އިގުތިސާދީ ބަދަލު ގެނައުމުގައި އިޖުތިމާއީ އަދާލަތަށް އިސްކަން ދޭންޖެހޭ: ޖަނާހު

އިގުތިސޯދުތަކަށް އިންގިލީބީ ބަދަލުތައް ގެނެސް ސިންދަފާތު ކުރުމުގައި އިޖުތިމާއީ އަދާލަަތު ގާއިމު ކުރުމަށް އިސްކަން ދޭން ޖެހޭ ކަމަށް ރައީސް ޑރ. މުހައްމަދު މުއިއްޒުގެ އެޑްވައިޒާ އޮން އިންވެސްޓުމެންޓު މުހައްމަދު އަލީ ޖަނާހު (ޖަނާ) ވިދާޅުވެއްޖެ އެވެ.

ޖަނާ މިފަދައިން ވިދާޅުވީ އިންޓަނޭޝަނަލް ލޭބަ އޮގަނައިޒޭޝަން (އައިއެލްއޯ) ގެ 112 ވަނަ ކޮންފަރެންސުގައި ކުރެއްވި ތަގުރީރެއްގަ އެވެ. ނޭޝަނަލް ފެޑެރޭޝަން އޮފް މޯލްޑިވިއަން އެމްޕްލޮޔާސް (އެންއެފްއެމް) ގެ ރައީސްގެ ހައިސިއްޔަތުން އެ ކޮންފަރެންސްގައި ދެއްވި ތަގުރީރުގައި ޖަނާ ވިދާޅުވީ، ތަރައްގީ ވަމުން އަންނަ ކުޑަ ގައުމެއްގެ ހައިސިއްޔަތުން ރާއްޖެއަށް ބޮޑެތި ގޮންޖެހުންތައް ކުރިމަތިވަމުންދާ ކަމަށެވެ.

އިތުރަށް އޭނާ ވިދާޅުވީ ބަވަނަ ވެފައިވާ ދުނިޔޭގައި އެއް ސަރަހައްދު އަނެއް ސަރަހައްދާ ގުޅިފައިވާ މިންވަރު އެންމެ ބޮޑަށް އިހުސާސް ވަނީ ރާއްޖެ ފަދަ ގައުމުތަކަށް ކަމަށެވެ. އިތުރަށް ވިދާޅުވީ ދުނިޔޭގެ އެއް ސަރަހައްދަކަށް އަންނަ ލޮޅުމުގެ އަސަރުތައް ބޯޑަރުތައް ހުރަސްކޮށް ހުރިހާ ގައުމުތަކަށް ވާސިލު ވާނެ ކަމަށެވެ. އަދި މި އަސަރުތަކުގެ ސަބަބުން ޝައްކާއި އިތުބާރު ނެތުމުގެ މައްސަލަތައް ކުރިމަތިވާ ކަމަށެވެ. 

މުޅި ދުނިޔޭގައި ސުލްހަވެރިކަން ގާއިމުވެފައިވާ މުސްތަގުބަލަކަށް ވާސިލުވުމުގެ ފުރުސަތު ފަހިކޮށް ދެނީ މިއަދުގެ ގޮންޖެހުންތަކާ ގުޅިގެން މިހާރު ނިންމުންތަކުން ކަމަށް ވިދާޅުވެ ޖަނާ ވިދާޅުވީ، މިހާރަށްވުރެ ވިލުންތެރި އިގުތިސޯދުތަކާއި މުޖުތަމައުތައް އުފެއްދުމަށް މަސައްކަތް ކުރާއިރު، އެކަން ކުރަން ވާނީ އިޖިތިމާއީ އަދާލަތުގެ އަސާސްގެ މަތީގައި ކަމަށެވެ.

ޖަޒީރާ ގައުމެއްގެ ހައިސިއްޔަތުން ދިވެހިރާއްޖެއަށް މޫސުމީ ބަދަލުތަކުގެ ސަބަބުން ހުރިހާ މަސައްކަތްތެރިންނަށް ކުރިމަތިވާ ނުރައްކާތަށް ވަރަށް ސާފުކޮށް ފެންނަ ކަމަށާއި، ރާއްޖޭގެ މުހިއްމު ސިނާއަތްތައް ކަމަށްވާ ފަތުރުވެރިކަމާއި މަސްވެރިކަމާއި އެނޫންވެސް ސިނާއަތްތަކަކީ މޫސުމީ ބަދަލުތަކުން އަންނަ ލޮޅުންތަކަށް ނާޒުކު ސިނާއަތްތަކެއް ކަމަށް ވެސް ޖަނާ ވިދާޅުވި އެވެ.

