އައިއެލްއޯ ކޮންފަރެންސުގައި ޖަނާގެ ތަގުރީރެއް

ދުނިޔޭގެ އެންމެ ބޮޑު ދެ ޖަމިއްޔާ ކަމަށްވާ އިންޓަނޭޝަނަލް ލޭބަ އޮގަނައިޒޭޝަން (އައިއެލްއޯ) ގެ 112 ވަނަ ކޮންފަރެންސުގައި  ނޭޝަނަލް ފެޑެރޭޝަން އޮފް މޯލްޑިވިއަން އެމްޕްލޮޔާސް (އެންއެފްއެމްއީގެ) ގެ ރައީސް މުހައްމަދު އަލީ ޖަނާހު ތަގުރީރު ކުރަވައިފި އެވެ.

ސުވިޒަލޭންޑުގެ ޖެނީވާގައި އޮތް މި ކޮންފަރެންސުގައި ރައީސުލް ޖުމްހޫރިއްޔާގެ ޕްރިންސިޕަލް އެޑްވައިޒަރު ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަގާމުގައި ވެސް ހުންނެވި ޖަނާގެ ތަގުރީރުގައި ރާއްޖޭގެ މައިގަނޑު ސިނާއަތްތައް ކަމަށްވާ ޓޫރިޒަމާއި މަސްވެރިކަމުގެ އިތުރުން މުވާސަލާތީ ދާއިރާ އަށް ވެސް މޫސުމަށް އަންނަ ބަދަލާއެކު އަސަރު ކުރާކަން ފާހަގަ ކުރެއްވި އެވެ. މީގެ އިތުރުން ރާއްޖެ ޑިޖިޓަލް ޓްރާންސްފޯމަޝަންތައް ފުރިހަމަ ކުރުމާ ދިމާލަށް ދަތުރު ކުރަމުންދާއިރު، ޑިޖިޓަލް ޓެކްނޮލޮޖީތަކާއި އިންފްރާސްޓްރަކްޗާ ފުރިހަމަ ކުރުމުގެ މަސައްކަތް ތަކެއް ކުރަމުންދާކަން ފާހަގަ ކުރެއްވި އެވެ.

ޖަނާ ތަގުރީގުގައި ޖަނާ ވިދާޅުވީ ވަޒީފާތަކަށް ދިވެހިން ތަމްރީން ކުރުމުގެ މުހިންމުކަން ފާހަގަ ކުރެއްވި އެވެ. އެކަމަށް އިންވެސްޓް ކުރަން ޖެހިފައިވާ ކަމަށް ވިދާޅުވި އެވެ. 

މުހައްމަދު އަލީ ޖަނާހު ވެފައިވަނީ ދިވެއްސަކު މެދުއިރުމަތީގެ ގައުމެއްގައި ބޮޑު ޓޫރިޒަމް މަޝްރޫއެއް ހިންގި ހަމައެކަނި ވިޔަފާރިވެރިޔާ އަށެވެ. އަދި ރާއްޖޭގެ ޓޫރިޒަމްގެ އެންމެ ދަތި ހިސާބު ކަމަށްވާ މާލެއާ ދުރުގައި އޮތް ހުވަދު އަތޮޅުގައި ޓޫރިޒަމް ފައްކާކޮށް އެއާޕޯޓެއް އެޅީ ޖަނާ އާއި ސިންގަޕޫރުގެ ޕާޓްރެއްގެ ބައިވެރި ވުމާއެކުގަ އެވެ. ދުނިޔޭގެ އެންމެ މަޝްހޫރު ޓޫރިޒަމް ބްރޭންޑް ކަމަށްވާ ހިލްޓަންގެ ވޯލްޑޯފް އެސްޓޯރިއާގެ ހަތް ތަރީގެ ރިސޯޓެއް ހިންގަވަ އެވެ. އެ ޕާޓްނާޝިޕް ގުޅިފައި ވަނީ މެދުއިރުމައްޗާ އެވެ. މިހާރު އެ ރިސޯޓްވެފައި ވަނީ ރާއްޖޭގެ އެންމެ އަލިގަދަ އެއް އައިކަން އަށެވެ. ދުނިޔޭގެ މަޝްހޫރު ސެލެބްރިޓީން އެންމެ ގިނައިން މަޑުކުރާ އެއް ރިސޯޓަކަށް ވެފައިވަނީ އެ ރަށެވެ. ޖަނާ ވެފައި ވަނީ ވިޔަފާރީގެ ވަރުގަދަ ދިވެހި ލީޑަރަކަށެވެ.

ކޮމަންވެލްތުގެ ވިޔަފާރިވެރިންގެ "ކްލަބް" ގްލޯބަލް އެޑްވައިޒަރީ ކައުންސިލްގެ ބޯޑަށް ދާދި ފަހުން ޖަނާ ވަނީ ހަމަޖައްސަވާފައެވެ. ދެވަނަ ބޮޑު ހަނގުރާމައަށް ފަހު އުފެދުނު، މިހާރު 60 އަހަރުވެފައިވާ ދުނިޔޭގެ އެންމެ ބޮޑު ސިނާއީ ޖަމިއްޔާ، އިންޓަނޭޝަނަލް ފެޑެރޭޝަން އޮފް އޭޝިއަން އެންޑް ވެސްޓާން ޕެސިފިކް ކޮންރެކްޓާސް އެސޯސިއޭޝަންސް (އިފޮޕްކާ) އިން ދޭ އެންމެ ޝަރަފުވެރި އިނާމު -- "އިޔޯ ޗުން ލޭ" ވެސް ވަނީ ޖަނާ އަށް އަރުވާފައެވެ. އަދި ދެކުނު އޭޝިއާ ޓޫރިޒަމް ދާއިރާގައި އެންމެ ވަރުގަދަ ސަހްސިއްޔަތަށް އަލަށް ދޭން ފެށި ޓޫރިޒަމް ފޭސް އޮފް ސައުތު އޭޝިއާ އެވޯޑް ވަނީ ޖަނާ އަށް ލިބިވަޑައިގެންފައެވެ.