ބީއެމްއެލްއިން ހިއްސާގެ ފައިދާ އިތުރުވެފައިވަނީ އެ ކުންފުނީގެ ވިޔަފާރި ފުޅާވެގެން ދިއުމުންނެވެ.
ބީއެމްއެލް އިން ހިއްސާގެ ފައިދާގެ ގޮތުގައި ހިއްސާއަކަށް 50 ރުފިޔާގެ މަގުން ޖުމްލަ، 269 މިލިއަން ރުފިޔާ ބަހަން ނިންމައިފި އެވެ.
ހޮޓެލް ޖެންގައި މިރޭ ބޭއްވި އަހަރީ އާއްމު ޖަލްސާގައި ހިއްސާގެ ފައިދާގެ ގޮތުގައި 50ރ. ބަހަން ނިންމުމާއެކު މިއީ މިދިޔަ އަހަރު ބެހި 40ރ، އަށްވުރެ އިތުރުވުމެކެވެ. މިދިޔަ އަހަރު ހިއްސާދާރުންނަށް ޖުމްލަ 215 މިލިއަން ރުފިޔާ ބަހާފައިވެ އެވެ. މި ބަދަލާއެކު މި އަހަރު އެ ކުންފުނިން ސަރުކާރަށް ހިއްސާގެ ފައިދާގެ ގޮތުގައި 136.6 މިލިއަން ރުފިޔާ ލިބޭނެ އެވެ.
މިރޭގެ ޖަލްސާގައި އެ ކުންފުނީގެ ބޯޑަށް އާ ޑިރެކްޓަރުން އައްޔަން ކުރުންވެސް އޮތެވެ.
ބޭންކްއަށް މިދިޔަ އަހަރު ބޮޑު ފައިދާއެއް ލިބިފައިވެ އެވެ. އެ ބޭންކުން މިދިޔަ އަހަރު ޖުމްލަ ފަސް ބިލިއަން ރުފިޔާގެ އާ ލޯނު ދޫކޮށްފަ އެވެ. ރާއްޖޭގައި ހިންގާ އެންމެ ބޮޑު ބޭންކް، ބީއެމްއެލްގެ ރައުސުލްމާލުގެ އަގު 45 ބިލިއަން ރުފިޔާއަށް ވަނީ އަރާފަ އެވެ.