ނަމަވެސް މިހާރަށްވުރެ ދެމެހެއްޓެނެވި އިގުތިސޯދަކަށް ބަދަލުވުމަށް ކުރާ މަސައްކަތުގެ ތެރެއިން ރާއްޖެއަށް އިތުރު ފުރުސަތުތައް ފަހިވަމުންދާކަން އޭނާ ފާހަ ގަކުރެއްވި އެވެ. އެކި ދާއިރާތަކަށް ޑިޖިޓަލް ބޮޑެތި ބަދަލުތައް ގެނެސް، އައު ޑިޖިޓަލް ޓެކްނޮލޮޖީތަކާއި ބިނާރުތައް ތަރައްގީކޮށް ދިވެހިރާއްޖޭގެ އިގުތިސޯދަކީ އިހުނަށްވުރެ ވިލުންތެރި އަދި މިހާރަށްވުރެ ހުޅުވާލެވިފައިވާ އިގުތިސޯދަކަށް އަދި މުޖުތަމައަކަށް ބަދަލު ކުރުމުގެ މަސައްކަތްކުރަމުންދާ ކަމަށް ވެސް ވިދާޅުވި އެވެ. 

އައިއެލްއޯގެ ޑިރެކްޓާ ޖެނެރަލްގެ ރިޕޯޓަށް ތާރީފު ކުރައްވަމުން ޖަނާހު ވިދާޅުވީ އެ ރިޕޯޓުގައި ފާހަގަ ކޮށްފައިވާ ގޮތަށް އެކަށީގެންވާ މަސައްކަތާއި އިޖުތިމާއީ އަދާލަތަކީ އެކުއަކީ ހިނގަންޖެހޭ ކަންކަން ކަމަށެވެ. އަދި އެ ދެ ކަމަކީ ދެމެހެއްޓެނެވި ތަރައްޤީއަށް މުހިއްމު ދެ އަސާސްކަމުގައި ވެސް ފާހަގަކުރެއްވިއެވެ. 

މިހާރު ގާއިމުވެފައިވާ އިޖުތިމާއީ އަގުދުތައް ނުވަތަ ސޯޝަލް ކޮންޓްރެކްޓުތަކުގެ ހަވާސާގައި އެކަހެރިވެފައި ތިބި މީހުންނަށް ހާއްސަ ސަމާލުކަމެއް ދޭންޖެހޭކަން ރިޕޯޓުގައި ފާހަގަކޮށްފައިވާތީ އެކަމަށް އިޝާރަތްކުރައްވައި ޖަނާހު ވިދާޅުވީ އެންމެންގެ ޝާމިލުވުން އޮތުމަކީ އިޖުތިމާއީ އަދާލަތުގެ އެއް ރުކުން ކަމަށެވެ. 

ދިވެހިރާއްޖޭގެ އާބާދީގެ ކުޑަކަމުގެ ސަބަބުން ބިދޭސީ މަސައްކަތްތެރިންގެ މައްޗަށް ބަރޯސާވާންޖެހޭ މިންވަރު ބޮޑުކަން ފާހަގަކުރައްވައި އޭނާ ވިދާޅުވީ މަސައްކަތްތެރިން ސިންދަފާތުކޮށް ތަފާތު ހުނަރުތަކުގެ އަދި ފަސްމަންޒަރުގެ މަސައްކަތްތެރިން މަސައްކަތުގެ މާހައުލަށް ގެނައުމަކީ ވަޒީފާ ދޭ ފަރާތްތަކުން އިސްކަންދީގެން ކުރަންޖެހޭ ކަމެއް ކަމަށެވެ.

އަދި ގައުމުގެ މަސައްކަތްތެރިންގެ ހުނަރުތައް އިތުރަށް ތަރައްގީކުރުމަށް އިންވެސްޓުކުރުމަކީ އަސާސީ ކަމެއްކަމަށް ޖަނާހު ވިދާޅުވިއެވެ. އޭނަ ފާހަގަކުރެއްވި ގޮތުގައި މި ވިސްނުމުން ވިސްނައި އެއް ގައުމުން އަނެއް ގައުމަށް ހިޖުރަކުރުމުގެ ސިޔާސަތަކީ ހުރިހާ ހިއްސާދާރުންނަށް މަންފާކުރަނިވި ދެމެހެއްޓެނެވި ތަރައްގީއާއި އިޖުތިމާއީ އަދާލަތު ކަށަވަރުވަނިވި ސިޔާސަތުތަކަކަށް ހަދަންޖެހެއެވެ.