އިނގިރޭސި ޑޮކްޓަރެއްގެ ދުލުން: ޣައްޒާގެ ހޮސްޕިޓާތައްވަނީ "ޑާކް އޭޖެސް"އަށް އިއާދަވެފައި

ޣައްޒާގެ ހޮސްޕިޓާތަކަށް ބޭނުންވާ އަސާސީ ވަސީލަތްތައް ނުލިބުމުގެ ސަބަބުން އެ ހޮސްޕިޓާތަކުން ފޯރުކޮށް ދެވެނީ "މެޑީވަލް" ނުވަތަ ޔޫރަޕުގެ އަނދިރި ޒަމާނުގެ ފަރުވާތައް ކަމަށް، ޣައްޒާއިން އަނބުރާ ޤައުމަށް ވަޑައިގެންނެވި އިނގިރޭސި ޑޮކްޓަރަކު ވިދާޅުވެއްޖެ އެވެ. 

ޔުނިވާސިޓީ ކޮލްޖް ލަންޑަން ހޮސްޕިޓަލްސްގެ ގެސްޓްރޮއިންޓެސްޓިނަލް ސާޖެރީ ޑިޕާޓުމެންޓުގެ ވެރިޔާ ޑރ. ޚާލިދް ދަވާސް ވިދާޅުވި ގޮތުގައި ޣައްޒާގެ ހޮސްޕިޓާތަކުގައި ފޯރުކޮށްދޭން ޖެހިފައިވާ ޚިދުމަތްތަކަކީ "މެޑީވަލް މެޑިސިން" ގެ ގޮތުގައި ސިފަ ކުރުމަކީ ސައްހަ ސިފަ ކުރުމެކެވެ. 

އޭނާ އިތުރަށް ވިދާޅުވީ އެ ހޮސްޕިޓާތަކުގައި ހިނގާ ކަންކަމަކީ މީގެ 300 ނުވަތަ 400 އަހަރު ކުރިން ޔޫރަޕުގެ ޤައުމުތަކުގައި ހިނގިކަމަށް ތާރީޚު ފޮތްތަކުގައި ލިޔެވިފައި ހުރި ކަންތައްތައް ކަމަށެވެ. 

ދަވާސް ވިދާޅުވި ގޮތުގައި ޣައްޒާގެ ހޮސްޕިޓާތަކުގައި ޞިއްޙީ ޚިދުމަތްތެރިން މަސައްކަތްކުރަމުން ދަނީ ބޭނުންވާ ޞިއްޙީ ވަސީލަތްތައް ނެތިއެވެ. ކަރަންޓު އިރުއިރުކޮޅާ ކެނޑެމުންދާއިރު، ބަލިމީހުން ބިންމަތީގައި ބައިތިއްބައިގެންނެވެ. 

ޣައްޒާގެ ހަނގުރާމަ ފެށުނު ފަހުން އެ ސަރަހައްދުގައި ޑޮކްޓަރުންނަށް އެހީތެރިވެވަޑައިގަތުމަށް ދެވަނަ ފަހަރަށް މަސައްކަތްކުރެއްވި އުމުރުން 54 އަހަރުގެ ޑޮކްޓަރު ވިދާޅުވި ގޮތުގައި އޭޕްރީލް މަހާ ކައިރިވިއިރު ހޮސްޕިޓާތަކުގައި މަރުވާ މީހުންގެ އަދަދާއި ހޮސްޕިޓާތަކަށް ގެންނަ މަރުވެފައިވާ މީހުންގެ ހަށިތަކުގެ އަދަދު އިންސާނަކަށް ތަހައްމަލުނުކުރެވޭ މިންވަރަށް އިތުރުވެފައިވާ ކަމަށެވެ. 

ޞިއްޙީ ޚިދުމަތްތެރިން މަސައްކަތުގައި ދެމިތިބި ނަމަވެސް، އަބަދުމެ މަރު ފެނުމުން އެމީހުންނަށް ކޮށްފައިވާ އަސަރުތައް އެމީހުން ކިނބައިން ފެންނަ ކަމަށާއި، އެކުރާ މަސައްކަތުގެ ބުރަ ބޮޑުކަމަށް ވެސް ދަވާސް ވިދާޅުވިއެވެ. 

ޣައްޒާ ދޫކުރައްވައި އަނބުރާ އިނގިރޭސިވިލާތަށް ވަޑައިގެންނެވި ނަމަވެސް އަލުން ޣައްޒާއަށް ވަޑައިގަތުމަށް ގަސްތުކުރައްވާކަމަށް ދަވާސް ވިދާޅުވި އެވެ. އަދި އޭނާ ވިދާޅުވި ގޮތުގައި އުންމީދަކީ ދެން ޣައްޒާއަށް ވަޑައިގަންނަވާއިރު ހަމަލާ ބަދަލުކުރުން ހުއްޓިފައި އޮތުމެވެ. 

ދަވާސް ވިދާޅުވި ގޮތުގައި ޣައްޒާގައި ޤަތުލު އާންމުގެ މެދުގައި ހުންނެވުމަށްވުރެ ހިތްޕުޅަށް ދަތިފުޅުވަނީ އަނބުރާ ޤައުމަށް ވަޑައިގަތުމުނެނެވެ. ޣައްޒާގައި ހުންނެވިއިރު ފެނިވަޑައިގެންނެވި މަންޒަރުތަކާއި އިވިވަޑައިގެންނެވި އަޑުތައް ހަނދުމަފުޅުވުމާއެކު، އެއްވެސް ބަޔަކަށް އަދި އެއްވެސް އިންސާނަކަށް އެކަންކަމުގެ ތެރޭގައި އެކަންކަމުގެ ތެރޭގައި އުޅެވޭނީ ކިހައި ދުވަހަކުތޯ ހިތަށް އަރާކަމުގައިވެސް އޭނާ ވިދާޅުވިއެވެ. 

ދަވާސް އޭނާގެ ތަޖުރިބާތައް ހިއްސާކުރެއްވީ ބުރަސެލްސްގައި އޮތް ބައްދަލުވުމެއްގައި ޔޫރަޕިއަން ޔޫނިއަނުގެ މަސްއޫލުވެރިންނާއެވެ.