރުގެ ހިޔާނާތާއި އެއްޖިންސުން ޖިންސީ ގުޅުން ހިންގި މީހުންނަށް ހައްގު އަދަބު ނުދިނީ ކީއްވެގެންތޯ ސުވާލު ކުރެއްވިއެވެ. އަދި ރާއްޖޭގައި އާންމުވެފައިވާ ރަހުމްކުޑަ މަރުގެ މައްސަލަތަކާއި އެމްއެމްޕީއާރުސީގެ ހިޔާނާތުގެ މައްސަލަތައް ނުބަލާ އޮތީ ކީއްވެގެންތޯވެސް ސުވާލު ކުރެއްވިއެވެ. ޖަމީލް ވިދާޅުވި ގޮތުގައި ޔޯގާ ދުވަހު ހިނގި ހަމަނުޖެހުންތަކާއި ގުޅިގެން އުފުލީ ސިޔާސީ ދައުވާތަކެކެވެ.

"ސިޔާސީ ދައުވާތަކުން ފެންނަނީ ފިނޑިކަން،"

ޔޯގާ ދުވަހު ހިނގި ހަމަނުޖެހުންތަކާއި ގުޅިގެން ޝައިހު އާދަމް ނިޝާނާއި ޝައިހު ފަޒްލޫން މުހައްމަދުގެ މައްޗަށް ވެސް ދައުވާ އުފުލާފައިވެ އެވެ. މި ދެ އިލްމުވެރިންގެ މައްޗަށް ދައުލަތުން އުފުލާފައި ވަނީ ޓެރަރިޒަމް އަމަލެއް ހިންގަން ހިތްވަރު ދިނުމުގެ ކުށުގެ ދައުވާ އެވެ. އެ ކުށުގެ އަދަބަކީ 10 އަހަރާއި 15 އަހަރާ ދެމެދުގެ މުއްދަތަށް ޖަލަށްލުމެވެ. އަދި ކުރީގެ މެންބަރު މުހައްމަދު އިސްމާއީލްގެ މައްޗަށްވެސް 20 އަހަރުގެ ޖަލު ހުކުމެއް އަތުވެދާނެ ދައުވާ އެއް އުފުލާފައިވެއެވެ.

ޓެރަރިޒަމްގެ އަމަލެއް ކުރުމުގެ ކުށުގެ އަދަބަކީ 20 އަހަރާއި 25 އަހަރާ ދެމެދުގެ މުއްދަތަކަށް ޖަލަށް ލުމެވެ.

ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެ އަދަބީޫ 17 އަހަރާއި 20 އަހަރާ ދެމެދުގެ މުއްދަތަކަށް ޖަލަށްލުމެވެ.

މި ކުށުގެ އަދަބަކީ ތިން އަހަރާއި ފަސް އަހަރާ ދެމެދުގެ މުއްދަތަކަށް ޖަލަށް ލުމެވެ.

މި މައްސަލައިގައި ޕީޖީ އޮފީހުން ވަނީ އަބްދުﷲ ރިފާއުގެ މައްޗަށް ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ ވެސް އުފުލާފަ އެވެ. އެ ކުށުގެ އަދަބަކީ އެއް އަހަރާއި ތިން އަހަރާ ދެމެދުގެ މުއްދަތަކަށް ޖަލަށްލުމެވެ. މީގެ އިތުރުން ޝަބިމް އާދަމްގެ މައްޗަށް ވަނީ ހަތިޔާރެއް ބޭނުން ކޮށްގެން މާރާމާރީ ހިންކުމުގެ ކުށުގެ ދައުވާ އުފުލައިފަ އެވެ. އެ ކުށުގެ އަދަބަކީ ހަތް އަހަރާއި 10 އަހަރާ ދެމެދުގެ މުއްދަތަކަށް ޖަލަށްލުމެވެ.

އަދި މުހައްމަދު އިސްމާއީލާއި މުހައްމަދު ޒިލިއަންގެ މައްޗަށް އަދުލު އިންސާފު ގާއިމްކުރުމަށް ހުރަސްއެޅުމުގެ ކުށުގައި ދައުވާ ކޮށްފައިވެ އެވެ. މި ކުށުގެ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.

ދައުލަތުން ވަނީ ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ދައުވާ މި 18 މީހުންގެ ތެރެއިން 15 މީހެއްގެ މައްޗަށް އުފުލައިފަ އެވެ. މި ކުށުގެ އަދަވަކީ 4 މަހާއި 24 ދުވަހަށް ޖަލަށްލުމެވެ.