އެމްޕީއެލްގެ ތެޔޮ ވައްކަން: ގެއްލުނު ފައިސާ 20 މިލިއަނުން މަތީގައި
އެމްޕީއެލް ތެޔޮ ވައްކަން ފަޅާ އެރި 2020 ވަނަ އަހަރު އެވެ. މިހާތަނަށް އެނގިފައިވާ ގޮތުން 2018 އިން ފެށިގެން މި ވައްކަން ދިޔައީ ކުރަމުންނެވެ. އަދި މިކަމުގައި އުޅެމުން ގޮސްފައިވަނީ އެއް މުވައްޒަފުން ތަކެވެ. މި މީހުން އެމްޕިއެލްގެ ވަޒީފާއިން ވަނީ ވަކިކޮށްފަ އެވެ.
- އެމްޕީއެލް ވައްކަން ފަޅާއެެރީ ކޮވިޑް ތެރޭގައި
- ވައްކަމާ ގުޅިން މުވައްޒަފުންތަކެއް ވަނީ ވަކިކޮށްފައި
- އޮޑިޓަ ޖެނެރަލް އޮފީހުން ދަނީ އޮޑިޓެއް ކުރަމުން
- މި މައްސަލަ ފުލުހުން ވެސް ދަނީ ތަހުގީގު ކުރަމުން
ކޮވިޑުގެ ތެރޭ، 2020 ވަނަ އަހަރު މާލޭގެ ވިޔަފާރި ބަނދަރުގައި ކުރި ތެލުގެ ބޮޑު ވައްކަމެއްގެ މައްސަލަ ފެންމަތިވި އެވެ. ބަނދަރަށް ތެޔޮ ގެންދާ ބައުޒަރުތަކުގައި ތިބޭ އެފްއެސްއެމްގެ މުވައްޒަފުންނާއި އެމްޕީއެލްގެ މުވައްޒަފުންގެ ބަޔަކު ގުޅިގެން އެތައް މިލިއަން ފައިސާއެއް ނަގަމުންދާކަން އޭރު ފަޅާއެރި އެވެ. ބެލިފައި އޮތީ އެކަން ކުރީ "ކޮވިޑުގެ ތެރޭގައި" ކަމަށެވެ. އެކަމަކު އެމްޕީއެލް އަމިއްލަ އޮޑިޓްފާމަކާ ގުޅިގެން ހެދި "ފައިނޭޝަން އޮޑިޓުން" އެނގުނު ގޮތުގައި ވައްކަން އޮތީ 2018 އިން ފެށިގެން ފެށިފަ އެވެ.
ވިޔަފާރި ބަނދަރުގައި މިއަދު ބޭއްވި ނޫސްވެރިންގެ ބާއްދަލުވުމެއްގައި އެ ކުންފުނީގެ މެނޭޖިން ޑިރެކްޓަރު ޝާހިދު އަލީ ވިދާޅުވީ ފުރަތަމަ އޮޑިޓުގައި، ގެއްލުނު ފައިސާގެ އަދަދަކީ އަށް މިލިއަން ކަމަށް ދެއްކި ނަމަވެސް އިތުރަށް ހެދި އޮޑިޓްތަކުން "ތެޔޮ ވައްކަން" 2018 އިން ފެށިގެން ކުރަމުން ގޮސްފައިވާކަން އެނގެން އޮންނަ ކަމަށާ އެހެންވެ 2019 އަދި 2020 އެއްކޮށް ބަލާނަމަ ގެއްލުމުނު ފައިސާގެ އަދަދު އަށް މިލިއަން ރުފިޔާއަށް ވުރެ މަތިވާނެ ކަމަށެވެ- އެކަމަކު މި ތިން އަހަރު އެއްކޮށްލުމުން ގެއްލިފައިވާ ފައިސާގެ އަދަދު ޝާހިދު މިއަދު ވިދާޅެއް ނުވެ އެވެ.
ތިން އަހަރުވެސް ވައްކަމުގައި އެއްބައެއް
ބޮޑު މި ވައްކަމުގައި ބައިވެރި ކަމަށް ތުހުމަތު ކުރެވޭ މީހުން މިހާރު ވަނީ އެމްޕީއެލްގެ ވަޒީފާއިން ވަކިކޮށްފަ އެވެ. އެކަމަކު "މި" ނޫހަށް އެނގިފައިވާ ގޮތުގައި މައްސަލާގައި ބައިވެރިވި ކަމަށް ތުހުމަތުވި ބައެއް މީހުން މިހާރު ވަނީ އަމިއްލަ ވިޔަފާރި ފަށައި ފުޅާކޮށްފަ އެވެ،
"މި ހާތަނަށް [އެމްޕީއެލް] ކުންފުނީގެ ތެރެއިން ފާހަގަ ކުރެވުނު މުވައްޒަފުންނަކީ އެއް ބައެއް. މިކަން ހިންގައި ދިނީ އެމްޕީއެލް އާއި އެފްއެސްއެމްގެ މުވައްޒަފުންތަކެއް ގުޅިގެން. އެކޮޅުން [އެފްއެސްއެމް] ގައި މިކަން ހިންގީ ވަކި ބައެއްތޯ، އެކަން އެނގޭނީ ފުލުހުންގެ އިންވެސްޓިގޭޝަނުން،" ޝާހިދު ވިދާޅުވި އެވެ.
