ތިލަމާލެ ބުރިޖު އަންނަ އަހަރުގެ ނިޔަލަށް ވިލިނގިއްޔާ ހަމައަށް ގުޅުވައިލެވޭނެ: މުއްތަލިބު

މާލެއާއި ވިލިމާލެ އަދި ގުޅިފަޅު ގުޅުވައިލުމަށް ހިންގަމުން އަންނަ ތިލަމާލޭ ބުރިޖުގެ މަސައްކަތުގެ ތެރެއިން ފުރަތަމަ ސެގްމެންޓު ނިންމައި މާލެއާއި ވިލިމާލެ އަންނަ އަހަރުގެ ނިޔަލަށް ގުޅުވައިލެވޭނެކަމަށް ކޮންސްޓްރަކްޝަން މިނިސްޓްރީން ބުނެފިއެވެ. 

މިއަދު އެ މިނިސްޓްރީގެ ފަރާތުން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަބްދުﷲ މުއްޠަލިބު ވިދާޅުވީ ތިލަމާލޭ ބުރިޖުގެ މަސައްކަތްކުރުމަށް ހަދާފައިވާ އެއްބަސްވުމުގައި މަސައްކަތް ނިންމަން ކަނޑައަޅާފައިވަނީ ސެގްމެންޓުތަކަކަށް ބަހާލައިގެން ކަމަށެވެ. 

އެގޮތުން އެ މަޝްރޫއުގެ ފުރަތަމަ ސެގްމެންޓަކީ މާލެއާއި ވިލިމާލެ ގުޅުވައިލުން ކަމަށާއި، މިހާރު ކުރިއަށްދަނީ އެ ސެގްމެންޓުގެ މަސައްކަތް ކަމަށް މިނިސްޓަރު ވިދާޅުވިއެވެ. އޭނާ އިތުރަށް ވިދާޅުވި ގޮތުގަައި ދެވަނަ ސެގްމެންޓަކީ ގުޅިފަޅާ ހަމައަށް ބުރިޖުން ގުޅުވައިލުމެވެ. 

ފުރަތަމަ ސެގްމެންޓުގެ ދަށުން މާލެއާއި ވިލިމާލެ ގުޅުވައިލުމުގެ މަސައްކަތް އަންނަ އަހަރުގެ ނިޔަލަށް ނިންމައިލެވޭނެ ކަމަށް ވެސް މިނިސްޓަރު ވިދާޅުވިއެވެ. އަދި ދެވަނަ ސެގްމެންޓުގެ ދަށުން ގުޅިފަޅާ ހަމައަށް ގުޅުވައިލުމުގެ މަސައްކަތް 2026 ވަނަ އަހަރު ނިންމައިލެވޭނެ ކަމަށް ވެސް މިނިސްޓަރު ވިދާޅުވިއެވެ. 

ކުރީ ސަރުކާރުން ހިންގަން ފެށި އެންމެ ބޮޑު އުމްރާނީ މަޝްރޫޢުކަމަށްވާ ތިލަމާލޭ ބުރިޖުގެ މަސައްކަތް އޮތީ ސަރުކާރު ބަދަލުވިއިރު ވަރަށް ބޮޑަށް މަޑުޖެހިފައެވެ. ނަމަވެސް ސަރުކާރު ބަދަލުވުމާއެކު އެ މަޝްރޫޢުގެ ކޮންޓްރެކްޓަރުކަމަށްވާ އެފްކޯންސް ކުންފުންޏާއެކު ވާހަކަދެކެވިގެން މަޝްރޫޢުގެ ދުވެލި އަވަސްކުރުމަށް އަންނަނީ މަސައްކަތްތަކެއް ކުރެވެމުންނެވެ. 

ފާއިތުވި 5 މަހުގެ ތެރޭގައި އެ މަޝްރޫޢު އަވަސްކުރުމަށް ކުރި މަސައްކަތުގެ ސަބަބުން މޭ މަހުގެ 21 ވަނަ ދުވަހާ ހަމައަށް ބުރިޖުގެ 37 އިންސައްތަ މަސައްކަތްވަނީ ނިންމައިލެވިފައެވެ. ކުރީގެ ވެރިކަމުގައި 25 މަސްދުވަހުން ނިމިފައިވަނީ އެންމެ 29 އިންސައްތަ މަސައްކަތެވެ.