ގެއްލުނީ 8 މިލިއަނެއް ނޫން، 20 މިލިއަނުން މަތި
"މި" ނޫހަށް އެނގިފައިވާ ގޮތުގައި ތެޔޮ ވައްކަމުން ގެއްލުނު ފައިސާގެ އަދަދު 20 މިލިއަން ރުފިޔާއަށް ވުރެ މައްޗެވެ.
އެމްޕީއެލްގައި މިއަދު އޮތް ނޫސްވެރިންގެ ބައްދަލުވުމުގައި "މި" ނޫހުން ކުރި ސުވާލަކަށް ޖަވާބު ދެއްވަމުން ޝާހިދު ވިދާޅުވީ މި މައްސަލައާ ގުޅިގެން ފުލުހުން ތަހުގީގު ކުރިއަށްދާއިރު އޮޑިޓަ ޖެނެރަލްގެ އޮފީހުން ވެސް އޮޑިޓެއް ހަދަމުން ގެންދާ ކަމަށެވެ. ކޮވިޑުގައި ބަނދަރު ސްކޭލްޑައުން ކުރި ނަމަވެސް ތެޔޮ ސަޕްލައިގައި ހުރި މައްސަލަތައް "ފަޅާ އެރީ" ނަމަވެސް ތެލުގެ ސަޕްލައި ދަށްވެ މައްޗަށް ދިއުމުގެ ސަބަބުންނެވެ.
"ކޮރަޕްޝަންގެ ކަންތަކާ ގުޅިގެން ދެ ދާއިރާ އަކުން ބެލިން. އިންޓާނަލް އިންވެސްޓިގޭޝަން ތަކެއް ކުރިން. މުއްސަސާތަކާއެކު ކުރިއަށް ގެންދިއައިން. މި އިންވެސްޓިގޭޝަނަށް ކުރިއަށް ގެންދިޔައީ އެކްސްޕާޓް އޮޑިޓްފާމަކުން. ފުރަތަމަ 2020 ގައި ހެދި އިންވެސްޓިގޭޝަނުން އެނގުނީ އަށް މިލިއަން ކަމަށް. ދެން ބެލީ ތިން އަހަރު [2018، 2019 އަދި 2020] ގައި ހެދިން. މީގެ ތަފުސީލީ އޮޑިޓެއް އެބަ ހަދާ އޮޑިޓަ ޖެނެރަލް އޮފީހުން ވެސް."
ނޫސްވެރިންގެ ބައްދަލުވުމުގައި ޝާހިދު ވިދާޅުވީ ތިން އަހަރު ބެލިފައިވާއިރު އޭގެ ކުރީގައި ވެސް މި ވައްކަން ކޮށްފައިވެދާނެ ކަމަށެވެ.
ތެލުން ވައްކަން ކުރީ ކިހިނެއް؟
ތެލުގެ ބޮޑު މި ވައްކަން ކޮށްފައިވަނީ އެމްޕީއެލް އާއި އެފްއެސްއެމްގެ މުވައްޒަފުން ގުޅިގެންނެވެ. އެމްޕީއެލް ވިޔަފާރި ބަނދަރަށް އެފްއެސްއެމްގެ ވައުޒަރުތަކުން ވަދެ ތެޔޮ އެޅުމަށް ފަހު "ތެޔޮ ބާކީ ކޮށްގެން" ބަނދަރުން ނެރެ ކަޅުބާޒާރުގައި ވިއްކަނީ އެވެ. ތެޔޮ ބާކީ ކުރަނީ ވިޔަފާރި ބަނދަރުގައި އަޅަން ޖެހޭ ވަރަށް ވުރެ މަދުން ތެޔޮ އަޅައިގެންނެވެ.
ޝާހިދު ވިދާޅުވީ މި މައްސަލަ ތަކުރާރުވިޔަ ނުދިމަށްޓަކައި ވާނި ފިޔަވަޅުތަކެއް އަޅާފަ އެވެ. އެގޮތުން ދެން މިފަދަ ވައްކަމެއް ކުރެވޭނެ ހުރިހާ "ލޯ ވަޅު" ތަކެއް ވާނީ ބަންދުކޮށްފަ އެވެ.
ކޮމެންޓް
Republic of Maldives